الشات والشباب 2024.

المواضيع التي تتحدث عنها في غرف الشات؟
*عامه *تسلية وكذب * العلاقة والجنس * مواضيع أخرى (اذكرها)
متزوج:
* نعم *لا
إذا كنت متزوجمتزوجة هل ترضى للطرف الثاني الدخول لغرف الشات ولماذا:

للشباب:
هل تؤيد دخول الفتاة لغرف الشاتاذكر السبب في كل حالة):
* نعم * لا
اكتب رأيك في الفتاة التي تدخل الشات:
هل تتزوج من فتاة تدخل الشات؟
*نعم *لا
عندك أي ملاحظة تبي تضيفها؟
هذا كان الاستبيان وأسئلته
الحين شوفوا الردود العجيبة
طبعا شافوا إن جميع الفئات العمرية الشابة تقريبا (من 13 إلى نهاية الثلاثينات)تدخل الشات وطبعا منهم الشباب ومنهم البنات حتى منهم المتزوجين وللأسف أباء وأمهات يعني يربون أجيال وهذي بعض الردود من الاستبيان:
حبيبتي والمطر: ولد عمره 24 يدخل الشات بإدمان مومتزوج ويحب وحده من الشات و يقول إنها تحبه أغلى من روحها وواثق فيها ثقة عمياء وهي ثبتت له الحب وهدفه من الدخول هو التعارف والتسلية وهو يأيد دخول البنت ويقول ان كل واحد عقله في راسه وعادي عنده يتزوج وحدة تدخل الشات او متعرف عليها من الشات.
قمر سيهات: بنت تدخل الشات دائما عمرها 18 اهي مو متزوجه تدخل للتسلية والكذب والغامرات وتتكلم في مواضيع عامة
بس مو عادي لو تزوجت تاخذ واحد يدخل لان بتظل طول عمرها تشك فيه لان يمكن يخونها يعني بالعربي انعدمت فيها الثقة لانها تشوف أشكال وألوان في الشات
دلوع العيله: ولد عمره 13 سنه يدخل يقول انه يتسلى ويتعرف وماحد قاله ان هالشي غلط (أنا مادري كيف لما يكبر)
عيون المها (وعاد هالجواب يعتبر الطامة الكبرى لأنه واجد تكرر بين الشباب والبنات في الاستبيان طبعا أنا ماراح أذكر أسماء كل اللي جاوبوا يعني بذكر بشكل عام): ياطويلين العمر هذا عيون المها شاب عمره 25 يدخل الشات لغرض التحدث بالمواضيع الجنسية والاستمتاع فيها على النت ليش..؟؟ لانه شاب ومو قادر يتزوج لان الحياة صعبة فيعوض هالشي في الشات لان لاقي بنات واجد يعطونه وجه في هالمواضيع خصوصا آخر الليل لانها خوش وقت لهالمواضيع بس الغريب انه يدخل ويسولف ويلعب بس نظرته عن البنت اللي تدخل الشات انها قذره ومنحطة ومستحيل يتزوج وحدة تدخل الشات لانه مقتنع ان هالمكان وصخ ومستحيل يثق في وحدة تدخل الشات أبداً .

طبعا هذا مو كل شي بس بشكل عام :
• أغلب الشباب قالوا انهم يدخلون عشان مواضيع الجنس وهالسوالف لان فيها متعه لاتوصف وطبعا يكون الوقت باليل وكلهم اجمعوا انهم مستحيل يتزوجون وحده تدخل الشات حتى لو كانت ماتتكلم في هالمواضيع لان بتكون الثقة معدومة بينهم وقالوا ان كل اللي يدخلون منحطين مع انه يمكن الغرض من دخولهم شريف يعني تعبئة فراغ او شي ثاني .
• قليل من اللي يدخلون يأيدون الزواج من الشات ويشوفون ان الموضوع مافيه شي من الغلط أذا لقوا روحهم متفاهمين ويكملون حياتهم مع بعض.
• المتزوجين والمتزوجات يدخلون لأنهم يحسون بفراغ عاطفي نتيجة إهمال الطرف الثاني لهم وطبعا بعضهم يعوضون هالشي بالكلام في مشاكلهم مع أزواجهم وزوجاتهم للجنس الثاني وهكذا.
• القليل يدخلون عشان يسولفون في مواضيع عامه ويتعرفون على ثقافات الآخرين .
• ولما سألوا الشباب اللي مايدخلون الشات عن رايهم في الزواج من بنت تدخل الشات اغلبهم مايأيدون هالشي لدرجة ان بعضهم قال انه لما جا بيخطب رشحوا له كم بنت.. مجرد يعرف ان البنت المرشحة تدخل الشات يسوي لها دليت لدرجة بعضهم قال انه ممكن يحذر و يقول لأصحابه عنها ويمكن بعض الشباب يزيدون ويبهرون في الموضوع لحد ماتتشوه سمعة البنت حتى لو كانت شريفة ودخولها للشات شريف وفي النهاية وش بتستفيد غير الشهرة وبعدين يا تجلس بيت أبوها وتداري وجهها عن الناس يا يجي لها واحد منحط ويظل يعيرها طول العمر بفضيحتها بين الناس.
• والبنات اللي مايدخلون قالوا نفس الشي تقريبا وانهم مستحيل يتزوجون واحد يدخل الشات وكل يوم يكلم وحده يعني الثقة من الأساس بتكون معدومة وتظل في حالة شك دائم حتى لو كان اهو غير اللي في بالها .
• لما سألوا الشباب ان أحيانا يصير الشاب يكلم بنت وكل شي وفي النهاية يشهّر فيها بين الناس سألوهم كيف تعرف البنت أصلا وكيف توصل لإسمها وعيلتها وكيف تسوي كذا قالوا ان الشباب عندهم أساليبهم الخاصة والسهلة اللي يقدرون عن طريقها يوصلون لاسم البنت وبالتالي لمعلومات عنها حتى لو اهي ضامنة انها داخلة بإسم مستعار ومستحيل احد يعرفها وسموا طريقة الوصول للي يبونه (بسر المهنة) وان بعض الشباب اللي يتعرفون على البنات يبون يمشونهم على كيفهم طبعا بعد مايوصل لاسمها واللي ماتطاوعة في اللي يبيه ينتقم منها ويشهر اسمها
خلاصة الموضوع ان صار الشات داء العصر بين الشباب وللأسف ان اغلبهم صار الموضوع عنده عادي جدا لان تعود على هالشي والغريب ان الاغلب يسوون هالشي بس لما يبي يتزوج يدور البعيد عن هالطريق والغالب اجمع ان الثقة تنعدم بين الطرفين لان اللي يدخل يشوف مواضيع وبلاوي تشيب الراس فيريح عمرة ويختار البعيد…
فأنا اقول ياشباب وخاصة البنات انتبهوا لروحكم من الشات وزي مايقولون ابعد عن الشر وغني له لان واجد من الناس صار عندهم الضمير معدوم وما يخافون ربهم ولازم الاباء والامهات يراقبون اولادهم عشان لا يندمون في النهاية
آسفه طولت عليكم بس لاني خايفه على شبابنا من هالبلوة اقصد الشات
وطبعا لاتنسون تعطوني رايكم في الشات …………تحياتي