كيف الحال إن شاء الله بخير
أنا لي شهر ونص تقريبا مخلصه الاربعين والجسم ياسلام وانا زايدة مع الحمل 15 كيلو وانا في
الاساس فيني حقي من الزوايد……
بس زاد مع الحمل والنفاس وانا ادور على حل سويت رجيم وقل الحليب لاني ارضع وحاليا اكلي عادي
وممتنعه عن الحلويات والرز والمقالي ونادر ما اكل الا اذا كنت عند احد واول ما ارجع اشرب شاي اخضر
بس ماحسيت نقص من وزني ولا نص كيلو وبصراحه تحطمت وضاق صدري وقالوا لي عن الإبر الصينية
انها تنحف في الشهر 3 كيلو وفيه من نصحني اشترك بنادي واحترت
وحبيت اشوف وش رايكم وش تنصحوني فيه……
الإبر الصينية من جربتها وكيف النتيجة وكم المدة اللي استخدمتها ؟
وسمعت انها توضع في الأذن صحيح هالكلام؟؟ أو انها ابر توضع في الجسم مثل اللي
يعالجون عن الروماتيزيوم وغيره؟؟ وكيف احطها اخليها دائما في اذني او وقت معين بس؟؟
وش الأفضل الإبر الصينية أو الاشتراك في نادي و ليش؟؟
وياليت ماتطنشوني وتردون علي………..
ومشكورين وجزآكم الله خير مقدماً………………………………….
الغالية انا اشتغلت اشتغل في مركز أبر صينية ..
وشفت كل شيء جدام عيوني والله
الابر تنزلج لكن بدون نظام غذائي ورياضة مايكفي ..
———-
بقولج شو البرنامج بيكون بالضبط
** أول شيء بيبدون معاج بأبر في جسمج .. عبارة عن ابر طبيبة مافيها شيء بس بيحطون الابر على جسمج .. ممكن أنتي تحددين أماكن السمنة((اللي تريديها تنزل)).. وبيحطون الابر عليها ,,
** وبيخلوج مدة نص ساعة تقريبا أو ساعة الاربع والابر عليج.. وممكن تربط الابر بجهاز كهربائي يعطي ذبذبات..
**** بعدين بتشل الابر .. وبتعطيكي نظام غذائي عادي خفيف..
*** وبتحط لج نفس اللزقات على أذنج .. هذي فايدتها ماتخليج تجوعين .. بس
*** ولازم تحركينها باليوم عالأقل 6 مرات .. وبتحسين بألم وأنتي تحركينها..
** وبتقولج امشي في اليوم ساعة
** طبعا لازم أول خمس أيام عالأقل كل يوم تسوين الابر ..
ونظام الابر ..
مايغير شكل جسم وايد والله ..
لأن تركيزهم يكون نزول الوزن مش نزول الدهون
أنا جربت نظام الريجيم البروتيني ..
كنت اخذ حبوب ..
فترة ووقفتها وبعدين وكملت الريجيم بدون حبوب
وعقب
نزل وزني وشكل جسمي تغير كله …
والله كان شيء غير وربي
لكن الأبر ماتغير شكل جسمج كليا لان تركيزهم مايكون في نزول الدهون
انصحج تسوين الريجيم بروحج
وتمتنعين عن النشويات والكربوهيدرات
وتركزين على الخضار والأجبان بأنواعها والبيض واللحوم
وتكثرين من الماي ..
مع الرياضة
وزنج بينزل
هذي نصيحتي لج واذا حبيتي اي استفسار أنا في الخدمة حبيبيتي ..
بس ماأنصحج تسوينها والله ..
لان انتي اذا سويتي الريجيم في البيت بروحج وسويتي رياضة بتنزلين نفس النزول حق الابر ويمكن اكثر والله..
واذا بغيتي شرح تفصيلي عن الابر بفيدج بعد
تحياتي لج يالغلا:flower:
بصراحه ماعندي معلومات عن الابر الصينيه
بس اللي اعرفه انه ماراح تنزلين من وزنج واجد مدام توج والده الا بعد 6 اشهر!!!
عموما جربي المساج الهندي لان واجد ناس شفتهم سووه وصج ضعفوا
اتمنى توصلين للوزن الي تتمنينه