كيف حالكم يا احلى امهات.. وحشتوني والله .. زمان ما دخلت الركن وعرفت اخباركم 
المهم، ابني حسين .. من صغره يعاني من ظهور الاكياس الدهنية في الجفن المتحرك الاعلى في عينيه،
تقريبا من عمر سنة كانت تطلع له، وبمعدل كيس واحد الى 3 اكياس بالسنة،
وكان علاجه فقط الكمادات الدافئة الى حد ما يروح بنفسه ..
بس من العام الفائت ازدادت الاكياس في حجمها وصارت تلتهب ويكون لونها احمرر… وما تروح..
العام الفائت حاولنا مع طبيبة عيون مختصة ان يروح الالتهاب عشان يسوون عملية لتصريف الدهون المتراكمة في الانتفاخ لكن ما راح ، ولا راح الكيس الا بعد اكثر من 6 شهور ( تخيلو طفل بالروضة كل يوم يسخروا منه الاطفال على عينه وكل ما نطلع مكان يقعدوا الناس يتفرجوا عليه )
المهم بعد ما راح خلف للاسف اثر ملحوظ، واستمرينا بالكمادات الدافية عشان ما ترجع ..
لكن من اسبوع رجع طلع واحد جديد للاسف اكبر من سابقه وملتهب اكثر..
احد عندها خبرة مرت بهالمشكلة عند اطفالها، وتنصحني بشي معين عشان اتجنب ظهورها لطفلي… حبيبي 
تشكرات سلف…(f)
هالمشكلة منتشرة عندنا واجد لان ولد خالي و ولد صديقتي مرو بنفس المشكلة ولانهم اصغر من حسون علاجهم بس كمادات وكان يمشي الحال بس خبروهم اذا استمرت الحالة لازم عملية
ولد خالي سافرو ايران وهناك اختفت الاكياس لان الجو عندهم ناشف ولما رجعو البحرين طلعت الاكياس مرة ثانية بسبب جونا الرطب
الله يشافي حسون ما يشوف شر
بالفعل اخبرنا الطبيب ان الامر منتشر هذه الايام…
بس اول مرة اعرف منك ان سببها الرطوبة …
انتظر تجارب واراء الامهات ايضا..
ما يشوف شر الصغير
اني اعاني من هالمشكله وطبعا عطوني موعد للسلمانيه على اساس جراحه بس الدكتورة رفضت خبرتني انه راح يروح مع الوقت وحتى مع الجراحه احتمال يرد يظهر
ما عندي معلومات عنه اكثر!
بس من فتره طلع ولا راح وتم يكبر والتهب صار كره كبيره يابسه وحمرا
رحت عن دكتوره مشهوره مالت عيون سوت لي عمليه بس ما تغير شي والحين من اسبوع رحت ابن النفيس قالت لي الدكتوره انه الي مسبب الحمره هو الالياف يعني الكيس صغير بس دار ما داره كله الياف وسوت لي عمليه نظفتهم وقالت لي خلال اسبوع او عشره ايام راح يختفي واذا طلع مره ثانيه راح تعطيني نوع من الابر
لحد الحين لا زال الالتهاب موجود بس خف عن اول .. ولا زال يشرب المضاد ومستمرين بالكمادات..
عالجناه سابقاً عند د ابتسام العلوي، وهي غنية عن التعريف طبعاً..
وهالمرة رحنا به الامل، واحتمال كبير نسويه العملية هناك…
الدكتور نفسه يقول وااااااااجد عندكم منتشرة هالحالة ( هندي هو ) لحد ما جيت سويت 15 وحدة من بداية شهر 9 للحين !!
دعواتكم امهات تتيسر عمليته هالمرة وما تطلع له مرة ثانية ..
انه امس كان موعد المتابعه بعد العمليه في ابن النفيس والحمد لله تقريبا 80 % اختفى بس قالت لي الدكتوره اذا لا سمح الله طلع مره ثانيه في نوع ابر تنطق في العين عشان تقلل من النشاط لا تتكون الاكياس او الالياف مره ثانيه
انتي سالي عنها اختي وشوفي اذا تناسب لعمر ولدج وحالته