بما ان ولدي الله يحفظه لي ويخليه كمل السنتين .. حبيت اعرف شنو التطور اللي مفروض اشوفه فيه الحين من ناحية النمو ؟؟ وشنو المفروض اعلمه الحين ؟؟؟ <<<< مستعجلة
يعني هل اقدر اعلمه على الله يعزكم الحمام الحين ؟؟ البارحة وديته الحمام وخليته بدون بامبرز وعجزت معاه "سوي بولة" ما سوا شي بس بعد فترة بعد ما مللته ما شفته الا يقول لي بح .. يعني فهمت منه ان ما فيه شي ورديت طلعته ولبسته بامبرز .
وعلى فكرة في سؤال شاغل بالي .. من حوالي 4 اشهر اخذت له كتب اطفال فيها اسماء الحيوانات واسماء الفواكه مع صور كبيرة وواضحة وللحين احس اذا قعدت معاه اعلمه ما يهتم عدل .. بس الارقام حاولت اعلمه من 1 الى 5 واشوف اذا قعدت معاه وارددهم واقولهم يقولهم هو بعد معاي .. لكن ما يرضى يقولهم بروحه … متى يبتدي يتفهم ويستجيب للتعليم مع انه من النوع اللي يحب يقعد يطالع الكتب والمجلات .؟؟
اتمنى منكم ان تفيدوني في المهارات اللي المفروض يتعلمها في هالسن .. وشنو المهارات اللي المفروض تكون عنده كطفل عمره سنتين ؟؟
واذا عندكم مواقع عن نمو الطفل في هالسن يا ريت تعطوني اياه لان حابة اتابع نمو ولدي واطوره اكثر عشان يصير طفل ذكي ومميز ..
بانتظار ردودكم ..
لهالدرجة طلبي صعب ؟؟ 🙁
بس ليش مستعيله … شوفي بالنسبه للحمام تقدرين تبدين تعودينه من ألحين بس إذا حسيت ماشي إستجابه بالمره (لأني أشوف الوقت بدري) جربي بعد 4 أو 6 شهور
لأنه السنتين ونص هو السن المناسب
وبالنسبه للملاحظه والفهم … ترى ماعليج هم يفهمون ويلاحظون أكثر منا ربي يحفظهم …. بس ماتهمهم المواضيع هذي ألحين
إنتي خذي له الألعاب إلي فيها أصوات للحيوانات وحتى تنطق أساميهم … ترى يستانسون على هالشغلات
حلو إنج تاخذين له كتب علشان يحبها ويتعود عليها 
بس الألعاب تشد إنتباههم أكثر … وأنا عندي أخوي تقريبا كمل سنتين ونص وبعده مايتكلم عدل ولا يبدي أي إهتمام لكن مره وحده خلا شهر أو شهر ونص لاحظنا إنه تغير … وبدى يتكلم ويقول كلام تقولين ريال كبير (ربي يحفظه)
وبعدين لاتخافين بتمر الأيام وبتشوفينه على الكوشه وبتقولين وين ذيج الأيام
الله يسلم لج حسون
صح الإهتمام بالطفل حلو … بس الله سبحانه هو إلي يخلق الطفل ذكي ومميز
يعني لكل إنسان قدرات … أبدا لا تحاولين إنج تضغطين عليه
لأنه الضغط يمكن يخليه يعاند … ومايحب إنه يتعلم
أحيانا الأم من حبها لولدها بتحاول تجبره على إنه يتعلم ويتكلم
لكنها بجذي تكرهه بالتعليم والمعرفه
خليه على طبيعته وإن شاء الله بيكون ذكي ومميز
عزيزتي،، كل طفل يختلف عن اآخر من حيث تطور اللغة والفهم،، مو معناه ان الكفل فيه شي،، بس تأتي بعض المراحل متأخرة,,
بخصوص الكتب الملونة (آنه أخذتهم من كشكول الأيام) أجلس مع أبني وأشرح له الصور من يوم عمره سنة،، يمكن مايفهم بس بعد فترة تشوفينه يندمج أكثر، قبل كم أسبوع أخذت له من رعاية الأمومة دفتر تلوين ملصوق به أقلام شمعية ،،مكتوب عليه First Step خليته يتعلم كيف يمسك القلم ويلون، حتى قبل كم يوم بنت خالي أخذتهم جاء لي يصيح (قم عبودي) يعني خذت قلم عبودي، بدا يتعلم كيف يحافظ على أغراضه من الغير… جربي له هالدفتر تراه حلو..
بخصوص الحمام، لا تشدين عليه، آنه بديت هالأسبوع مع ولدي شوي شوي بس رافض القعدة على المرحاض، انت ولدك الحين بسن أكبر يعني يفهمك أكثر،، شوي شوي ومثل ماقالت أختنا مرموم، أن قرأت نصيحة لتعليم الطفل الحمام،، وهي أن يقوم الوالدين أمام الطفل بالجلوس على الحمام كتمثيل يكون يعتاد الطفل ، أخذي له الحفاظات PULL UP هي تكرمين نفس الملابس الداخلية وبنفس الوقت حفاظ، لكن تبينيين للطفل ان ماعليه حفاظة ولازم يدخل الحمام.. تحصلين هالحفاظات بكل مكان بالبحرين، بس سعرهم أغلى من بقية الحفاظات،، لأن في نيتي أجربهم حق عبودي..
في موقع أجنبي للتدريب ، راح أدزه لك على الخاص، لأن حسب علمي ممنوع وضع روابط…
اليوم كان عنده موعد في المستشفى تبع التطعيم .. والحمد لله كل شي فيه اوكى .. وزنه 13.5 وطوله 91 سم :bigsmile: ..
وسألتني الدكتورة عن اذا يقدر يرتب كلمتين على بعض قلتها انه احيانا يرتب 4 كلمات مع بعض وقالت زين هذا احسن من اللي نبيه :dd:مثال من يومين قال لابوه : بابا .. روح جيب هذا ، وكلمات وايد يصفها مع بعض ويكون جمل مفيدة .
وسألتني عن اذا يقدر يصف مكعبات فوق بعض فقلت لها ايه وهو يحب اكثر ان يصف كاسات فوق بعض :bigsmile: ، وسألتني عن اذا يعرف يتصفح كتب ومجلات فقلت لها ايه هو يحب الكتب والمجلات اللي فيها صور وخصوصا مجلة ماجد واحسه يندمج مع الصور .
بالنسبة للدفتر والالوان انا اخدت له من زمان بس ما احسه يعرف يلون بمعنى التلوين .. لا .. ياخد الالوان ويقعد يخربط بهم في الدفتر .
اما عن الحفاظ ففعلا انا فكرت في نفس الفكرة وبامبرز نزلت هالنوع من كم شهر .. وان شا الله هاليومين اذا طلعت باخد له منهم .. وبالنسبة عن تبديل ثيابه احس الشي الوحيد اللي يسويه بروحه هو فصخ البنطلون .. اما الباقي فيحتاج لمساعدة حتى الصندل والجوتي لازم افتحهم له وهو يسحبهم من رجوله .
الصراحة التطور اللي ملاحظته فيه هالفترة حتى من قبل ما يكمل السنتين هو انه ابتدا ينادي اشخاص باساميهم .. وهذا تطور بالنسبة لي لان حسون هو الطفل الوحيد عندنا وما يعرف الا بابا وماما .. اي رجال عنده بابا واي مرأة ماما .. يعني ما عنده اخوان عشان يتعود يقول اساميهم والاطفال ما يشوفوهم الا في التجمعات العائلية بس .. توه من فترة ابتدا يتعلم الاسامي وينادي الاشخاص … واعتقد ان الحضانة لها دور في هالشي .
اليوم فطسنا من الضحك هناك في المستشفى احنا والممرضات ومراجعين في قسم الرعاية لما قعد حسون يصيح من الابر اللي ضربوه اياها .. ابوه حاول يسكته يقوله من منو اللي سوا لك حاحا .. قام يأشر وهو يصيح على الممرضة ويقول هذي :dd::dd::dd:
انا عموما بانتظار المزيد من النصايح والخبرات والف شكر لج اختي ام عبدالله ع الموقع ..
تسلمون ..
والحمدلله ان كل اموره زينة…
بس هاا.. عسى ما خفتي من الابرة بس؟
اكيد بخاف من الابر ولازم ادور راسي عشان ما اشوف الابرة .. بس الحمد لله قالولي ان الابرة ثقيلة وبتمرضه بس اشوفه ما تأثر زين ، مع ان مكان الابر تنفخ ..
الحمد لله