السلا م عليكم
مشكوره اختي على هالكلام والنصائح الرائعه
وهذي المشكله كانت من اهم مشكله ويمكن الوحيده بالنسبه لي
والحمدالله قدرت اعالجها والامور تمام
وراح اكلمكم عن تجربتي لشخصيه
بصراحه انا زوجي كثير الخروج من المنزل يعني معضم ولا كل وقته مع اصدقائه
يعني بختصار يا دوام يا راقد يا مع ربعه
وسهر الين 5 ولا 6 الصبح الفجر
وايام الدوام مو قبل الوحده ولا 2
ولاكن الحمدالله تغير كل شي
وبقولكم االحين انا شو سويت
اولا كلمته بالموضوع وفهمته انه احنا ( انا وعيالنا ) لنا حق وانه مقصر معانا وايد
وما يصير طول اليوم يا راقد يا طالع ما يدري عنا ولا يسال اذا كنا محتاجين شي ومن هالكلام
وطبعا هو اتفاجا وتم ساكت ويسمعني
واستغربت من سؤاله اتعرفوون شو سال ؟؟؟؟؟؟؟؟؟
قاتلي هل انا مقصر ؟؟؟؟؟؟؟
انا اهني انفجرت وصحت وقتله اكيد ومليون بالاميه انت مقصر
والحمدالله ناقشنا الموضوع بهدوء وتفهم كل شي
ووعدني انه يتغير بس مو مره وحده شوي شوي وطلب مني اساعده
والحمدالله الامور تغيرت صح يطلع بس اقل عن اول بوايد
وانا اصلا كنت مطبقه هالنقات لي ذكرتهم الاخت (تسبيحات ) الله يجزيها الخير
ما كنت اعاتبه على تاخيره بالعكس كنت اترياه وانا لابسه ومتعدله
وما كنت ارقد الين ما يرجع كنت اقوله ما اييني النوم من دونك ما اعرف ارقد وانت مو موجود
( وهذا الشي ساعد وايد انه ما يتاخر ) لان ما كنت ارقد الين ما يرجع
وكنت استقبل بكل حراره وشوق كانه غايب عني سنه
وما كنت اعاتبه ولالالا ولا اضايجه اخر اليل بالعكس استقبال اااخر حراره ( مفعوله 100%)
واذ ابي اطلع معاه اطلب منه بس افهمه اني ابي ايلس وياه بعيد عن جو البيت والعيال
جو حلو رمنسي انا وياه بس نعيش لحضات حلوه وكنا نطلع نتسوق ونروح نيلس بمطعم حلو ونسولف ونتغشمر
وبالمره ما اكلمه عن اي مشكله لما اكون طالعه وياااه ( كان تونا مالجين ولا معرسين )
بس ضحك وغشمره وسوالف ……….. وغير البهارات من الكلام الحلووو ولا بوسه ولا احط راسي على جتفه واحنا بالسياره
وحتى اذا بيطلع ما اقوله ليش وليش طالع ومتى بترد
عادي بالعكس اجوف له انضف واحلى لبس واعطره وابخره واخليه يكشخ اخر كشخه
اهتم فيه اخر اهتمام حتى لما يروح الدوام
ولما يرجع يقولي الصراحه اليوم الشباب بالدوام قالولي ما شالله على ريحتك وماشالله محلو اليوم
كل يوم لبس وكشخه
وهوووو ويقولهم حرمتي فديتها مهتمه فيني اتنش من الفير اتبخر ملابسي ويردون يقولون له يا حظك
( اتخيلووو كيف انه يمدحني جدام ربعه وهم يقولون له يا حظك يعني هو مفتخر فيني وهذا دليل انه وايد مستانس مني ومن الي اسويه والسالفه له ايجابيه 100000% )
وانا ضد الحريم الي يرقدون الصبح وقت سيرت رياييلهم للدوام ولا تنش
جوفي وجربي
انا اذا يوم واحد ما ودعته ببوسه عند الباب يلومني ولا يحس اني زعلانه ولا في شي ناقصنه
وحتى الاستقبال نفس الشي
صدقوني ريلي تغير واااايد قم يهتم فينا ما يخليني الحين اسير السوق ولا الصالون روحي هو يوديني
وقام يطلع الصغاريه وياه يوديهم الالعاب غييييييييييييييير غييييييييييير مو مثل اول
وفري لزوجك كل وسال الراحه اهتمي فيه مثل طفلج لا تقصرين وياه بشي
حسسيه انه الاول والاخير
دلعييه حتى النوم اني نيميه
وجوفي شو بيصير
والله يوفق الجميع انشالله
ام عبدالله
تجربة مميزة
بارك الله فييييييييييك
والله يحميكم من العين
اختك عذب القوافي
[SIZE="3"]تشكرين على هدا الموضوع اخت تسبيحات في الاول كان زوجي يخرج وايد لانه عنده اعمال حره يعني الصبح في الدوام والعصر نايم والمغرب الى العشاء في اعماله الحره وبعد ماتخلص منها ولله الحمد سار يقعد في البيت ويطفشني واذا كنت سايره عند وحده من رفيقاتي ماابيه يقعد في البيت ولا ابيه يمسك النت وانا برى البيت[واذا كنت في البيت جالس على القناه الرياضيه وكانها الزوجه الثانيه بالنسبه لي لكن الحمد لله/SIZE]
