عملتلكم كيكاية بس طلعت جميلة خالص ماشاء الله
انا اولا بعمل الكيك غالبا بالزبادي عشان يبقى طري ومفيد في نفس الوقت
المقادير:
كوب ونص دقيق
نص كوب كاكاو
3 بيضات
علبة زبادي
كوب سكر
نص كوب زيت…انا بحط زيت عشان يكون خفيف لو حد بيحب سمنة او زبده براحته
بيكنج باودر
فانيليا
مقادير الصوص:
عملته بشوكلاته خام سيحتها في حمام مائي وضفت عليها سكر وحليب عشان تفك…وضفت عليها جيلاتين عشان تبقى ماسكه بعد ماتنفرد على وش الكيكة زي ماهنشوف
الطريقة:
قبل اي حاجه بكون مشغلة الفرن عشان يلحق يسخن
اول حاجه بنضرب البيض كويس جدا جدا مع الفانيليا…على اد مانقدر نهريه ضرب 
بعد كدا بضيف السكر واكمل ضرب…انا بعمل بالخلاط لان المضرب بيتعبلي ايدي والجيش بيقولك اتصرف
بعد السكر بنضيف الزبادي ونكمل ضرب
وبعدها الزيت
نيجي في البولة الي هنعجن فيها بنحط الحاجات الجافة
الدقيق ومعاه البيكنج باودر…والكاكاو
ونضيف عليهم المزيج الي ضربناه
ونقلب في اتجاه واحد عشان مانطلعش الهوا الي دخلناه واحنا بنضرب البيض
هيبقى شكلها كدا
انا عن نفسي بحس قوام الكيكة الاول … مش بعتمد على المقادير وبخليها سايلة شوية…كل ماتكون سايله بتكون طرية وهشة لما تستوى
ولو حسيتها جامده عن منا عايزاها بزودها لبن او عصير بس مش ازودها مية ابدااااا
وده هيبقى شكلها
بكون مجهزة الصينية الاول وداهناها زيت خفيف وارش دقيق بس مش كتير عشان اما اقلبها مالاقيش عليها دقيق من على الوش
اصبها في الصينية واحطها في الفرن
وده شكلها لما استوت
اسيبها تبرد واجي للصوص…حطيت الشوكلاته على النار في حمام مائي ولما ساحت ضفتلها اللبن والسكر لان الشوكلاته الخام مرة…وبعدين ضفت شوية جيلاتين…اولا خلوها بتلمع وتاني حاجه خلوها لما نشفت مابقتش بتتقطع كدا لا بقت بتشد معاكي كدا وانتي بتاكلي كانك بتاكلي جبنة موتزاريلا يعني اخترعت شوكلاته موتزاريلا
ده شكل الصوص
وده الشكل النهائي
الابيض ده كان ايسنج كنت عاملاه لحاجه تانية قمت راشاه عليها كدا خطووط
ودي من جوه عشان تشوفوا طالعه هشه ازاي
أتمنى تعجبكم واول واحده تدخل ليها اول طبق ده
اما نشوف بقى لو عجبتكم وروني الردود والتقييمات الحلوة
كيتى انا مش هتنازل عن طبقى ابعتيه دليفرى اليكس
تسلم ايديك ياقمر شكلها يجنن
انا كمان هاكل عليكي الطبق ههههههههههههه
ما شاء الله تجنن يا كيتي
تسلم الايادي يا حبيبتي
علي فكرة انا منفعش اقيمك عشان لسه مقيمااكي قرريب
هاتي حتة بقي
تسلم الايادى
انا بردو بعمل الكيك دايما بزبادى او رايب
لوتس اتفضليها كلها
والف شكر على التقييم جميل خالص زيك ياقمر
ماشاء الله تسلمي شكلها لذيذ
(¯`v´¯)
`·.¸.·´
¸.·´¸.·¨) ¸.·¨)
(¸.·´ (¸.·´ (¸.·¨¯` ♥♥♥
ان شاء الله اجربها واقلك يا جميله
تسلم ايديكى