بسم الله الرحمن الرحيم
السلام عليكم ورحمة الله وبركاته ..,,,
كيف حالكم حبيباتي عساكم بخير …
إن شاء الله اكون خفيفه على القسم
أول موضوع انزله لكم بهذا القسم وان شاء الله أفيدكم ببعض التجارب الي نفعتني
وان شاء الله بتكلم عن بعض الكريمات الي استخدمها وبعض الوصفات الي فادتني من المنتدى ,,,
نبتدي بعون الله ,,,
اول شي كريماتي الي ما انتظر الين ما تخلص الا
أوفر وحده جديده لحبي لها ومفعولها الحلو الي خلاني ما استغني عنه …
نبتدي بالعين …
كثير اخذت لي وصفات لتبيض تحت العين وشده خوفا من الايام او السنين القادمه ..
لكن ما عمري ارتحت لكريم خاص لمنطقة العين سواء أسفل العين او تحته
إلا كريم
أسم الكريم
fade out eye zone
تلاقونه بالصيدليات قسم الكريمات
جربت الشاي لتقليل نسبة السواد تحت العين
الي كنت اعاني منه خصتا ان كان يبين علي واضح لمجرد
يوم واحد اسهر فيه …
لكن للأسف الشاي كان يزيد السواد عندي خصتا ان لون الشاي من كثر
استخدامه على هالمنطقه راح يكتسب لون الشاي بدل تقليل اللون الطبيعي المكتسب…
جربت كريمات ثانيه
ولكن صدقوني ما شفت نتيجه حلوه
الا من هالكريم الي كتبته لكم
على الاقل داومي عليه بالليل قبل النوم
خليه عندك بدرج قريب من السرير وقبل ما تنامين
اخذي نقطه للمنطقه تحت العين ونقطه لمنطقة اعلى العين
وكمان لا تنسين الزاويه الخارجيه والداخليه ..
وعطي نفسك مجال اسبوع ولاحظي الفرق بلون بشرة ما تحت العين
وكمان الشد الواضح …. مع ان ما عندي تجاعيد لسه بدري علي
ولكن الاهتمام ببشرتنا مهمه للسنوات القادمه ..
::::::::::::::::::::
الكريم الثاني الي ما اقدر استغني عنه
والي الكل يعرف ماركته
تحديدا هذي النوعيه الي ناسبني كثير
مبيض ونفس الوقت مغذي ليلي ما قبل النوم
والي نوعيته جدا مريح غير دهني وما راح تحسين بأنك متضايقه وقت ما تبين تنامين
وكأنك قناع على وجهك بالعكس
يتغلغل بالبشره بسرعه وما تحسين باللمعه ولا شي ..
آه لو اقول لكم كم وكم اخترت من الكريمات وما ارتحت ولا على وحده
ودائما انتظر ان بس تخلص عندي العلبه او العبوه وارجع اشتري ماركه ثانيه لعل وعسى ارتاح منها …
الين ما جربت لوريال وعن جد مريح واستعماله ليلة بعد ليلة وفر علي
تغذية بشرتي بشكل ممتاز ,,,
::::::::::::::::::::
بالنسبه للجسم :
أنا صار لي سنتين ما أغير الكولكشن الحلو الي اخذه من بدي شوب
سواء زيت المعطر للبانيو
أو رغوة الجسم+ (الصابون )
معطر الجسم
زبدة الجسم
كريم الجسم
وغسول اليد
حتى المقشر
كثير مرتاحه على هالمجموعه الحلوه من بدي شوب
يكفي ان احس طول اليوم بالانتعاش من ريحته الحلوه
وكأني توت طازج ههههه
يعني كل شهر او شهر ونص اروح اشتري لي سله فيها كل هالاغراض
ومعها قفاز جديد بنفس اللون …
أحلى هديه تقدمينها لنفسك
الله على الدلع وقت استخدامي هالمجموعه
ممكن اغيره بين فتره والثانيه
ولكن ارجع للكولكشن هذا مهما كان احس ارتاح لريحته وصرت مميزه برائحتي
فما اقدر استغني عنه …
بالنسبه للأغراض الي اخذها من بدي شوب
كمان اخذ مرطب الشفايف
:::::::::::::::::
كريم القدم استخدم ماركة سالي هلسون
بصراحه ما حصلتها بالبحرين
وقدرت اني اوفرها من خلال الانترنت
كثير اشياء من ماركة سالي هلسون عجبتني خصتا زبدة السكراب للجسم
ما بقدر احط الصورة لأن فيها صورة مخالفه للقوانين 😉
::::::::::::::::::
أما كريمي السن بلوك الي استخدمه
روعه احس مهما اطلع بالفتره الظهريه
بشرتي محميه من اشعة الشمس
:::::::::::::::::::::
بتكلم الحين عن بعض الاشياء والماسكات الطبيعيه الي احب اني ما استغني عنهم …
ما احب الاشياء او الماسكات الجاهزه مهما تكون سهله الاستعمال الاشياء الطبيعيه جدا مفيده للبشره …
عموما انا ما عندي كلف ونمش وغيره الحمدلله
ولكن عندي المسامات ذابحتني الود ودي اني اصغرها واصغرها واصغرها
وما نفعتني بالنسبه لتصغير المسام الا الاناناس
بعد ما اكل الاناناس اخذ القشر واحطه على خدودي واسترخي لمدة ربع او ثلث ساعه
عن جد احس ان المسامات تصغر او الليمون الاشياء الحامضه جدا ممتازه لتصغير المسامات
احاول قدر الامكان اني انظف بشرتي بماء الورد فقط لأنه قابض للمسامات بالدرجه الاولى
حاطه لي رشاش خاص لماء الورد بالثلاجه وقت تنظيف بشرتي بالطريقه المعتاده
وبعد انتهائي ارش من هالرشاش واحس بالانتعاش وما اجففه اخليه يجف بروحه
يقبض مساماتي ونفس الوقت تونك طبيعي للبشره ونفس الوقت بشرتي الحمدلله صارت ملفته بنعومتها
والطريقه الثانيه اني اعبي مكعبات الثلج بماء الورد منها يقبض المسامات ومنها ان احرك الدوره الدمويه للوجه ..
الماسك الروعه الي احبه كثير
ملعقه نشاء اخليه على نار هادئه مع ملعقه من بودرة حليب النيدو وملعقه من ماء الورد وملعقه من ماء مياه الشرب
اخلي الخليط يذوب ويتماسك اشوي وبعدها خلاص اخليه يبرد واخليه بالثلاجه لمدة ثلاث ايام استخدمه لبشرتي وبكذا اهتميت بماسك طبيعي لبشرتي لمدة ثلاث ايام بالاسبوع …
بالنسبه للمنطقه الحساسه …
كثير من البنات يشتكون من هذي المنطقه
وكثير من البنات يقولون خلاص عاد ما بقى شي ما سويناه
يعني ما فادني الله خالق هالمنطقه اغمق من الجسم
وهالكلام مهو صحيح الجسم ككل المفروض يكون لونه واحد سواء اليد
او الرجل او المناطق الحساسه
انا استخدم صابون اسمه فرجيني
بشكل يومي خصتا بالليل قبل النوم
اغسل المنطقه بعدها ابتدي انشفها برفق
واتأكد من عدم رطوبة المنطقه
لان كل ما كانت المنطقه هذي رطبه راح يتأثر ويتغير لونه
خصتا ان هالمنطقه حساسه واقل شي ممكن ان يسبب التهاب او تهيج الجلد
اما المرطب الي استخدمه لهذي المنطقه
فقط زيت اللوز المر + ملعقه من عصير الليمون بكل استخدام
وبعد ما اصحى من النوم واخذ شور الصباحي ارطب المنطقه
بزيت اللوز الحلو وبس
احلى شي بهذا الزيت ان يرطب بدرجه قصوى
يعني من خلال تجربتي لهذا الزيت حسيت ان المنطقه
ما تغير لون الجلد وكاني استخدم هالطريقه من اربع سنوات
وهالمنطقه ما عمري اشتكيت من تغير اللون او الجفاف او التهابات
الحمدلله …
:::::::::::::::::::
هذا موضوعي اليوم عن استخدامات لبعض الكريمات والماسك الطبيعي للوجه
وان شاء الله الموضوع نال على اعجابكم …
تــــــــــــــرانيم
وصفاتك وكريماتك حلوه وهجربها وانشاء الله تكون حلوووه
بس عندى سوال الصابونه وينه الاقيها؟(صابون فرجيني)
دائماً مبدعه