سَلَام مُرَبَّع
وَحشتني المَوآضيع ,, وَ وحشتوني آنتم
ترى مُو عوآيدي أنزل الموآضيع بَكير , لذلك ما بعد آشتغل عندي هآجوس السَهر وَ القرقر فكلآمي شَبه قليل لوووووول ,, أرحمكم من مقآلاتي
نَخُوش خَشوشاً بالمَوزوع
[ اللغة العَربية تَشكي ]
كثير نشوف مواضيع مطلوب فيها محاكاة لوصفات طبخ أو مطاعم مشهوره ..
مثلاً أبي وصفه عجين مثل بيتزا هت أو وصفة بسبوسه مثل الطازج ,, وصفة كيك مثل ساريتا ..
بس نادراً مانسمع وحده تبي تحاكي منتج جمالي موجود بالسوق …. من هُنا يبدأ موضوعنا .
على فكرة أنا شخصيه كسوله فيما يتعلق بعمل وصفات للبشرة أو الشعر محضرة منزلياً ومنتجات الـBath, Shower & Body تحتل الصدارة بمشترواتي
وَ إكتشفت ليه أنا كسوله ؟
دائماً إذا جيت ابدأ روتيني بالعنايه وَكانت الوصفه يبيلها تحضير بالبيت ، تلقيني أنوي من الصبح
من ثم اآجل وَ أقول لا المغرب وَ أسحب لين آخر الليل ، وَ أكتشف ساعات إني آكنسل الموضوع كله لليوم الثاني ..
وَ السبب إني أحمل هم تحضير الوصفات ، لكن المسحضرات الجاهزه على طول أنوي وَ أشيلها معي الله يكرمكم للحمام وَ أبدأ شغل
لذلك أفضل المنتجات الجاهزه تكون مَتوفرة عَندي عشان مايجيني يوم أمل من روتين العنايه
في يوم من الأيام خويتكم في الله ، شافت سنفره بذا بودي شوب وجذبتني إنها بالليمون
وشكلها يوحي إنه طبيعي ، شريتها وَ يوم أشم ريحتها مدري حسيت بشعور حلو وَ حنون <——— حلوه حنون
يختلف عن كل المُنتجات إللي إستخدمتها شميت ريحة البيت بهالسنفره ، على طول طلعت فوق راسي لمبه
يعني حبيتها لأنها توحي إنها مُحضره منزلياً طيب يالكسوله !! وراى ماتصلحينها وَ تحاكينها بالبيت
من هنا نشأت فكرة المُحاكاة عندي ، وقلت آوكي راح أحاكي هالمقشر
وَ صارت الدعوه عندي تحدي وَ فعلا حاكيتها وكانت المحاكاة أكثر من ناجحه ، وَ ماكتفيت بهالقدر جربت أحاكي منتجات ثانيه أكثر تعقيد ، وَ ضبطت معي من ثم بديت آألف وَ أزين منتجات خاصه فيني وتناسب بشرتي وذوقي ..
لاتخافون صورت كل شي وَ بنزله لكم بالتسلسل
بنفس الوَقت إكتشفت إن الشغله ممتعه حسيت إني طفله أمها قالتلها تعالي إلعبي بالعجين <—— حلم طفولتها تلعب بالعجين
أتمنى هالفكره تساعد البنات إللي إمكانياتهم ما تساعد يشترون مستحضرات جاهزه من السوق أو ساكنين بمناطق صعب تتوفر فيها منتجات متعدده وَ متنوعه .
وَالوصفه سهله متوفره بكل بيت حتى بأبسط البيوت ، وَ أخترت آحاكي هالوصفه لأنها الأسهل وَمتوفرة بكل بيت ، وان شاء الله القادم بيكون أكثر رفاهيه وَ دلال .
موضوعنا عبارة عن فقرتين ~
فقرة Review للمنتج الجاهز وَ الفقره الثانيه للوصفه البيتوتيه
قبل لا نبدأ فقرتنا أحب أقولكم هالمستحضر أو الوصفه ( المقشرات بشكل عام ) تدخل ضمن روتيني الأسبوعي بالعنايه
يعني أزينها مَره وحده بالأسبوع ، طبعاً تقدرون تصلحونها مرتين بالأسبوع .
وَ مثل ماسبق وَ ذكرت بموضوع الشاور فائدة السنفره
حمام مُلوكي مثالي بأقل من ريال يومياً + السنفرة السويدية اليومية ~
أقروها بالموضوع ، أيضاً بما إن السكر وَ الزيت هُم مكونات سنفرتنا هذي
راح يكون مفعولها جداً جداً ممتاز لعلاج الجفاف في المناطق السميكه مثل الركب وَ الأكواع وَ الجسم بشكل عام
الترطيب راح يدخل لعمق البشره بالأضافة أنه يساعد الجسم عشان يستقبل الكريمات وَ يمتصها بشكل أفضل .
تنَويه ،,
الكلآم إللي فَوق مُهم جداً ,, بتلاحظون أنه للآن ما نَزلت وَ لا وصفة لتبييض الجسم
وَ لا حتى نَزلت شيء دَسم , لأن طالما جَسمك مو مرطب صَح بَعمره ماراح توصلين لهدفك لا للبياض وَ لا للنقاء , فنمشي حبة حبة بخطتنا بالترطيب
نبدأ بـ الـ Review
من ذا بودي شوب The Body Shop
Sweet Lemon Body Scrub | سنفرة الليمون الحلو للجسم
سعر المُنتج : حول الـ 60 ريال سعودي ماذكر بالضبط من زمان شريته .
يناسب : البشره العاديه وَ الجافة
طريقة الإستخدام : يبل الجسم بالماء الفاتر ، من ثم ناخذ كمية من المقشره ونبدأ نفرك جسمنا بحركات دائريه من أسفل الجسم للأعلى باتجاه القلب ، نفرك مع محاوله دعك بسيط ( ضغط ) طبعا ماتقطعون جلدكم كله بالمعقول .
يعني نفرك من 5 لـ 10 دقائق من ثم نشطف جسمنا بالماء زين ، وراح تحسون بشرتكم رطبه للغايه ودهنيه ، بعدها نشفوا جسمكم بطريقة الطبطبه مع ترك الجسم ندي شوي ، من ثم نحط المرطب إللي نحبه .
إِنْتِقَادِي لِلْمُنْتَج ~
حبيته لانه حنووووون خخخخخخخخخخ أقصد فيه ريحة البيت للبنات العجازات إللي يحبون ريحة البيت وَ ماودهم يزينونه
ريحته :
أول مره إستخدمته حسيت إن ريحته مثل معصرة الزيوت ماحبيته كثير الريحه خفيفه مو قويه وَ ريحة الليمون طاغيه وَ منعشه ، المرات الثانيه مدري تعودت صرت آحس بالإنتعاش وَ ماعاد أشم ريحة الزيت مثل أول مره يعني بإختصار ريحه منزليه منعشه مو مثل باقي مستحضرات التجميل .
قوة التقشير :
صراحه ماحسيته يقشر كثير يعني تقشيره بسيط أقرب لمقشر يومي ، مرطب أكثر مما هو مقشر ، بس كترطيب ممتاز بجداره أحسه مثالي للمناطق الجافه وَ بقوه ، ترطيبه يظل بعد الحمام بفتره .
الترطيب :
100% ممتاز لأيام الشتاء أو للجلد السميك ، أول ماتغسلينه تحسين تقولين اووووه جسمي مدهن يعني جريسي شوي ، بس مجرد ماتنشفين جسمك وَ ترطبينه تحسينه عادي مثل شعور البيبي أويل
السعر :
طبعاً سعره مو غالي ، بس لو نجي نحسبها مافيه المكونات الللي تستحق هالسعر ، يعني على مكوناته سعره غالي ، وعلى فكره تراه يخلص بسرعه يعني يادوب 6 إلى 8 إستخدامات على كامل الجسم . ويعيش لـ 12 شهر بعد الفتح
هل برجع بشتريه ؟
عشاني كسوله في حال لو مازينته ، راح آشتريه بالشتاء ، بس مممكن أستغنى عنه ماراح اتقطع من الحسره لو إنقطع من السوق .
تدرون أزين ، أزين مافيه ، انه يخلي الأظافر بيضاء يزيد بياض الظفر بَشكل مَلحوظ
نجي للجد الحين . ونبدأ الشغل .
Yummy Yummy Sugar Scrub
وش رايكم بالأسم الفَني
نحتاج لـ
برطمان نضيف وَ معقم وَ جاف ، ملعقه ، وَ كوب معياري
المقادير ~
كوب سكر ناعم مثل سكر الأسره
لا تسخدمون السكر الخشن راح يجرحكم وَ إللي بشرتها حساسه تستخدم سكر الكسترد لأنه أنعم أو السكر الأسمر .
نصف كوب ( زيت فول الصويا + زيت دوار الشمس ) تقدرون تستخدمون أي زيت تحبونه بس عشان أتقيد بمحاكاة الوصفه إستخدمت هالزيوت .
ممكن تستخدمون البيبي آويل قوامه خفيف بس مانصح فيه كثير لأنه يسد المسام
[ صَحيح ,, البيبي أويل لو لآحظتوا ما كآن موجود بالشآور اليومي هذا له سالفة طويلة بتطرق لها قرَيباً ,, لزوم التَشويق ]
أيضاً تقدرون تسخدمون زيوت المساج الطبيعيه .
أيضاً زيوت الطعام مثل زيت الذره ، أو حتى زيت الزيتون ، ولو حابين ترطيب شديد ممكن تستخدمون زيت اللوز الحلو .
من الزيوت الخفيفه اللي أحبها زيت الكانولا خاصه للي بشرتهم دهنيه هو الأنسب الخيار مفتوح لك
ملعقه طعام بشر الليمون ( أحبه طازج )
ملعقه لملعقتين طعام عصير ليمون طازج ( اختياري )
5 حبات جوز ( عين الجمل)
ملعقه طعام روح الليمون ( نكهة الليمون )
طبعاً من المفترض تستخدمون عطر الليمون بس بما إن الزيوت العطريه الأصليه نادره عندنا بالأضافه الى انا نبي نتجنب العطور لأنها ممكن تسبب حساسيه ، فالشغلات اللي تؤكل أفضل
للي يَحبون الآسئلة نَوته مَخصوصة ,,
زيت فول الصويا وَ الكانولا أشتريه من التميمي وَ موجود بالدآنوب بعد
روح الليمون بعد موجود بجنب الفانيلا , والسكر الأسمر و سكر الكآسترد موجود عند السكر العادي
لوووول خلاص !! أتفقنا عشان ما يَطلع سؤال
مُلاحظة ~
المقادير ممكن تتغير حسب حرارة الجو بالإضافه حسب نوعية السكر وَ الزيت
على فكرة أنا زينت ثلث الكميه ، وَ الوصفه ممكن تقعد معك من أسبوع لإسبوعين بالثلاجه ، بس لو حابه تصلحينه وَ يدوم لك لمدة شهرين ، إبتعدي عن اي شي فيه سوائل ، وَ إستخدمي قشور الليمون المجففه بدل المبشوره ، وَ ايضاً خليه بالثلاجه .
الطريقه ~
نبدا بوضع المواد الجافه ,, السكر
ندق الجوز زين ، حاولو تكون الحبات متساويه ، عشان مايخدشكم الجوز ، وَ عالعموم الجوز ناعم حبيباته ناعمه عالجسم
نضيف الجوز وَ بشر الليمون وَ نخلطه مع السكر زين لين تتوزع الذرات بالتساوي
نضيف الزيت ، ونخليه لين يركد عشان نعرف إذا الكميه مناسب أو لأ ، نخلط السكر بالزيت بحيث تتشرب حبيبات السكر الزيت وَ ضروري تغمره .
نضيف روح الليمون ، وَ عصير الليمون الحامض وَ نخلط
وهذي خلطتنا جاهزه ، وَ تذكروا لازم السوائل تغمر السكر بقليل .
هذي مُقارنه بين الأثنين
عاليمين Sweet Lemon Body Scrub
وعاليسار Yummy Yummy Sugar Scrub<——– مَصدقه الأسم
وش ميزة وصفتنا المحضره منزلياً !!
إستخدمنا ليمون حامض بدل الليمون الحلو ( ينقال متوفر الحلو عندنا ) ، عشان الأحماض تساعد على تكسير روابط البروتين في البشره ( اللي تربط الجلد الميت ) فتساعد على انها تتقشر بسرعه
[ يلي يستخدمون الليمون بالخلطآت وَ غآفلين هالشيء آستوعبوا ]
بالإضافه الليمون يساعد على التفتيح ،ايضا قشر الليمون غني بالزيوت العطريه الطبيعيه ، إستخدمنا عصير الليمون كإضافه و لا المنتج مافيه عصير الليمون يعني تقدرون تستغنون عنه .
أيضاً السكر هو الذرات اللي بتساعدنا على الفرك وَحمض الجليوكوليك اللي بسكر القصب راح يساعدنا على التقشير أيضاً .
المنتج الأصلي فيه قشور الجوز ، وقشور الجوز قاسيه عالبشره ، فاستبدلته بالجوز المطحون .
حبيت المُنتج اللي زينته أكثر من الجاهز <—— مادح نفسه يبيله رفسه
ترطيبه أفضل ، تقشيره أقوى من ذا بودي شوب ، خالي من المواد الحافظه والكيميائه , وَ رخيص
مُلاحظه||
إنتبهوا تستخدمونه على الوجه لأن السكر قاسي .
المقشر دبق شوي ، في إللي تحسه مزعج على جسمها ممكن تستخدمه بس للإدين وَ الأقدام وَ الركب وَ الأكواع . وكل المناطق الغامقه بجسمها .
المقشر بما أنه دبق راح يوسخلكم البانيو وَ إنتبهوا وَ أنتم تفركون ممكن تزلقون لانه زيت
آتمنى آكون وَفقت بالمُحآكاة ,,
دُمتم بَحب
.. مشكوورة عالنقل الراائع 