تخطى إلى المحتوى
الرئيسية » فكرة لمنع جوالات الكاميرا في عرسك بأقل تكلفة

فكرة لمنع جوالات الكاميرا في عرسك بأقل تكلفة


مرحبا عرايس ..

حابة أنقل لكم فكرتي اللي ناوية أطبقها في عرسي بإذن الله و استفيد منكم بتعديل أو إضافة..
طبعاً الكل يحب أن ضيوفه في العرس يكونوا مرتاحين ومطمنين طوال وجودهم في الحفل .. و قرأت موضوع سابق هنا عن توفير جهاز للكشف عن الجوالات وما أعرف من وين أجيبه بالإضافة إني أبغى اختصر بعض التكاليف و أركز على الأشياء الأهم ..

و الفكرة كما رسمتها هي ..

1-من نفس المكتب اللي أوفر منه مقهويات وصبابات راح أطلب منهم موظفتين و يلبسن يونيفورم موحد.

2-عدد 4 مكتبة خشبية خفيفة برفوف عديدة ( موجودة في أحد محلات العين بسعر 45 درهم).

3- حوالي 300 كيس بلاستيكي بطابع مثل اللي في الصورة :

4- طاولة و كرسيين للموظفات . وهذي طبعاً تقدري تجيبيها من البيت .

5- أقوم بطباعة أرقام من 1 إلى 300 مثلا حسب عدد الأكياس و تغليفها بالبلاستيك الشفاف وقصها على شكل بطاقات صغيرة .

6- طاولة الموظفات تكون موجودة في الممر اللي قبل الدخول للقاعة ، و يكون دورهن هو أن يطلبن من كل من معها جوال كاميرا أن تضعه عندهن في كيس بلاستيكي و يسلمنها البطاقة التي تحمل رقم الكيس . و لما تطلع الحرمة تسلمهم الكرت ويعطونها جوالها .

7- طبعاً حتى نتجنب ردود فعل بعض النساء ، نذكر في بطاقة الدعوة أنه لن يسمح بدخول جوالات الكاميرا من قبل الموظفات و كذا يظهر الأمر رسمي شوية للمدعوات و يلتزمن بإذن الله.

هاه شو رأيكن .. ؟؟

تحياتي.. إيما

(f)

حبيبتي والله فكرتج حلوة .. وهذا اللي يسوونه لما يطلبون جهاز الكشف عن الكاميرا يحطون معاه ثنتين يستلمون الجوالات

ويحطونهم باكياس مع اوراق وارقام مثل ماذكرتي ..

بس تدرين شالحاصل حبيبتي في معظم العروس .. اكتشفوا ان في بنات يخشون الجوال في الجوتي وانتي بكرامه او في ملابسهم

الداخليه عشان ماياخذونه عنهم .. فلهذا السبب يطلبون حريم يفتشون المعازيم قبل الدخول عشان يتفادون حركات بعض البنات ..

لانها لو طلبت منها تعطيها الجوال ممكن تقول ماعندي

والله الموفق عروس

اولا الف مبروك حبيبتي

فكرتج حلوه ولكن…

في حال حصل لبس او خربطه في الموبايلات…او ضاع موبايل حد لاي سبب من الاسباب..من المسؤول؟؟؟؟؟؟

انا فكرت في هالشي بس مسؤووليه كبيره اذا ضاع تيلفون حد او انسرق…

عزيزتي وردة قطر..

معقول في معازيم يسوون كذا !!
لا حول ولاقوة إلا بالله ..
مشكورة عزيزتي على تنبيهج
ومعج حق هنا بيكون الوضع صعب و يحتاج للجهاز عروس

الله يعين ويستر على الجميع .. المشكلة يا اختي إن عندنا معازيم من السعودية وتعرفين هناك عندهم إجباري التفتيش بعكس ماهو عندنا هنا بالعين و ودي يكونوا مرتاحين على الآخر في عرسي .. و أنا ما قد شفت هالحركة في العين عشان كذا خطرت لي ..

ربج يعين بس

ومشكورة على مرورج

عزيزتي آنجل آي ..

الله يبارك بعمرج يارب

ترتيب الجوالات بالأكياس و كتابة الرقم على كل ظرف و بقاء الكرت مع الضيفة
يضمن -بإذن الله- أن ما تحصل خربطة أو سرقة ..
و أيضاً الحرص من الموظفات .. أما لو حصل شيء كهذا فطبعاً سنكون نحن أهل العرس المسؤولين وأتمنى بإذن واحد أحد ما يحصل شيء من هذا القبيل..

نحن أغلب معازيمنا من معارفنا وكلهم قراب علينا و عندي أمل و ثقة بإذن الله أن ما تكون من بينهن وحدة سيئة تفسد على الآخرين بالتصوير..

و دعواتج يا غالية ..

تحياتي

الله يوفقج يا عمري دنيا و اخره عروس
الفكره حلوه بس صعبه شوي
قولي ليج
الان يوم حد يتصل فيج مهم كيف بتردين يوم الجوال ما عندج
بعدين الي عندهاعيال وهي يالسه تحاتيهم كيف بتعرف علومهم والجوال ما عندها
وبعدين اذا الريال مستعجل وطلع عنده شغل ظروري كيف بتعرف الحرمه ويعصب عليها
وبعد وايد فوايد لجوال ولا شو رايج
وبعدين حريم يحبن البطره لزم جوال يديد على الفستان
عزيزتي آنجل آي ..

آآآآآآآمين يارب و إياج وكل مسلم ومسلمة

***

عزيزتي قرموشة .. يحاج الله

هو فعلاً صعب و لكن وين المهم .. الستر و راحة المعزومات و إلا الأمور الثانية
و بعدين العرس كله على بعضه حوالي 3 ساعات .. و اللي تبغى تكلم أهلها تطلع برع القاعة تكلمهم بجوالها و ترد للقاعة .. لأن الهدف الأهم هو منع التصوير و يهون غيره

بس والله المشكلة الأصعب هي في حالة إخفاء الجوال من المدعوات مثل ما قالت وردة قطر عروس

و على العموم مشكورة يا قرموشة..

تحياتي

اسمحي لي اختي بس فكرتج كلش ما تنفع

لازم جهاز يرن لان الناس للأسف مالها امان

سفيرة فو العاده

حبيبتي فكرتك حلوه للي تكون مطلعه الجوال
لكن فيه بعضهم يتلاعبون ويخبونهم حتى بالملابس الداخليه لذلك اطلبي من المسؤلين عن القاعه يوفرون لك الجهاز
احسن لك

اترك تعليقاً

لن يتم نشر عنوان بريدك الإلكتروني.

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.