مدرسة النور العالمية اشرايكم يا بنات البحرين؟؟؟

السلام عليكم ورحمة الله وبركاته ،،،،

بنات أبني عمره 5 سنوات ونص تقريباً وعلى شهر سبتمبر انشاء الله ناوية ادخله مدرسة خاصة فقررت ان اضمه بمدرسة النور العالمية فايليت الاخوات الي عندهم معلومات عن المدرسة يفيدوني والي عندها خبرة في المدارس الخاصة الثانية تخبرني ولكم جزيل الشكر.

والله في ناس يمدحون وناس يذمون،،، هو منهجهم مطابق لوزارة التربية بإستثناء منهج اللغة الإنجليزية،،، بس مشكلتهم عدد كبير من الطلاب في الفصل،،،
عن تجربة مدرسة المعارف دراستهم قوية،، بس عيبهم إن الإدارة مو متعاونة مع أولياء الأمور،،،
مشكوره يالغالية على تعاونج معاي وياليت البنات الي عندهم خبرة مع هالمدرسة يخبروني.
مدرسة النور عيبها على ما اعتقد انها ما تركز وايد على اللغة العربية لان خالتي ودت بنتها هناك وبعدين ردت نقلتها لمدرسة حكومية وللاسف بنتها تأثرت هناك وصايرة اضعف شي الحين في اللغة العربية ودايما درجاتها فيها اقل من باقي المواد مع ان ودوها معهد غير ان امها وايد تتعب معاها لكن ما في فايده وهذا دليل على انها ما درست اللغة من الاساس كما يجب ..

حماتي تودي عيالها مدرسة النسيم " في الرفاع " .. واااااااااايد يمدحونها ومن كل الجوانب ، حتى ان زوجي يفكر يودي حسون هناك لما يكبر ان شا الله ..
بس مصاريفها وايد غالية اعتقد 1500 دينار للطالب ..

وفي بعد مدرسة في عالي اعتقد ان اسمها بوابة المعالي .. يقولون زينة بعد ومناهجها قريبة وااايد من المناهج الحكومية ..
وفي بعد مدرسة في سار اسمها المهد يمدحونها وايد ..

اتمنى اني اكون افدتج ان شا الله

سمعت عن المهد يمدحونها،، بس أن تدوري أكثر من مكان أفضل،، الله يعيني على ولدي مادري وين بادخله لين كبر….
ما عندي فكرة عن هالمدرسة
بس مثل ما قالوا البنات مدرسة المهد أوكي بس مشكلتهم ما يركزون على اللغة العربية و لو حبيبتي بعدين تنقلينه لمدرسة حكومية راح يواجه مشكلة كبيرة في اللغة العربية
هلا اختي …

احنا جربنا مع بنت اختي بمدرسة المهد … كبداية المناهج مناسبة للطفل بس المشكلة في المدرسات … كلهم هنوود عدا مرسات العربي … بتلاحظين النطق عند الطفل ياخذ مثل الهنود … وبعدين وديناها مدرسة النور .. والحين اهي بالصف الرابع … والبنت بالقسم البريطاني … يعني المدرسة عندها اكثر من نظام … عندها نظام الدارسة بالعربي في القسم العربي … وباللغة الانجليزية بالقسم البريطاني … وكان في قسم ثالث بس مو متاكدة …
وبالنسبة لادارة المدرسة … الحمد لله .. ما لقينا منهم اهمال للطالب او تقصير … ومتابعة يومية … ولو في شي يتصلون بولي الامر …

بس اني عندي ملاحظة …. المدرسة منهجها مكثف وتلاحظين ان الطالب يكون عنده حصيلة علمية كبيرة … بس للاسف لما يرجع البيت وما يتابع الدروس بشكل يومي مع الاهل تكون المادة صعبه وما يقدر يمشي فيها … طبعا لانها باللغة الانجليزية وكلمات جديدة …

بالنسبة للمدارس الاخرى ما اقدر اعطيش كلام عنهم لاني ما جربتهم بطريقة مباشرة …

بالتوفيق اختي .. ولو تبين تفاصيل اكثر … حياش لا تستحين

اختي مثل ما قالت الاخت بير عسل ان المدرسة عندها اكثر من نظام وانت اللي تختاري الى نظام تفضلي ابنج يدخل سواء العربي او البريطاني ولما تروحي حق التسجيل يعطونج معلومات وافية عن كل نظام وانت لج حرية الاختيار ورسومها مناسبة، اما مدرسة المهد اني احس ان عيبها ان الطفل من يصير في صف الاول يصير دوامه الى الساعة 4 عصرا ، فيكون الدوام مجهد للطفل ويتملل بسرعة من الدراسة. ودمتم سالمين

يعطيكم العافية يا بنات على تجاوبكم معاي بس انا انشاء الله بدخل ابني على النظام العربي ولما يوصل لصف السادس بحوله حكومة ايش رايكم هل هذا بيكون لصالحه لاني ابيه يتأسس صح وبعدين يتخرج من مدارس الحكومة . فارجوكم لا تبخلون علي بالمشورة.
والله اني سمعت عن مدرسة المهد والمجد وبوابة المعالي يمدحون فيها

رأي واحد حول “مدرسة النور العالمية اشرايكم يا بنات البحرين؟؟؟”

  1. بشري اختي شنو سويتي ؟ ان شاء الله هالسنه بسجل بنتي في النور بس بعد نفسج متخوفه
    ياريت تكتبين لي تجربتج و اكون شاكره لج

    رد

أضف تعليق

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.