شفت الجو كله شكاوى في القسم واللي يدشه تنسد نفسه من اليهال ويقول بس ما بييب يهال ههههههههههه فقلت اكتب هالموضوع وان شاء الله القى تجاوب منكم
المهم هذا الموضوع حبيت اتعرف من خلاله على اهم التغييرات الايجابية التي حصلت لك شخصياً وللعائلة بعد قدوم طفلك..
شخصياًَ.. بعد قدوم ولدي لاحظت على نفسي اني صرت اكثر انضباطاً..
يعني ما انام وخلي الاولي والتالي يولي.. بالعكس صرت منظمة اكثر .. انام بموعد محدد والاستيقاظ كذلك.. وطبعاً الهدف كان اني اربي ولدي على ذات الصفة عشان نرتاح جميعاً بالآخر..
بعد لاحظت اني صرت اكثر اهتماماً بعائلتي الصغيرة، وصرت استانس اكثر وانا اسوي العشاء لنا ثلاثتنا.. احس اننا عائلة فعلا وان كانت صغيرة…
صرت اهتم اكثر للادوية.. احفظ اسماءها واعرف مكوناتها واسماءها التجارية ودواعي استعمالها..
زوجي صار يشتاق اكثر لنا، ويكثر من اتصالاته في حال مرض الولد، احس لما يدخل البيت ويشوفنا انه تنشرح نفسه اكثر من قبل..
علاقتي بعمتي ازدادت متانة ، وصار الحديث عن حسون محور الكثير من احاديثنا، والحمدلله عشان ما تحط بالها على الاشياء الثانية…
كونت لي علاقات باللي عندهم يهال بنفس ظروفي، وحتى بعض البنات اللي ماكان عندي موضوع عشان اتكلم معاهم فيه .. صار الحين عندي خوش موضوع..
وانتوا؟ شنو التغييرات الايجابية اللي لاحظتوها بعد قدوم البيبي؟؟
انا للحين ما جربت ……. ان شاء الله قريب واوعدك ارجع افتح الموضوع حتى لو بعد كم سنة !!
بس حبيت اشارك بتجربة ولادة امي باختي الصغيرة من مليون سنة … قصدي 8 سنوات
هي الحين في الصف الثاني الابتدائي
بس فديتها دلوعة البيت وجت بعد انتظار 8 سنوات لأن الوالدة الله يخليها تحب الفرق الكبير بين كل واحد فينا
المهم امي كانت مرة تعبانة طول فترة الحمل وبعيد عنكم وعن السامعين شافت الموت ووصلت له ( كل ما اتذكر اخاف زيادة ) المهم الله لايعيدها من ايام
اذكر اول ما عرفنا ام امي ولدت وجابت بنوتة بغينا نموت انا وخواتي من الفرحة
على طول سميناها (( منار )) لاني من أول قلت لامي انا بسمي البيبي عاد ولد او بنت لأني أول العنقود وهو آخره
شعور مايوصف … بس بعدين رحنا المستشفى وامي تصيح تقول ان البيبي تعبان والدكتور نادى ابوي وابوي رجع يصيح !! شالسالفة
بعد السؤال قال الاخصائي ان منار في العناية المركزة واذا عاشت هالثلاثة ايام بتعيش غير كذا … الله يعين
المهم ان البنت عاشت بعد معاناة طويلة لانها انولدت مريضة بسبب مرض امي طول فترة حملها
اول يوم طلعت فيه من المستشفى بعد فترة طبعا من ولادتها امي صارت غير حتى انها كانت لمن احد يزورها ما تقدم الشوكولاتة تقول اذا قامت بنتي بالسلامة وذاك اليوم صرنا مثل المهابيل
امي توديها الحمام تسبحها اول مرة في البيت كلنا حواليها حتى ابوي واللي يبي يلمس يدها
واللي يقول يبي يحملها
كانت مرة صغيرة كيلو ومئتين غرام
حياتنا تغيرت
اول اسبوعين تخيلي كلنا صرنا ننام في غرفة امي وابوي !!!!!!!!!! وأول ما تصحى من النوم وتصيح كلنا نقوم صرنا نجلس دائما مع بعض ونصحى معاها وننام معاها … يعني مشتنا على كيفها
ما اقدر اوصف شكثر غيرت في حياتنا وللحين هي دلوعة البابا والماما وكل البيت بعد رغم انها كبرت وصارت شيطانة
لدرجة ان ابوي تقاعد بسببها يقول هو تعبان من الدوام والمشاوير والحين ما يقدر يستغني عن منور !! والكل استغرب لانه تقاعد بدري مرة .. غيرت كثير صرنا اول ما نشوف ملابس بنات نشتري بدون تفكير .. نبي نطلعها معانا كل مكان ..نلعبها
امي المسكينة ما تشيلها كثر ما احنا نشيلها
ما أدري شوي واصيح وانا أتذكر ايام ولادة امي … طولت عليكم بس حبيت اشارك في موضوع مشرفتنا الحلوة
يعطيكم العافية وبانتظار مشاركاتكم
RoOoOmy، أثرت فيني قصة أختك الصغنونة، الله يخليها لكم، وعقبال يارب ماتكتبين قصة ولدك أو بنتك..
عن تجربتي الشخصية،،، عبودي غير مجرى حياتن بالمرة،، اول ماتزوجنا وبسبب ظروف عمل زوجي بالنوبات، مستحيل كنت أجلس لوحدي بالشقة ماكنت أرجع إلا لما يكون هم موجود، بس بعد ولادة عبودي أستقرت حياتناـ وبدينا نطبخ في البيت ونجلس مدة أكثر، حتى الثلاجة المسكينة صار فيها أكل، قبل يخترب ونكبه ومحد ياكله…
بديت أحس بالمسئولية أكثر ، مع أني كنت حاملتها من يوم كنت بنت في بيت أهلي لكوني أنا البكر ومسئولة عنهم، ادرسهم، بعد ما خذيت رخصة السياقة أطلعهم وأسوي أشغالهم، بس حسيت بالمسئولية أكثر.
في السابق زميلاتي بالعمل يتكلمون عن عيالهم وين راحوا ، يغيبون لأن عيالهم مرضى، آته ماعندي شي، بس الحين آقدر آشاركهم نفس الأفكار…
بوعبدالله طبع تغير 360 درحة، أول كان يطول مع أصدقائه بالطلعة الحين لا يكون معانا غالبية الوقت ويقضي الوقت كله معاه ،، يرتب لنا طلعات مع عبودي …
أهل زوجي ،، طبعا زادت العلاقة أكثر وأكثر، وحسيت أن زادت قيمتي عندهم وخصوصا اني جبت ولد….
المهم البيت مع عبودي صار أحلى وأحلى..
طبعا المطلوب في الموضوع هي التغيرات الايجابية لكن انا بتكلم بشكل عام " ايجابية وسلبية "
بعد الولادة اول تغيير هو في نمط حياتي ككل ، وقت النوم ومدة النوم والتعب اللي صادفني في ذيك الفترة ، لما داومت في الجامعه اول مرة بعد الولاده كنت قاعده هناك واحس اني ولدي واحشني موووووووووووت خصوصا ان وقتها كان دوامي من الصبح للعصر وكنت اطلع صورته وقت البريك واقعد اصيح لانه واحشني ..
واتذكر اول اول تغيير لاحظته هو بعد ما رديت شقتي وكنا بنطلع بنروح بيت ابوي العود لان متعودين نجتمع هناك كل يوم خميس ، قبل ما اولد كنت اتغدى مع زوجي واقوم اتجهز ونمشي بيت ابوي العود بس بعد الولاده صار لازم اجهز ولدي واجهز شنطة اغراضه وبعدين اتجهز ونمشي وصرت اتأخر في روحتي هناك .. حتى وقتها علقت وقلت الاول كنت خفيفة بس الحين ….!!!!!
بالنسبة للتغييرات الثانية طبعا حسون شال شي اسمه ملل من حياتي " في الاجازات " وصار شاغل وقتي كله وقبل ما اولد كنت اصيح من الملل خصوصا ان زوجي دوامه للمغرب يعني كنت اقعد طول اليوم تقريبا بروحي .. بس حسون شغلني معاه وصرت اتمنى يصير عندي وقت فراغ عشان اتفرغ حق نفسي .. حسيت بعد ان قدوم حسون غير من زوجي وصار مفرفش ويلعب مع حسون ويضحك معاه ، ولما اقعد مع بيت عمي صارت عندي مواضيع اتكلم معاهم فيها ..
واذكر بعد لما كان ولدي صغير كنت اقول متى يكبر ويقعد معانا على الوجبه او يقعد صوبنا واحنا نطالع التلفزيوم ولما نروح مطعم كنت اقول متى يكبر ويطلب هو بعد اكله يحبها وكذاا .. وطبعا اول ما كبر وبدا يقعد معانا على الاكل كنت فرحااااانة انا وزوجي وكل واحد يبي يأكله وحتى في المطعم كنا نحس بمتعه واحنا ننقي لولدي شي ياكله ونقعد نأكله ..
وفي تغيير شخصي صادني الا هو اني قبل ما كنت اهتم بالاطفال بس الحين استانس لما اشوف بيبي صغير توه والدينه وافرح لما اسمع ان وحده من الاهل حامل واقعد اسألها عن الحمل وتعبه والولاده والسهر واسترجع بعض الذكريات لحملي وولادتي ..
ومن التغييرات اللي صارت لي هو اني قبل لما اروح السوق اروح دايركت حق المحلات اللي فيها اشياء تناسبني وما اقرب لمحلات الاطفال واغراض الاطفال .. لكن الحين العكس .. حتى من غير مناسبة احب اروح اطالع محلات الاطفال واشتري حق حسين يعني ما يمر اسبوعين الا وعنده غرض جديد .. وفي المناسبات " الاعياد مثلا " ما اشتري لي شي الا لما اكمل اغراض ولدي ..
وعلى فكرة .. انا من الحين افكر في مستقبل ولدي ، دراسته وتخصصه وشغله وزواجه ووو….. <<< مستعجله
والحمد لله انا الله رزقني ولد جميييل وملفت للانتباه بوسامته وحركاته وتصرفاته ومن اروح مكان عام لازم ياخدونه ويلاعبونه ويصورنه وكذا مرة يخطبونه مني:dd: .. واخر مرة من اسبوع تقريبا وحده تقولي تعطيني ولدج اربيه ولين كبر اعرس عليه هههههههههه
والحمد لله بعد في نقطة ثانية .. يوم كنت حامل كنت افكر اذا كنت بعرف اشتري شي حلو للبيبي من لبس واغراض ، كنت خايفه يطلع مبهدل بس الحين الحمد لله كل يقولون لي ان ذوقي حلو في اختيار لبس حسون خصوصا ان ولدي طويل وجسمه حلوو وكل شي يلبسه يطلع عليه حلووو
طولت عليكم … السموحه:o
شكراااااااااااا
RoOoOmy_M
الله يرزقك بإذنه وبذكرك ان شاء الله بوعدك…
عن جد قصة قدوم اختك مؤثرة، ضحكتيني لما قلت انها مشتكم على كيفها كلكم..
الله يحفظها لكم ويبلغكم فيها..
ويبلغك في نونو صغير في حضنك يا رب
الحمدلله انك تقّرين وتحمدين الله على نعمة الولد…
للأسف بنات وايد اعرفهم كلا على لسانهم التذمر…
من تسألينهم اشحالك مع الامومة مباشرة الجواب:
اف ، تعب!
والله الامومة احلى شيء بالدنيا، والله يهنيك بعائلتك الصغيرة…. ويزيدها واحد السنة الياية 
وما شاء الله الرضا باين عليج من طريقة كلامج عن حياتج مع ولدج..
اي والله ذكرتيني بالسوق… انا بعد ما اشبع من المشترى لولدي، وكل ما ارجع البيت يأنبني ضميري…
ولدي راح يكبر بسرعة وخسارة هالثياب بتروح ما لبسهم غير لبسة او ثنتين…
مادري هذي يعتبر تغيير سلبي او ايجابي، بس صرت وايد اصرف وما اتم في يدي فلس ، الاول اغصب روحي واقدر
بس الحين خلااااص ما اقدر !
الله يخلي لج حسين وتشوفينه معرس ان شاء الله..
السلام عليكم و رحمة الله و بركاته
شو هالموضوع الروعة…تسلمي أختي أم حسين 
راح أتكلم عن نفسي…
اول شيء…كل محلات الأطفال في أبوظبي إستنفعت مني بشكل رهيب…طول ما أنا ماشية اشتري في ملابس و ألعاب…و بنتي دولابها صار أكبر من دولابنا..قولوا ما شاء الله
ثاني شيء…بطّلت القلق الرهيب اللي كان عندي من تأخر الحمل…و صار زوجي يقول لي…الحمد لله إرتحت شويه من قلقك كل شوية ليش ما حملت
ثالث شيء…ملأت كل وقت فراغنا…و صارت طلعاتنا و خروجاتنا لها معنى…و فيها حياة…
صرنا نحب نرجع البيت علشان نتجمع و نقعد معاها…و نراقب كل يوم إيش التغيرات اللي صارت فيها…و صار في بيني و بين أبوها حوار و مواضيع كثير…عليها طبعا…
مثل ما قالت جمانـــــة…صارت أغلب مواضيع أهل زوجي عنها…بالتالي صرفوا نظر عن أشياء ثانية 😎
و الحين لو بقول الأشياء السلبية ما بخلص….كفاية
عقبال الجميع يا رب يا رب…نشوفهم أمهات و نفرح بعيالهم إن شاء الله (f)
فعلاً الموضوع حلو ،،
وصراحة مؤثر ،،
أنا الحين حامل بطفلي الأول ،، اسأل الله دائماً أن يتمم علي حملي ،، وتبدأ التغييرات
بس الحين بدأت تغييرات علي والإحساس بالمسئولية تجاه طفلي مع انه في بطني
بدأت فعلاً أحاول أتغذى زين ،، لأن سابقاً يعني عادي لو ما كليت ،، الحين أحس اني أكل غصب
أشرب حليب،، منتظمة تقريباً على الحديد والفوليك أسد مع اني قبل عادي اطنش الدوا ،، كل
عشان اللي بطني ،،،
بالنسبة لراحتي أنا من النوع اللي حامله كل المسئوليات على راسي ،، صراحة ابتديت أحاول قدر الإمكان أخفف وأقلل من شغلي ،، لأني فعلاً أبي أحفظه ،، واسأل الله ان يحفظه لي ..
حتى زوجي أحس ابتدى يفكر يشلون يأمن مستقبله ،، وابتدى أحس في نزعة الأبوة تزيد ،، مع ان أدري ان يموت على اليهال ،، بس أبداً ما حسسني ان خاطره في ياهل ،، الحين استانس لين حب يكلمه .. مصدق يسولف مع ولده
الحين بدينا نتكلم على طريقة تربية الطفل …
في أشياء حلوة حقيقة بديت المسها وانا حامل
رغم التعب والإرهاق اللي صايدني من الحمل
والحمدلله على كل حال
والله يرزق المحرومات هالنعمة ،،، ويحسون بالتغييرات
وأشكر الله على هالنعمة واحمد حمداً كثيراً
الحمدلله ان قدوم مريم كان بشارة سعد عليكم انتي وزوجك..
الله يخليها لكم..
ومثل ما قلتي من حسناتهم صرف النظر عن الاشياء الثانية