خلاصة التجارب لمشكلة التساقط والفراغات بالشعر والحصول ع لشعر كثيف وصحي~~ 2024.

جربت كل شيء.. كل دوا .. كل دكتور جلديه .. كل خلطه .. كل حنا .. كل زيييت !!

مكانك سرررر

كانوا الدكاتره يقولون لي وراااثه لأن كل شيء سلييييييييم

وكل ما أستخدمت زيووت يطييح شعري بالهبل لأنه دهني .. والدهني معرووف اذا حطيتي عليه زيووت تتعب الشعره وتطيح

المهم

توفت امي قبل 7 شهور وزاد الصلع في شهررر …

الكل يمدح خواتي لأن شعوره عن 5 شعور بدون مبالغه .. لكن أنا مع اني أجملهم ماحد يمدحني لان مافيه شعر ….!

وجااء الألهااااااااااام

قبل 5 شهور وانا اتصفح النت وادور شيء يكثف الشعر لأن صار لي سنه مهمله شعري خلاص زهقت من التجاارب .. كأني فار تجارب

فكرت لحظه ؟؟؟!! وش هو أكثر شيء يمدحونه لنمووووو الشعر ؟

قلت وأكيد بتقولون بنفسكم :

1- الجرجير
2 – السدر
3 – الثوم
4 – نواة التمر
5 – الصباار
6 – الكثيررا

وأهم زيتيين عيهم مدح .. وتجااارب .. وينمون الشعر بدون مايطيحون الشعر الدهني ؟؟

1- دابر أملا
2 – جنين القمح

أوكي !!! كتبتهم بمفكره على جمب

شوي قلت وش هو الفيتامين والبخااخ الطبيعيين اللي أكثر الدكاتر أمدحوهم ؟

أحسن فيتامين للشعر معرووووووووفييييييييين :
1- هيردال (( مايسممن وينبت الشعر ))
2- سترس تاب (( يفتح الشهيه وعلى قولتهم يسمن اللي عنده معلومه يقولها !! وينبت الشعر أنباات فضيييييع ))

كلهم ينبتون الشعر من تجارب شفتها بعيني ومن كلام الأطبااء وأبووي (( دكتور جلديه بس للبشره مو الشعر ))
وسترس تاب أستخدمته من زمان يومين ووقفته لما سمعت انه يسمن مع انه أفود من هير دال بعد

وأحســـن بخااخ شعر بعد معروووين :
1- ريجن 2% ( او منوكسيدل 2% ) كلهم نفس بعض مع أختلاف المسمى
2 – فوركابييل من الأعشااااب

طبعا ريجن كيميائي ومجرد ماتتركينه يطيح الشعر يعني لازم تستخدمينه طول العمر ( مو يوميا طبعا .. مجرد مايطلع الشعر كل أسبوع مره بس علشان مايحس شعرك انه فاقده )
مع كذاا يطلللع الشعررر .. أخوي صلعاء أقرع وقيرع على قولتهم .. الحين شعره مافي اكثف منه بس له 3 سنوات وماتركه

اما فوركابيل .. فهو طبيعي من الأعشاب .. واذا تركتييه مايطيح شعرك .. وينبببببت الشعر بس بمده أطول من ريجن .. يعني مفعوله أخف .. بس مرره ممتاز أقيمه 95 من 100

الحين خلصت من أبحاااثي اللي أكتسبتها من خبره مدتها 4 سنوات .. ومن أطباء ما أقدر احصيهم .. ومن النت .. ومن الوالد طبعا .. ومن التجااارب من أقاربي ….

أتمنى تخلونه كمرجع أذا ماتبون تستخدمون اللي أستخدمته ..

نجي للبدايه ..
1- شريت هيردال لأنه مايسمن
2 – شريت فوركابيل لأنه طبيعي
3- سويتي لي خلطه مكوناتها من البيت ( بالخلاط حطيت حزمة جرجير مع شوية مويه ونواة التمر المطحونه وفصين ثوم مع الماده اللي داخل الصبار والكثيرا بعد مانقعتها ليوم كامل وصارت مثل الجلي وشوية دابر املا وشوية زيت جنين القمح وخلططططتهم كلهم وحطيتهم بعلبه وعلى طول ع الثلاجه – جبت طاسه وحطيت فيها مويه مغليه وكبيت كمه كبيره من السدر وخلطته وغطيته بفوطه وخليته يتخمررر )

يعني حطيت كل اللي أكتشفت انه ينبت الشعر

نجي للتطبيق :
– كل يوم لجيت أنام أبخ لي من الفوركابيل وآكل حبة من الهيردال
– 3 مراات في الأسبوع أحط بشعري من الخلطه … آخذ ملعقتن من السدر المخمر مع شويه من الخلطه اللي بالثلاجه واخلطهم واحطهم .. أنتظر ساعتين واغسله بشااامبوو صانسيلك .. وانشفه وادلك بخفه بالفوووطه
– أمشطه كل يوم علشان مايتشابك .. لأن التشااابك يطيح الشعر

بعد 5 شهور فققققققققققط :

– الفراغاااااات والصلع تغطااااااااااااااا
– شعر كثيييف
– شعرر طووووووويل
– لمعااااااااااااااااان
– بدوون تقصف
– نعوووومة في الشعررر
– الشعر يصرررررررررخ انااااااااااا صحـــــــــــي

وللحين مستمره .. ولأول مره من 4 سنوات اشوووف شعر حقيقي ماشاء الله تبارك الله
من جد ماتوقعت ان شعري بيرجع وبيصير احسن من أول هذاا بفضــــــــــل ربي

وكل من سألني أقوووله على طول لأني ما أحب الأنانيه .. مثل ما أستفدت ابي الكل يستفييد

وكل العايله أنتشرت هالخلطه عندها سموها خلطة مآريا هههههه حسيت اني مخترعه الذره من كثر الشهره اللي صارت لي في العايله .. حتى عيال خالي اللي اتغطى عنهم يتصلون على أخواني يسألونهم << وصلهم الخبر

أتمنــــــــى أني رتبت الموضوع بشكل تستفيدون منه حتى لو ماطبقتوه !!..

ماشاء الله تبارك الله .. لاتنسون تذكرون الله

وما أبي منكم الا دعوه بالتوفيق والسعاده .. وأن الله يرحم أمي ويغفر لها