يقولون
من يعش في هذا الزمان
يرى العجب العُجاب
لم أُدرك هذا المعنى
إلا الآن ..
نري في حياتنا أموراً تبعث على الضحك
وأُخرى تبعث على البكاء
وثانيه تُبكينا وتُضحكنا في نفس الوقت
ونرى أشياءاً تجعل الألم
يملأ قلبك بدرجه يصعب إحتماله
أنا مثلي مثل باقي البشر
أرى مايرونه
وأتألم مثلهم
لكني قررت أن ادون
و أكتب عن هذ الألم
وقد يكون هناك من يستفيد مما أقوله
فيعود لرشده قليلاً
لعله بعودته تلك ( يرحمنا شوي من اللي نشوفه ) ..
قد تقولون ماذا يريد أن يقول هذا ..؟
أو بالعاميّه ( وش عنده ذا ..؟ )
ماعندي شي والله سِوى مشاهدات ومتناقضات
أراها في الحياه آلمت قلبي والله
أراها مُتفشيّه بشكل كبير
لاأعلم لماذا ؟
لكنها موجوده
بعد إذنكم ياساده
سأُبحر قليلاً في هذه المُشاهدات والمُتناقضات التي رأيتها وسمعت عنها
ويراها الكل ( بلا إستثناء )
وعُذراً على الإطاله
مقدما
أول مشهد
( في السوق )
الكل يذهب للسوق .. أليس كذلك ؟
أنظروا معي هنا ..
فتيات يسرن في السوق ويدخلن من محل لآخر
العطر فوّاح والعباءه تحتاج لعباءه أُخرى
وضحكاتهن تُجلجل في المكان
يوم تشوفهم على الحال ذا
تستغرب هن جايّات يشترن وألا يتمشن
لكن ما أن تخرج أنت من باب المحل
حتى ترى إمرأه كبيره
تنتظر عند باب المحل معها أكياس وش كثرها
ومعها ( علبة مويا ) تشرب منها
والتعب بادئ على محياها
لتكتشف بعد فتره قصيره ( أنها أم أولئك الفتيات )
<< وش دراك ؟
بسيطه ( طلعت وحده من البنات تضحك تقول ياويلي أمي وينها
خخخخ لايكون ضاعت وإحنا مادرينا
وبكل تعب تقول أنا هنا )
ياجماعة الخير ( ذا حلال وألا حرام ) ؟
أُم يُفعل بها هكذا من بناتها بدال مايريّحونها
أخذينها تشيل أغراضهم وتتمرمط بشئ يُقال له سوق
مشهد آخر أيضاً في السوق
زوجه تسير بكامل أناقتها
وتدخل المحل بكل ثقه
ومعها واحد شايل طفل وماسك الثاني بيد
وفي حاله يُرثى لها
مايدري هو يمسك الأكياس اللي معاه واللي يجري ورا الطفل
اللي معه وألا يسكّت اللي بين يديه
وألا يعدّل شماغه اللي شوي بيطيح
وهالحرمه تشتري اللي تبي
وتطلع
تقول للي معها تلقاني بالمحل الثاني
تدرون مين اللي معها
زوجها ..
جايبته بس عشان يشيل أغراضها وينتبه لأطفالها
وهي ( عااادي )
بالله عليكم ( ذا حلال وألا حرام ) ؟
ياجماعة الخير مو عيب ذا ؟
مشهد آخر أيضاً في السوق
فتيات أيضاً يسرن في السوق
وأخذات راحتهن على الآخر
وورائهن يسير شيخٌ كبير وقور ( إنتبهوا ورائهن مو أمامهن ) ..
قد بدا التعب على وجهه من الإجهاد ولفلفة السوق ..
طبعا مايحتاج أقولكم هذا والدهن
يعني المهم ياخذن اللي يبغن
ولافكروا بذا الشايب تعب وألا ماتعب
جاي معاهن خايف عليهن
آآه من هذا الخوف خلاه مرمطه على آخر عمره ..
أمانه معاكم ( ذا حلال وألا حرام ) ؟
مشهد آخر أيضاً في السوق
والله يافي السوق بلاوي
طفل يصرخ ويبكي بشكل غير طبيعي
وإمرأه تُحاول إسكاته وتهدئته أكتشفت أنها الخادمه
وتبغاه يسكت بأي طريقه والولد ماغير على لسانه
( أبغى ماما أبغى ماما )
وأمّه وينها ..؟
بنت هالحلال من محل لمحل
ولاااا من زين الطبايع
كل شوي تناظر على طفلها عشان تهدده
والله ان ماسّكت غير وغير وغير
هذا إذا ماجات وأعطته علقه وقالت يالله صيح من جد ..
وهاااتك ياتهزئ بالشغاله
بالله عليكم ذا حلال وألا حرام ؟
دعوني أخرج من السوق قليلاً
فقد أرهقني قلبي وآلمني والله
وسأدخل في ألم آخر
وسأذهب هذه المرّه لمشاهدات عامّه أراها في كل مكان
ووالله إني رأيت بعضها بعيني وسمعة أخرى بأُذني
أحد الموظفين متزوج وعنده أطفال
بكل فخرٍ يتشدق أمام زملائه
يقول ( لي يومين مدري 3 أيام ماشفت أطفالي ) ..
خير وينهم ؟
ماتدري غير هو يقول والله عند أم المدام .. اسبوع وعند امي اسبوع << عادل ماشاء الله عليه
تخبرون الواحد يجي قرفان عمره من العمل وغير كذا الحرمه تجي من جامعتها طفشانه ولا هي فاضيه لرجّة البزارين .. ؟؟؟؟
المُضحك المُبكي
أن الأم تتصل عليه ( الزوج ) أو عليها ( الزوجه )
لتقول :
يايُمّه والله أولادك تعّبوني وأزعجوني
تعالوا شوفوهم والله الضغط عندي واصل حدّه
وبكل بروده وعدم لامُبالاه
يرد أو ترد على أمهـ / ـا بـ ( يوه والله مو فاضيـ / ـه لهم ) ..
تعبانـ / ـه وقرفانـ / ـه عمري خليهم عندك مو ناقصـ / ـه إزعاج ..
وفي الليل هو وزوجته في مطعم وألا متمشين
وألا جالسين على شمعة مدري وردة حُبنا ..
والأم ياعيني مايكفيها ربّت أولادها وجاء الوقت اللي ترتاح فيه
لا
جتها مصيبه ثانيه ( عيال عيالها )
أبصم بالعشره لو تدري إن الدعوه في النهايه بتطيح على راسها
ماجابت أبناء من أساسه ..
( يعني هالمسيكينه ماتعرف الراحه إلى أن تموت )
بأمانه ذا حلال وألا حرام ؟
إحدى الزوجات ( عندها طفلان تؤامان مع البقيّه طبعا ) ..
تقول والله هالتؤامين كبروا وتعّبوني
وصاروا ملاقيف أذبحوني ماأقدر عليهم
وبكل فخر تُعلنها
لاطفشت منهم أرسلهم على أم زوجي فوق
وبكل سُخريه تُكمل حديثها
( أطلع فوق عندها ألقاها رابطه
راسها من الصُداع .. )
يانااااااااس هذا حلال وألا حرام ؟
مشهد آخر أيضا وأتمنى أن تتحملوني
زوجه تسمع زوجها وهو يسخر من أهلها
ويتشدق بهم بل قد يصل به الحال إلى وصف أباها
( بالمُتخلّف وإنه مايفهم ) وألا يقول على أمها ( العجوز ذي ) ..
وهي كل همّها تقول ( خلاص حبيبي هدّي نفسك ) مايحتاج تزعل نفسك
مافيه شي يسوى ..
وقس العكس بالنسبه للأزواج ..
يامصيبتي أصبح الأهل يندرجون تحت قائمه ( اللي مايسوى ) ..؟؟؟؟
( يعني ألحين هزأ أهلك وماأحترمهم وإنتي تطيبين خاطره وانت يالزوج تجلس تهزأ اهلك وتجلس تطيب خاطرها ؟؟؟؟ )
طيب هالأب مايستاهل أحد يدافع عن كرامته ؟؟؟
ياجاحده ياااااما دافع عنك وعن كرامتك تجين تهينين كرامته عشان رضا زوجك ؟؟؟
ياجاحد ابوك ياااااما تعب عشاانك وعشان يرفعك تجي انت تنزله عشان رضا زوجتك ؟؟؟
أهمس في أُذن كل زوج وزوجه ..
يعني لاتفرحـ / ـين مرّه ترى حتى إنتـ / ـي يـ / تـ / ستخف بك ..
اللي مايحترم أهل زوجته واللي ماتحترم اهل زوجها هذا أكبر دليل على عدم إحترامه لزوجته وعدم احترامها لزوجها ..
( بس انت و إنتي تدارين خاطره وخاطرها ومو داريين )
مشهد آخر
إبن تترجّاه أمّه ساعه تبيه يوديها مشوار وألا مستشفى
وبأعلى صوته يقول ( ماعندك غير أنا والله طفشتوني وزهقتوني
و.. و.. و.. و.. و..
وفجأه يجيه إتصال وماتدري الأم غير وهو يقول
( حبيبتي ثواني وأنا عندك) << زوجته
طيب واللي تعبت عليك هذه
ليش ماقلت لها نفس الكلام ؟
الجنّه ياناس تحت أقدام مَن ؟؟؟؟
الأم وألا الزوجه ؟؟؟؟
نفس المشهد يتكرر بس بطريقه وبشكل آخر ..
أُم زايره أختها وألا رايحه لإحدى معارفها أو صديقاتها
فجأه يقولون لها فلان ( ولدها طبعاً ) ينتظرك عند الباب
وتطير الأم تقول مقروصه
يسألونها خير وش فيك ياأم فلان ..؟
تقول لاوالله مافيني شي بس لو أتأخر عليه
يعصب ( ياقلبي عليه )
ويسرع فيني بالسيّاره وأنا والله أخاف من السرعه
بس لو أنها زوجته تلطعه بالساعات
( ولد أبوه إذا فتح فمّه )
بالله عليكم ذا حلال وألا حرام ؟
مشاهد أخرى من المجتمع ككل
تجلس معها أو معه وتسمعه وهو يقول
والله أحب أزور أصحابي وأصدقائي ماعمري قطعتهم
وأزورهم إذا كانوا تعبانين ويلقوني إذا كانوا بحاجتي
و.. و.. و.. و …
طبعاً أنت أيها السامع أو أيها القارئ
بتنبسط وتفرح وتقول ( أشوا الدنيا لسى فيها خير )
وبنص السوالف ماتدري غير هو يقول
والله لي خال وألا عم والله ماعمري شفتهم ولاأعرف حتى
وين ساكنين ولاأعرف أولادهم
هنا
أنت تُصاب بصدمه وإحباط
تناقض أليس كذلك ؟؟؟؟
شئ آخر أو تناقض آخر
ألحين بعض البنات تكذب على زوجها
وياااكثر ماتكذب
مره كشف زوجها إنها كذابه
وإنها مثلا :
( طلعت من وراه )
وجاء وغلط ومد يده عليها
وزعلت هي وراحت لبيت أهلها
جات تشتكي لأمها
وأعترفت إنها غلطانه
أمها تقولها طيب يابنتي وليش تكذبين
هذا زوجك هذا أبو عيالك مايصير تكذبين عليه
البنت أستغربت
ليش ؟
أنا أقولكم
( لأنها على طول تذكرت لمّا أمها كانت تطلع من ورا أبوها
وتقولهن يابناااات ياويلكن تعلمن أبوكن )
ولمّا يجي الأب والله مارحنا ولاجينا ننتظرك
طيب هذا مو كذب وتناقض آخر عجيب
مثال آخر برضه وماعليش أتحملوني
أهي سيره وأنفتحت
معلم في المدرسه
سمع أحد الطلاب في الفسحه
يلعب مع صاحبه في الساحه وسمعه وهو يقول :
ياحمار وخر عني أو شي من هالقبيل
هنا تثور ثائرة المعلم و.. و.. و.. و.. كيف تقول لزميلك ياحمار مو عيب
( سوري على الألفاظ )
وأهلك ماربوكِ ويجيب العيد في الولد .. أوكي ؟
وطبعا هذا قدام الله وخلقه
ألحين الطلاب يبون يرجعون لفصولهم
يتلكعون واللي مايمشي زين
فجأه يصرخ نفس المعلم بصوت عااااالي
( ياااااحمير بسرعه كل واحد على فصله ) ..
ألحين مين اللي مايربي زين ؟
الأهل أم هو التي أعتبروه الأهل قدوه لإبنهم .. ؟؟
الأهل للأسف الآن يعتقدون أن أبنائهم في أيدٍ أمينه
مادروا أن الخراب الآن يبدأ من ( الأيدي الأمينه )
تنااااقض عجيب والله
ياساده بهذا أكتفي
وعذراً على الإطاله
ولكن هذه المشاهد
وهذه المُتناقضات ..
بين ايديكم
وهي موجوده في حياتنا وبكثره
سؤالي
متى نعيش بشكل صحيح ؟؟؟
وللأسف هذه الأمور موجودة وبكثرة في هذا الزمان
ولو كل واحد انتبه لنفسه وأصلحها لصلحت حياتنا
لكن في ناس مايشين بالحياة بدون اي مراعاة لتصرفاتهم
بدون أي هدف
لذلك أقول ياجماعة الخير انتبهوا
انتم محاسبين على كل كلمة وحركة ونظرة
وهي إما لك وإما عليك
اعذريني حبيبتي عاالاطالة
ومشكورة على الموضوع
وكل انسان مسؤول امام الله عن ها التصرفات ولا تخافين كل شي مسجل في كتاب وكما تدين تدان
رحمنا الله واياك و سخرنا لما فيه خير للجميع ودمتم00:sad: 🙁
الكلام صحيح والمشكله ان فيه ناس عايشين حيااتهم بدون فايده ومراعاة لمشاعر غيرهم
حياتهم بكل اختصار كحياة (البهائم ) عزكم الله .. هذا مارايته انا من واقع مؤلم كثيرر والله اني
اعجز عن وصف الذي اراه من النااس في هذا الزمن اعوذ بالله من هالزمن والنااس
الله يهديهم ويصلحهم
الناس تغيروا كثيييييييييييييييير ماادري وش اللي حصل وسبب التغيير!!
حبيبتي الف شكررررررر على الموضوع الاكثر من رائع وايضا على التذكير
يسلموووووووووو:clap: :clap: :clap: