بسكويت طبعة الابهام بالشوكولاته طعم خيااال 2024.

اليوم العصر سويت بسكوت
اسمه (طبعة الابهام بالشوكلاته) (chocolate thumbprint)ههههههههه ترجمه حرفيه
من كتاب Martha Stewart’s cookies
والنتيجه رووووعه الصراحه ..حبيته وايد ..وكالعاده اليهال وابوهم قضوا عليه ماشاء الله عليهم
طعمه مثل الغريبه ..وغير شكله مرتب وحلو للتقديم

نصيحة مارثا وقت تحضير البسكوت هو تبليل اصبع الابهام بالماي البارد وتجفيفه علشان يتبرد الاصبع ولا تحسين بحرارة البسكوت وقت الضغط عليه

الكميه تكفي 24 حبه

مقادير العجينه: (عدلت عليها شووي بس وبكتبها بطريقتي)
130 غ زبده بدرجة حرارة الغرفه
نص كوب سكر بودره ناعم منخول
1 ملعقه صغيره ملح
1 ملعقه صغيره فانيلا مركزه (انا حطيت ملعقتين صغار من سكر الفانيلا )
1 وربع كوب طحين جميع الاستعمالات منخول

مقادير الشوكلت :
1 كوب جوكلت نصف محلى هيرشي او تقدرين تحطين جالكسي او الجوكلت اللي تحبينه
30 غ زبده
ملعقه صغيره شراب الذره ..(تقدرين تستبدلينه بالعسل او تستغنين عنه)

الطريقه :
1-يسخن الفرن على درجة حرارة 350 درجه فهرنهايتيه أو 160 درجه مئويه.ويوضع ورق زبده في صينية الخبز
2-في العجانه الكهربائيه وعلى سرعه متوسطه تخلط الزبده, السكر البودره ,الفانيلا والملح الى ان يصير كريمي الشكل (الخفق لمدة دقيقتين تقريبا) تخفف السرعه ثم يضاف الطحين بالتدريج ونزيد السرعه الى السرعه المتوسطه .. الى ان يمتزج الخليط .

3-تقسم العجينه الى 24 حبه وتكور (هذي الخطوه تتطلب السرعه في العمل علشان ماتذوب العجينه فاليد)..وتوضع الكور في صينية الخبز وتخبز فالفرن لمدة 10 دقائق ..

4-فالاثناء نجهز كوب ماي بارد ونخليه على جنب ونطلع الصينيه من الفرن (لاتطفين الفرن خليه شغال)..اضغطي باصبعج الابهام على كل حبه (قبل لا تضغطين على كل حبه بللي صبعج بالماي البارد ونشفي يدج)

5-رجعي حطي الصينيه فالفرن مره ثانيه لمدة 7-9 دقايق ..(او لين ما تبتدي تتحمر من تحت شوي لا تحمرينها وايد مجر يصير اللون بني فاتح) اذا شفتي الحفر انتفخت رجعي ضغطي عليهم مره ثانيه ..واتركيهم يبردون على شبك .. وهذي الصوره بعد ماطلعته من الفرن

6-يوضع الجوكلت مع الزبده وشراب الذره في حمام مائي الى ان يذوب (انا ذوبته في المكروييف اسرع لمدة 40 دقيقه على قوة %50) ويترك على جنب يبرد شوي علشان يغلظ…ويوضع في كيس حلويات ويصب في حفر البسكوت

وبالعافيه