أخواتي الغاليات …
شورايكم بالاهتمام المبالغ في بالانجليزي في كل مكان وكأن نحن مب عرب ومسلمين ولغتنا عربية ..
والله لدرجة ان الناس صارت مهتمة بس في كيف اعياله يتكلمون انجليزي بغض النظر عن المواد الثانية أهم شيء يكون بلبل..
أن أعترف ان اللغة الانجليزية مهمة وبالعكس لازم الانسان يكون عنده حصيلة منها بس باعتدال لأن العربي مهم على الأقل نقرأ القرآن..
أنا سألت دكتورة بالانجليزي يعني أبغي اعلم أولادي اللغة ..والله قالت لي ترى أسهل من الانجليزي ماشي يعني خليهم يتأسسون بالعربي عدل ولاحقين على الانجليزي ممكن يتعلمونه في الدورات اللي ما تقصر والممارسة حتى مع الخدامة ..
لازم نفكر مب انسوي شيْ على حسب دينا ولغتنا ترى نحن محاسبين ..
ترى للعلم أنا معلمة والبيئة اللي فيها كلهم ناس متعلمين وفاهمين يعني مب كلام ناس جهله..
والشكر للجميع ……………………………..
وين تفاعلكم يا الطيبين ..
لانه اهي اللغة الي بتنفعهم لين يكبرون
اول شي بيسألونهم لين يقدمون على وظيفة بدون مايلقون نظره على السيرة الذاتية
السؤال المعروف " اتعرف او اتعرفين انجليزي قراءة و كتابة؟"
يعني لي امته بنكون دول العالم الثالث، الدكاترة فالجامعة امريكان و انجليز تره
مايرحمون يضحكون علينه يقولون اتوا الا عرب ماتعرفون شي حتى ماتعرفون اتحجون انجليزي
صج عالم ثالث!!! تخيلي
ليييش؟؟ لانها لغة العصر خلونا انطور من روحنه اشوي
لازم الام تعلم عيالها انجليزي من اهم صغار طبعا بدون ماتنسى اللغة العربية و لا تنسى الدين الاسلامي، قلنا يتحجون انجليزي بس بدون ديانة مايصير!!
انه طالبة ادب انجليزي سنة ثانية و اقول الواقع الي صاير فالبحرين
و الحين وزارة التربية ما قصرت قاموا يدرسون طلاب المدارس الحكومية انجليزي من الصف الاول
والسموحة
هي صج اللغه مهمه بس السبب الرئيسي ان هم عرفوا كيف ينشرون لغتهم وثقافتهم
واحنا مو فالحين الا في التقليد واختي ميراج احنا بنظل عالم ثالث ومحد سمانا بهالاسم الا هم ولا وين العالم الثاني؟؟
واللغه أكيد مابتخلينا نصير دول متطورة هي صج مهمة وانا ما انكر هالشي والحمدلله اللغة عندي قوية وان شاء الله لازم ادرسها لعيالي
بس في ناس مخليين لها قيمة اعلى من أي شي لدرجة انهم يتنازلون عن اشيا مهمه في الدين بس عشان ولدهم او بنتهم يكون عندهم لغه قويه :qaq:
بس اعتقد انه تفكير اكيد خاطئ وفيه تخلف والا شوفوا الفرنسيين كيف يشتغلون على نشر لغتهم ولا الالمان في وااايد ناس يرفضون انهم يتكلمون انجليزي لما مايكون في ضرورة ويفتخرون بلغتهم
بس للأسف هني تشوفون عندنا البنات والشباب مع بعضهم البعض يتكلمون انجليزي..ليش انزين؟؟ طيب احنا عندنا لغه بس بعد ماننسى لغتنا الام والانجليزي احنا ماتعلمناها حق نتفاخر ونتباهى بها بس عشان هي صارت ضرورية الحين
انا على عكسكن تماما
انا اشوف ان اللغة الانجليزية مهمة جدا
فالمستقبل صار عبارة عن ( كمبيوتر & انجليزي )
و بيني و بينككن
اشوف ان مازالوا الطلبة جاهلين بأصول الكتابة واللهجة ( مع الاعلم ان اللغة الانجليزية تدرس عندنا في الامارات من مرحلة الروضة ..بس انا مازلت اشوف ان لمنهج يحتاج الى تحسين و تغيير في اصول التدريس)
نأتي الآن الى اللغة العربية
اصبحت اللغة العربية حاليا و كأنها اللغة الثانية في ظل هذا العصر و التطور
و لا كأنها هي لغة الدين و لغة اهل الجنة
صار نعمة اذا كان الانسان يقدر يكتب و يقرا عربي حتى لو كانت عنده أخطاء املائية ( صار شي عادي جدا )
انا اشوف انه المفروض يتغير كل شي
طريقة تدريس اللغة العربية و طريقة تدريس اللغة الانجليزية
عشان لما الشخص يتحسن
يتحسن في كلا اللغتين
و بهذه الطريقة ارى ان نحن بنحقق التكافؤ و ما نظلم لغتنا العربية على حساب اللغة الانجليزية
على فكرة
اللي يسافر اوروبا راح يلاحظ ان اللغة الفرنسية منتشرة اكثر من اللغة العربية
يعني لو انتي تعرفين فرنسي راح تقدرين تمشين نفسج اما الانجليزي راح تواجهين صعوبة في انج تحصلين احد يتكلم انجليزي عشان تقدرين تاخذين و تعطين معاه
و السموحة منكن
اختلاف الآراء لا يفسد ود القضية ^^"
انا عن نفسي.. اكيد اشجع تعلم اللغات والانجليزيه خاصة .. لانها من اكثر اللغات استخداما.. يمكن ما تكون الاولي لكنها اللغة الرسميه في دول كثيره ..
انا عندي قناعه انه الطفل يقدر يتعلم ويتقن اكثر من لغة اذا طريقة التعليم كانت صحيحه .. ولهالسبب اشجع تعلم اللغات من مراحل مبكره.. لكن طبعا مش على حساب اللغة العربيه او اللغة الام شو ما كانت .. اي لغة يتعلمها الانسان لازم تكون اضافة ومش بديل للغة الاصليه ..
يعني انا عندي عادي اذا الاهل كلموا عيالهم بالانجليزيه او اي لغة ثانيه لأنه الانسان اذا ما تكلم ما بيتعلم .. لكن مثل ما قلت مش على حساب لغته الاصليه .. والطفل الصغير يتعلم لغته في شهور ما يحتاج يقعد سنين عشان يتعلمه .. واعتقد عنده وقت كافي للغات ثانيه .. وشو ما كان عدد اللغات اللي تعلمها ما بينساها اذا تم يستخدمها باستمرار .. فشو المانع انه اهله يكلمونه بلغتهم مرات وبالانجليزيه مرات واي لغة ثانيه مرات؟ ما اشوف فيها شيء..
وانا عن نفسي اشوف انه الانجليزيه ضروريه مثل ما قلت قبل .. لأني احس انها تفيدني اكثر من الفرنسيه او غيرها.. وفي الدراسه بعد .. في تخصصات مثل الطب احس ضروري الواحد يدرسه بالانجليزي لأنه حتى المؤتمرات اللي تصير تكون بالانجليزيه .. فما يهم المحاضر من وين .. لازم يتكلم بالانجليزيه .. وبعدين الفرنسيه والايطاليه والاسبانيه الخ ماخذين من الانجليزي كثيير..
اما بالنسبه للدين فاللي يعرف لغات يقدر يخدم دينه .. وما اعتقد اي لغة تقدر تكون السبب في ابعاد الانسان عن الدين لأنه اللي يريد الصلاة ما تفوته .. وسبحان الله في ناس اسلمت وما تعرف الا كلمات بسيطه بالعربيه ولكنها تخاف الله اكثر من غيرها.. اللغة مالها علاقه ..
وشكرا لج اختي على الموضوع .. واتمنى اشوف مشاركات اكثر في الموضوع لأنه فعلا يستحق النقاش. ..
:flower: :flower: :flower: