بنات البروكلي وااايد لها فوائد بس أنا ماحب الشوربة مالتها فمادري اصير اني افوح البروكلي وشربها مثل الجاي ولا لا ياريت تفيدوني ..
وبالنسبة للجاي الأخضر هم فوائده وايد بس ماني عارفة وين أحصله .. !!
لا تطنشون تكفون ردوا الله يجزاكم الجنة
سلام ..
بالنسبة للبروكلي، ما أدري إذا ينفع بس تفوحينه أو لا، بس تقدرين تسوينه سوتيه و تاكلينه كطبق جانبي…
و الشوربة، عندي طريقة ما تبين نكهة البروكلي فيها كثير بس لذيذة، جربيها…
حمسي بصل و ثوم و شوي زنجبيل بزيت زيتون… بعدين حطي عليهم ربع ملعقة صغيرة يانسون حب أو مطحون، و ورق غار حركيهم شوي بعدين حطي عليهم البروكلي و تقريبأ كوبين ماي… غطيهم و خليه يطبخ لحد ما يستوي البروكلي…
أطحنيهم بعدين في الخلاط… و في نفس القدر، ذوبي ملعقتين كبار زبدة مع ملعقة كبيرة طحين حركيهم، و صبي عليهم خلطة البروكلي بالتدريج و حركي بمضرب شبك…
طبعاً يتكون الشوربة ثقيلة، زيدي عليها حليب و انتي تحركين لحد ما توصلين للقوام اللي يناسبج، زيدي الملح و الفلفل الأسود و بالعافية 
و في طريقتين للبروكلي دايماً أسويهم،
الأولى: أحمس بصل و فلفل بارد و فطر طازج و أحط عليهم صدور دجاج مقطعة مكعبات و أبهرهم، و لما يستوون أحطهم في صينية فرن…
أجيب البروكلي وأقطعه وردات و أسلقه نص سلق و أشخله، و أصفه على وجه الصينية…
في قدر صغير: أحط كوب كريمة + مكعب ماجي + نص علبة جبن تشيدر مبشورة + نص ملعقة صغيرة كركم أطبخم و أول ما يذوب الجبن أصب الخلطة على الصينية و أدخلها الفرن لين تثقل الصلصة…
الطريقة الثانية:
أجهز حمسة لحم مفروم مثل حقت السمبوسة و أخليها على جنب…
بعدين أحمس بصل و ثوم و شوي زنجبيل، و أضيف لهم خضار مقطعة مكعبات (جزر-بطاطس-كوسا-زهرة-بروكلي-فلفل بارد) و أزيد عليهم ربع كوب ماي و أملحهم و أبهرهم و أغطيهم و أخليهم على نار هاااادية لحد ما يستوون.
في هالوقت أجهز صلصة باشاميل، و أجيب صينية فرن و أحط فيها الخضار و فوقها اللحم المفروم و أخيراً الباشاميل، و أحمر الصينية بالفرن… و تاكلينها مع الخبز، لذيذة و صحية…
إن شاء الله أكون أفدتج
و بالنسبة للشاي الأخضر ما عندي فكرة و الله…
أختي Daisy Ash
تسلم ايدج على الرد ويعطيج ألف عافية يا الحبيبة ويارب الله يسعدج وهنيج في الدنيا و الآخرة ، وأكيد بستفيد من طريقتج بس كان في شغلة ودي أعرفها اصير اسوي مثل الجاي افوحة وشربة من غير طريقة الشوربة ؟؟ الي عندها خلفية عن هالموضوع ياريت تفيدني ..
أحلا سلام لأحلا قلب ..