أنا ولدي صار له سنتين بالروضة و بسبتمبر بيدخل الثالثة بيكون في KG2
عن تجهيزاتي باخبرج بالشي اللي أقدر عليه…
ملابسه أخذهم من بيت الأزياء.. جوفي أختي العادة في 1 يونيو يسوون التخفيضات 20 أو 25% فأنا أستغل هالوقت وآروح آخذ له مقاس أكبر شوي يكون لو طول في إجازة الصيف على سبتمبر يكونون طوله….
ملابس الرياضة من مذركير مارينا مول آخذ له شورتات وتيشرتات أخذ شورتين وبنطلون أبيض وتشرتات لونهم بعد أبيض سادة اللي لهم ياقة أرتب حق الياهل.. والبنطلون بينفعج لين شوي برد الجو بس ماتحتاجين ثقيل.. اما ملابس الرياضة الشتوية آخذهم أول ماينزلون البضاعة في أكتوبر…
وبنفس الوقت تكرمين أحذية الرياضة واحد أسود حق الأيام العادية والأبيض حق الرياضة من ماركة Dash وايد زينين ويعمرون ويكونون سادة مافيهم خرابيط والأسود مريح ألبسه حق الأيام العادية… وآخذ واحد رسمي حق المناسبات وأيام الأحتفالات… المهم سعر ماركة داش في حدود 5 دينار ,, والسنة اللي فاتت أذكر كان في تخفيضات نهاية شهر خمسة وشريتهم بمقاس أكبر وخليتهم لبداية السنة…
ملابسه الداخلية السنتين اللي فاتوا خذيتهم من مذركير الأصلي بس ماعجبوني وايد وجربت مال السرور BYC للأولاد يعني وايد أحسن…. بس تكرمين الدلاقات مال مذركير الأصلي وايد زينين آخذ شدة لون أبيض والباقي كحلي وأسود..
الشنط واللنج بوكس آخذ له طقمين لأن ولدي من النوع اللي متولع بتجميع الشنط…. طبعا ماشتري قرطاسية لأن كل شي عليهم….
أما عن الأكسسورات وسوالف البنات والله ماعندي فكرة لأني ماجربت بنتي توها أم شهرين…
انا تجربتي قليله في هالمجال لانه بنتي توها اول سنه روضه LKG
بخصوص المريول و لبس الرياضه فاخذه من بيت الازياء لانه ما ينباع الا هناك ومثل ما قالت ختي رانيا شريته شهر 6 لما كان عندهم التخفيض وحاسبت انه يكون شوي طويل عشان يقضيها
شريت لها مريولين وقميصين كم قصير وقميصين كم طويل و للرياضه شريت لها شورتين وفانلتين وتركسوت واحد للشتاء لانه تعرفين شتانا كم يوم واهي كانت شهر 12 كله اجازه
باقي اللبس خذيته في فترة النخفيض يعني الجواريب والملابس الداخليه شي من مذركير الاصلي وشي من BHS
الجواتي الله يعزج شريت لها 2 اسود من ادمز وعالفصل الثاني عدمتهم وشريت لها واحد زياده من شوسيتي
وللرياضه شريت لها ريبوك وابوها جاب لها واحد ابو ليتات الي تحبه من الصين
الشنطه خذيت لها طقم برنسيسات من مذركير و شنطه ثانيه من جواد بعد على اميرات و الثالثه من الفارابي ………>>> بنتي نفس ولد رانيا تحب الشنط
القرطاسيه ما نشتري لانها من المدرسه
الريش والخرز اكثر شي من كليرز
اختي استغلي فترة التخفيضات الي تصير بالصيف يعني شهر 6 و7 وتشري للمدارس عشان لا يصير عليج ضغط بعدين
بخصوص ملابس الرياضة أنا آخذهم من الصيف لأن بعدين المقاسات تخلص.. وبالنسبة للشتوي آخذ في بداية أكتوبر وآخذ بس بدلة وحدة لأن الشتاء قصير مثل ماقالت أم ريم… بس أعتقد هالسنة لازم آخذ الرياضة بعد من بيت الأزياء لأن عليهم شعار المدرسة…
بخصوص مذركير الأصلي بضاعتهم موجودة طول الوقت وتقدرين تحصلينها…