احسنوا النيه وصفوا قلوبكم لايصيرلكم مثل اللي كتبت عنهم

حبيباتي اليوم جايبه لكم موضوع ان شاء الله ينفع في بعض الحريم اللي يالله لك الحمد بس ((يبقى المعنى في قلب الشاعر ))
تأملوا هذي الكلماااااات
((على نياتكم ترزقون )) ترزقون ترزقون ياحريم ترزقون ترزقون يعني الرزق مرتبط بنيتك يا ابن ادم احسنوا النيه تكفون احسنوا النيه بقولكم قصه ابو زوجي

ابو زوجي يابنات ما اقدر اوصف لكم قد ايش هو جباااااااااار وظااااااااااالم ومتوحش ويبطش يبطش في العالم حسبي الله ونعم الوكيل وكان دايم يقول والله لو عندي فلوس كان سويت بفلان وفعلت بعلان والله اذا جاتني فلوس لااسوي واهدم وافعل والله اول ما تجيني مكافأه لااحط في فلان واسوي بفلان سبحان الله وكان بيتقاعد ومستحقاته كانت تقريبا 900 الف او مليون تقريبا وعشان نيته الشينه وقلبه الاسود ولانه كان ناوي يأذي خليقه الله سبحان الله صارت له مشكله في عمله وطردوه واخذوا مستحقاته ماعطوه ولا ريال سبحان الله على نياتكم ترزقون
عكس اخوه كان دايما في حاله ماقد اذى احد ولا قد ضر احد لدرجه انه اذا جاء البيت متأخر عن العشاء مايصارخ ويقوم الدنيا مثل ابو زوجي لا كان يجلس على السفره وياكل البقايا وسبحان الله جاه رزق فلوس سبحان الله اشترى اراضي وعمارات وبيوت الله يرزقنا وياه سبحان الله على نياتكم ترزقون

القصه الثانيه قصه واحد كان دايم يقول اذا تزوجت وجاني عيال على طول من يجي عمره 16 سنه بطرده من البيت خليه يعتمد على نفسه سبحان الله وتزوج وجاته بنت ثم بنت ثم بنت ثم بنت ثم بنت وكان دايم يقولهم والله لو انكم عيال كان طردتكم برا البيت لكن انتو بنات غصبن عني تقعدون في البيت موب عشانكم عشان كلام الناس وسبحان الله خلفته كلها بنات ويوم كبر بالسن ومرض وتعب ولا عاد صار يقدر لايهش ولا ينش من قله الصحه رزقه ربي بالعيال بعد الكبر والتعب والشيب اللي نزل عل عيونه سبحان الله على نياتكم ترزقون

بقولكم سالفه تضحك مره كنت معزومه عن وحده وسألتها مين بيجيك قالت بس انتي قلت اوكي اتاريها متفقه مع حمواتي من وراي تبي تعزمهم عشان يقهروني باللبس والشياكه وانا ياغافلين لكم الله والله مدري عن شي ولا هموني والله لو يلبسون ثياب من ذهب لاني عندي قناعه بنفسي ومتاكده ان خلق الله حسن لكن هم مساكين متحمسين يبون يقهروني ورحت للعزيمه وتفاجأت بوجودهم لكن مشيت الموضوع وقعدت اتقهوى واسولف وبعد فتره شفت حماتي وقالت لي انتي ذاك اليوم في عزيمه فلانه كنتي جنان كان شكلك متغير وكنت روعه وش كنتي مسويه ؟؟ وانا والله مادريت انها تبي تقهرني اثاريني قهرها وانا مدري مع اني كنت متفشله من لبسي لانها قالت محد بيجيني ولبست لبس عادي لكن الحمد لله جاوا يبون يقهروني وانقهروا مني سبحان الله على نياتكم ترزقون

بقولكم قصه وحده الله لايبلانا ولا يقسي لنا قلب
في بنت كانت دايما تغار من بنات عمتها وماتحبهم وتغار منهم وفي ذاك اليوم جات العمه للبنت هذي اللي تكره بناتها وقالت لها يابنت اخوي انا بنتي انخطبت وابيك تروحين معي اقضي لها لاني اثق في ذوقك قالت البنت طيب بروح معك وهي من داخل تغلي من الغيره والقهر وراحت مع عمتها للسوق وتقضوا واشترت كل شي من الشراريب للفساتين للمناشف للذهب كل شي كل شي حتى غرفه النوم والمطبخ والصحون والمفارش كل شي اختارته لها وكانت هذي البنت الحقود تقول انا اخترت لها كل شي بايخ اي شي اشوفه اختار لها اسوء وابشع واخيس حاجه اخترت لها من غرفه النوم ابشع غرفه ومن الملابس اسوء لبس ومن العطور اخيس عطر ومن كل شي اسوء شي ولما خلصت العمه التجهيز قالت لها يابنت اخوي انا ابيك زوجه لولدي وهذا الجهاز كله لك مو لبناتي وتفاجأت البنت وانصدمت بعد ماعرفت ان اهلها موافقين ومتفقين مع العمه على كل شي وتزوجت البنت وراحت لبيتها ولبست ملابسها البشعه ونامت في غرفتها البايخه وقالت لو كنت ادري ان لي ما اخترت كذا كنت احسبه لبنات عمتي عشان كذا اخترت لهم الشين سبحان الله على نياتكم ترزقون

احسنوا النيه ترا كل واحد على نيته اللي نيته شينه بيرزقه الله على نيته الشينه والعكس صحيح

انا بقولكم قصه تانيه مره كنت مع وحده في مشغل نبي نقص شعورنا وجيت قلت لها شرايك اي قصه اختار جات هذي البنت واختارت لي قصه ويوم قصيتها طلعت تجنن وتفاجأت يوم رجعنا البيت انها تعترف لي وتقول انا اخترت لك قصه مو حلوه واخترت لنفسي احلى قصه لكن قصتك طلعت احلى من قصتي وكل الناس اعجبتهم قصتك بس قصتي ما هي حلوه سبحان الله على نياتكم ترزقون

احسنوا النيه ياحريم احسنوا النيه اعرف بنات كثير يفصلون ملابس وفساتين بالآف بس عشان تقهر فلانه وعلانه وسبحان الله يخرب الفستان او تطلع ابشع وحده في المناسبه

ياربي عفوك ورضاك بعض الناس نياتهم اعوذوا بالله

في وحده راحت لساحر تبي تسحر زوجها وسبحان الله انقلب السحرعلى الساحر يوم شافها الساحر اعجبته قام سحرها هي وصارت مثل الخاتم بأيده

في وحده اعرفها كانت متأذيه من اخوانها واهلها وكانت دايم تقول والله اذا تزوجت ما اجيهم ولا اطب عليهم والله اذا تزوجت ما امر من شارعهم والله اذا تزوجت ما ادخل الحاره اللي ساكنين فيها وسبحان الله تزوجت مرتين وتطلقت سبحان الله على نياتكم ترزقون

عمي ابو زوجي كان يحب وحده من بناته ودايم يقول فلانه مابزوجها الا ب120 الف او اكثر ما راح اخذ فيها مهر قليل لا ابسوي لها زواج ماصار ولا حصل وبسوي لها وبفعل لها وما راح ازوجها اي احد بزوجها من عيال الشيوخ واستغفر الله اللهم لاشماته خذت شايب اكبر منها ومتزوج وعنده عيال متزوجين وعندهم عيال وسبحان الله تزوجت بمهر 20 الف وبدون زواج وبدون عشاء ولا شي سبحان الله على نياتكم ترزقون

ياربي عفوك ورضاك احسنوا النيه ياحريم احسنوا النيه

ودمتم