[SIZE="4"] [SIZE="5"]سبحان الله ربي فطر المرأة على عاطفة الأمومة والحنان
والرحمة، ولو نفتكر من يوم مااحنا صغار وكانت عندنا عرايس صغار ونعاملهم زي كأننا من جد كبار
ونهتم بأكلهم كدة ، وتمر السنين ويتحول الحلم لحقيقة و واقع ومن يوم مالأم تعرف بحملها تبدأ
تتجهز للمولود وتفرح لو وبمجرد مايجي للدنيا تجي معاه السعادة والفرح وتبدأ الأم بالاهتمام بيه
ويكبر الولد ويصير شاب يافع والبنت تكبر وتصير شابة وكلها حيوية وجمال فالأم هنا تعتبر إنو دورها
انتهى وتخلي البنت والولد على راحتهم وبعدين تصير كارثة ومصيبة بجهل منهم وتصير مشاكل و
خراب لبيوت كتيرة .
أنا اللي قصدتو من المقدمة هادي إنو للأسف في أمهات همها إنو طفلها يكون تمام و صحتو كويسة
و مؤدب ويسوي اللي عليه ويأدي واجباتو، لكن ماقد فكرت إنو لكل مرحلة عمرية خصائصها وتفكيرها
بعضهم يقلك كلام فاضي وماأدري إيش ونفس الأسلوب مع طفل عمرو 10 سنين و بنت شابة
عمرها 20 سنة بالله عليكم هيا كدة التربية وهيا هادي الأم اللي قالوا عنها الشعراء الأم مدرسة
والأم أول كلمة نطقتها بلساني، يعني هادي رسالة أوجهها لكل أم عندها أطفال أو لكل من حتصير
أم قريب ترا والله احنا في زمن يخوف والانفتاح كل مالو يكبر وصارت المغريات كثيرة وسهل انو العيال
يتأثرو وينجذبو لها عشان كدة أتمنى منكم يامن أنعم عليكم ربي بهذه النعمة الكبيرة حاولو تحتوا
عيالكم من دحين وكونو لهم أكتر من أصحابهم ، دحين ليش كترت حالات هروب البنات وليش كتر
الطلاق وليش كترت مكالمات البنات للأود،لأنو مالقيوا من أهلهم من يحتووهم لكن لقيو أصدقاء
سوء احتووهم حتى لو كان من احتوائهم هدف خبيث لكن في النهاية الإنسان يتأثر باللي يكون
نفس افكارو وتوجهاتو وكثير من عيال الحرام يفهمو النقاط هادي عشان كدة ينجذبو لهم العيال،
لاتقولوا فارق السن وماأدري شي كتب علم النفس ياكترها وأبدا مو معناتها إنك جامعية ومثقفة إنك
تقولي حعرف أربي عيالي أحسن تربية ترا أبدا التربية مو بالسهولة اللي تتخيلوها لو تبغو عيالكم
أحسن ناس حاولو تفهمو كل المراحل العمرية اللي يمرو بيها حاولو تغمروهم بحنانهم وحبكم وقربكم
منهم حاولو إنك تهتمو بتفاصيل حياتهم لانكم ماسويتو هادي الأشياء في مين يسويها بدالكم لكن
حتكون النهاية مأساوية، لا تحطمو قلوبهم حسسوهم بأهميتهم و ربوهم على المسؤولية
وحسسوهم فعلا إنو هما هدية من ربي لكم ولاتحسسوهم إنهم هما سبب تعبكم وخسارتكم ترا
والله يتأثرو وفي الأخير ينحرفو الله لايقولها ونجي ندعي عليهم طيب انتي لو من الأول اهتميتي بيه
وبعواطفو ومشاعرو كنتي أول وحدة تشاركيه أفراحو واحزانو ولو ماتقدرو على كل هادا أقلها خلوا
أسلوب الحوار لغة تفاهم رئيسية عشان تفهمو أفكارهم وهما يفهمو أفكاركم وحاولو لمن تختلفو
في شي تبينوا لهم الأسباب والدوافع ترا التربية موضوع كبير أكبر من إني أربي ولدي على الصلاة
وكيف يقرا قران وهوا يصلي مايحس بروح في الصلاة ولا إيمان.
:
موضوعك قيم يا بائعة الورد الكادي
هذا ما نفتقده في زمننا
الحوار ومصادقة الأبناء
جزاك الله خيرا
~
°•◦● ₪ °•◦● ₪°•◦● ₪
جاري التقييم ..
وخصوصا البنت
والله يعطيكِ العافية
و خصوصا في هذا الزمن اللي اختلفت فيه مقاييس التربية بأختلاف الانفتاح الموجود
ربي يعيننا على تربية اطفالنا
اللهم لا تذرني فردا وانت خير الواثقين