دللي ودلعي نفسج للعرايس المخطوبات كل ما تحتاجينه بفترة الخطوبة

السلام عليكم ورحمة الله وبركاته

دللي ودلعي نفسج للعرايس المخطوبات كل ما تحتاجينه بفترة الخطوبة

مساء النور لكل وجميع عرايسنا الحلوين الموضوع باين من العنوان اليوم الموضوع طويل جدا بس اكيد فيه فايدة للجميع وبذات العرايس المخطوبات طبعا عندي هوايه مواضيع من الالف للياء وراح احجي عن كل تجاربي الي مريت بيها طبعا اكيد استفدت ما راح اقول كل من نفسي بس استفدت هوايه من تجارب بنات بعد وان شاء الله اليوم راح اذكرها الكم اليوم

من ايام الملجه طبعا في افكار كثيره وكل وحدة تحب تكون متميزه بيومها شي اكيد وطبعا دائما من تمر الايام كل وحده تقول ليش ما سويت هيجي وسويت هيجي طبعا يوم الملجه هيى احلى الايام الي تمر بيها الوحده يارب تكون ايامكم كلها فرح وسعاده ان شاء الله

طبعا انا بيوم ملجتي حبيت اسوي الجو رومنسي واحمر كله

لا ننسى شي مهم كاسات العرسان بعد ما تملجون ويدخل العريس
انا الكاسات مالتي سويتهن بنفسي بلبيت طبعا جبت اثنين كاسات مع ورد احمر وصمغ واشرطة وقلوب :21_209::o:21_207::21_149:

صلو على النبي وقول ما شاء الله

اخليكم مع صور الكاسات وتكدرون بعد تسوينهم لحفلة الخطبة طبعا تبقى كل وحده وذوقها بالالوان اي لون تحب الوحده بيكم تسوي حسب ذوقها وحسب الاشكال بعد

هسه نجي لتنظيم الطاوله الي نخلي بيها الكيك وشربت العروس والعريس بعد الملجه اكيد بيكون العريس متلهف حتى يشوف العروس وهيى بعد الله يرزقكم ان شاء الله لكل بنات عروس الي ما متزوجات بلازواج الصالحه اللهم امين طبعا انا الطاوله كانت لون خشبي جبت ورق احمر مع ورد وشموع وردية وقلوب كله بالون الاحمر وزينت الطاوله وخليت بيها الشموع والاشياء الي انا جبتهم

نصيحه مهمه

حاولي تعيشين يومج هذا بسعاده ولا يشغل بالج شي عيشي اليوم بيومه وانسي وراج كل شي ولا تفكرين بشي كان مضايقج لو ماشي مزعج لو احد مزعلج صفي قلبج من كل الاحقاد والزعل عيشي حلاوة هذا اليوم مهما كان شي شاغل بالج عيشي جواء هذا اليوم الحلو الي راح يربطج بشريك حياتج والي تعيشين معاة العمر كله ان شاء الله حاولي ان لاتشيلين البسمه من شفافج

معلومه

حاولي يكون لوكج وستايل لبسج مثل ديكور الحفلة الي مسويتها اذا كان احمر حاولي تلبسين احمر لا تخلين مكياج كثير لان وراج اهم يوم بحياتج هو يوم العمر حاولي لاتخلطين كثير من اللبس اهم شي البساطه خلي المفاجئة لليوم الكبير

شي يخليج اجمل وحده بالعالم

حبيبتي للا ينسيج الزواج والفرح بصلاتج وقرائة القران حاولي تكون فرحتج كامله باداء الصلاة وقرائة القران لان لا سعادة دونهم

فترة الخطوبه

فترة الخطوبه هيا اهم الايام الي يكون بيها حساسيه وسوء الفهم بين المخطوبين والاهل :icon9:
علشان هيجي لازم نعرف شلون نتعامل وية انفسنا اولا وما لازم نكبر الامور ونتجنب المشاكل

حتى ما نخسر وندم لازم نتجنب وما نتسرع بالحكم واذا صارت مشكلة او سوء فهم نبتعد عن العصبية وناقش :sm215:

1…. اذا صارت مشكلة بينج وبين خطيبج احسن حل هو ان ما تكلمي وانتي معصبه حتى لاتكبر المشكله وبعدين نندم من تهدون طرشي مسج او كلمي ولا تخلين اللوم عليه حتى لو هو غلطان بس في طريقة احلى هو ان تتعاملي معاة على كد كلامه تتجنبين امور انتي غنى عنها وراحت بالج والحياة السعيدة ان شاء الله

2… اذا سمعتي كلمه مو حلوة من اهل خطيبج لو حجي ضايقج لا تبين انج تاثرتي بكلامهم لا بالعكس ابتسمي ولا تهتمين لان هاي الشغلات عاديه وتصير بين كل المخطوبين من قبل الاهل
ولا ترحين لخطيبج وتقولين وتعاركين وياه بعدين راح تبدي المشاكل بينكم بدون حل لها او نهاية لذاك ابني لج قاعدة من البدايه ان الحجي والكلام ما ياثر عليج

3… القناعه كنزا لا يفنى كوني قنوعه بكل شي لا تتبطرين وتطلبين المستحيل وتقلين على خطيبج بعدين ياخذ عليج فكره مو حلوه صدكيني بعدين هو من يشوفج بعيونه قنوعه راح تكبرين بعينه وهو ما يقصر عليج بشي

5….اجعلي لنفسج خصوصيات وسريه بعض الشي

نصيحتي لكل وحده اجعلي لنفسج خصوصيات وسريه بعض الشي ولا تتكلمين عن كل شي يخصج انتي وخطيبج لو زوجك حتى الزوج او الخطيب ما يحب زوجتة المستقبلية تتكلم عن خصوصياتهم عن تجربه :shiny: حتى بين الصديقات والاهل والخوات هناك امور المفروض تكون بين الزوجين حتى نبتعد عن اللوم والمشاكل عيشي حياتج بسلام دون مشاكل

ما ننسى انفسنا بمشتريات المهر والى الخ ……

صارت عدكم فلوس المهر يلا كل يوم طلعه للسوق واكل خارج البيت نرجع اخر اليوم ووالتعب واصل بينا نروح ننام؟:schmoll::schmoll: بشره تعبانه جسم تعبان والشعر تعبان والعيون من كثر قله النوع والطله من الصبح سود والارهاق يا ويلي :whistling: نكعد ثاني يوم نفس الحاله صار وكت العرس قرب يوم العرس واحنا نشوف حالنا بالمرايا لالالالا معقول ليش بشرتي تعبانة ليش انا هيجي ما بقى شي للعرس شلون وشنو الحل

الاخطاء

ان نقطي العيوب بالمكياج واللبس اكبر غلط نسوي هيجي لازم بفتره الخطوبه نهتم بانفسنا ونسوي لنا جدول نمشي عليه حتى تكونين اميرة بيوم عرسج

انتي اميرة انتي عروسه ادلعي ودللي نفسج لاتنكدين على حالج وتشيلين هموم الدنيا لان انتي اميره الكون لاتتحرمين نفسج من شي ابدا هيا من اجمل ايام العمر

اكيد حالتنا راح تتغير ونكون على اعصابنا ونفكر كثير بس لازم ما نخلي التفكير يا ثر علينا نفكر بالعرس والزفة والخطبة والملجه وكل هاي الامور ان شاء الله كلها تنحل بس راحت بالنا هيا اهم شي بالموضوع

الرجيم

اكبر غلط نشوي رجيم اول شي ما راح توصلون للشي الي انتم ترديونة بفترة قصيرة بس راح نتعب نفسنا ووجهنا يكون باهت واسود واصفر وضعيف ما يفيد لا مكياج ولا كريمات ولا شي اكلي كل الي نفسج بس بس طبعا بعض الاشياء لا

نبتعد عن المشروبا ت الغازيه
عن الزيوت

من اهم الوجبات هيى وجبة الفطور الصبح تغي زين بس وره الساعه 6 العصر حاولي تاكين خفيف حتى تبدين تمشين على النظام هذا مع الرياضة

الرياضة هيى الاهم

طبعا الي عدها الة لعب بلبيت يكون افضل والي ما عدها تكدر تسوي جدول تلعب في الصباح وفي المساء احسن من الرجيم القاتل

ه وانتي كاعده بلبيت الصبح بعد ما تتفطرين اذا عندج وسادة لظهرج تجيبها وتسوين بيها التمارين وهاي بعض متن تمارين البطن والى الخ

يتبــــــــــــــــــــــــــــــــــــــــــع

تحتاجين مثل هاي الوساده لظهرج حتى تسوين عليها تمارين الصباح والمساء

خلصنا من الرياضة والرجيم بفترة الخطوبة علشان نهتم بروحنا وما نهمل حالنا فترة الخطوبة علشان ورانا عرس وزفه وناس :tooth::tooth::wavetowel2:

نرجع الى موضوع البشره والجسم كيف نهتم بحالنا بفترة الخطوبه

من كل ما نشوف خلطه بالا نترنيت او بسوق جبناها وجربناها على وجهنا دون ما نعرف سلبيات هاي الخلطه لالا اكبر غلط احنا ما عدنا وكت كثير يمكن شهر لو اثنين ما في وكت نسوي اغلاط ونروح نعالجها ورانا عرس مثل ما قلت لكم اليوم يا ورودنا راح انطيكم فكره عن الخلطات الي انا استخدمها والي امشي عليها من سنة ونص وما شاء الله روعه ونعومة وفايدة اهتميت بنفسي والحمدالله نتيجه رائعة واميرة بيوم عرسي :wavetowel2:
انا راح اذكرها لكم كلها وانتم تسون لكم جدول كل يوم تمشون على شي بدون خربطه يلا بسم الله وصلو على النبي ونبدي

نبدي اول شي بشعرنا ما انصحكم تسون خلطات بعدين الوكت اذا كان ضيق عدنا تيقى ريحة الزيوت بشعرنا مو حلوة يا فشلة واذا العريس يشتم الريحة الي مو حلوة زيوت والريحه قوية بشعرن لازم كل ما نسبح نسمي بسم الله نوعيت الشامبو اسالي شنو الشامبو الي يصير لشعرج انا استعمل هذا الشامبو والشهادة كان شعري يوكع وباهت وضعيف بس الحمدالله استمريت عليه فوك السنة وهسة روعه ما شاء الله وبقيت علية وما اكدر استغني عنة

واستعمل ماسك لشعري موجود بكل الاماكن عدكم بس تسالون على نوعية الشعر تستعملينة بعد من تغسلين شعرج بالشامبو وهو مبلل تهدين شعرج كله وتبقين ربع ساعة بعدين تغسلينة بس بماء فاتر مرتين بلاسبوع

قصي اطراف شعرج

من تتحممين وانتي طالعه من الحمام تكرمون……….
انتبهي اذا في بقاية شعر طايح بالبانيو تعودي وانتي في بيت اهلج لان الرجل ما يحب هذا الشي ابدا لازم ننتهى على هذا الشي لان جدا مهم

اغسلي شعرج يوم واتركي يومين لان مو زين نتحمم كل يوم لا تمشطين شعرج وهو مبلل لان راح يتساقط حاولي تمشكين شعرج تخلين شي تحت فوطة حتى الشعر ما يملي المكان

شنو الخلطات الي عدكم بثلاجتكم ؟
من الخلطات الي ما استغني عنها خلطع بنت عذاري فديتها

ما شاء الله الخلطه خلصت ههههههه

والتعليمات موجودة بموضوع بنت عذراي شلون تسخدمونه لا تتركونة اكيد انا احجي لاني جربته روووووووووووووووعه فادني كثير طبعا انا من النوع الي اذا صار شي ببشرتي لو اي شي ما اروح لدكتور الجلدية لا اكدر اعالج الشي هذا بنفسي ومن خلطاتي الي اثق بيها ومرجبتها وانتي بفترة الخطوبة محتاجة ان تهتمين بحالج حتى تطلعين قمر بيوم عرسج

الوصفة الساحرة الثانية الي امووووووووووووووووووت بيها فديت الي سوتها ههههه:wavetowel2:
ايضا من بنت عذراي الوردة وصفة شهرة العسل الروعه

هاي الوصفة مهمة جدا بالنسبة الية جربتها والشهادة لله انطتني نعومة ورقة غير متوقعة نصيحتي الكم لكل العرايس يجربوها بفترة حتى بيوم العرس من تدخلين تتحممين تخلينها طبعا التعلميات موجودة بموضوع بنت عذراي
انا استخدمها بلاسبوع 3 مرات من ضمن الجدول مالتي الي بديت بي من اول يوم الخطوبه لحين هذا اليوم

جمال ونعومة اليدين

طبعا ما ننسى ادينا الهم هميه بعد كبيره لازم من ضمن اهتماماتنا يكون لنا جدول بتنظيف ادينا ونهتم بيهم من السواد والخشونة والى الخ………….

لازم يكون عدنا بلبيت مزيل الصبغ من الاظافر

اول الوصفات الي انا استخدمها لتنعيم الايدين

من بنت عذاري الوردة يعطيها الف عافية والله

هاي الوصفة لازم تكون من ضمن الجدول الاسبوعي واكيد كل التعليمات بنت عذراي كاتبتها لكم بالموضوع هاي الطريقة الاولى والي انا استخدمها من ضمن اهتماماتي

الطريقة الثانية

نحتاج الى ملح ليمون حليب شوية زبدة عسل تخلطين المواد كلها مع بعض
بعدين نحتاج الى فرشة اسنان تغطين ايدج بالمواد كلها وتبقين بلطف جدا تفركين بلاظافر حتى ينشال اللحم الزايد من المكان وتنظيف اظافرج بس مكان الاظافر فقط

اخر شي ندهم ادينا بكريم خاص لليدين

الوصفة نسويها بليل حتى ما نرجع نغسل شي ويتخربط كل شي سوينا :tooth:

شنو نحتاج بعد

هسة نرجع كيف نتهم بجسمنا طبعا مو تفكرون ان البشره هيا الاهم ولازم نهتم بيها لان بشرتنا الكل يشوفها وجسمنا محد يشوفة لا طبعا انتم راح تتزوجون اكيد :icon9: لذالك مثل ما نهتم ببشرتنا الخارجية نهتم بكل شي داخلي مع استخدم خلطة شهر العسل وهناك وصفات راح اذكرها الكم

كيف نسوي جدول؟

الاثنين
الثلاثاء
الاربعاء
الخميس
الجمعه
السبت
الاحد

اليوم الاثنين ادخلي للحمام ( تكرمون ) فلي شعرج كله سوي مثل الكبه فوك اذا تكدرين تلبسين اذا عندج حجاب مشخل لايلون بعدين تسكرين كل الشبابيك دون دخول الهواء طبعا طبعا انا عندي بالحمام مخلية ستار على البانيوووو حتى البخار ما يطلع بعدين تحضرين الليف ماسك للبشره سائل الاستحمام الشامبوو صابونة وخيار

متى نبدي بهذا النظام

قبل الزواج بشهر يكون احسن حتى تاخذين وقتج براحه ان شاء الله

حتى نسوي بخار لجسمنا مع بشرتنا مع بعض وبنفس الوكت

طبعا انا استخدم ماسك وهو بنفس الوكت غسول للبشرة روعه موجود بكل الدول الخليجية والاوروبية انا اشتري من اوروبا وعندي واحد اجاني من دولة الخليج وهسة الي لونة برتقالي والي لونة اخضر هذا غسول خاص للبشره وصابونة والشامبوووو

هاي صورة الماسك عن قرب الي اشتريتة من الخليج والي من اوروبا حتى تشوفن شكلة واضح

تدهنون بي الوجه كله ما عدا تحت العيون

بعدين تملون البانيو ماء حار طبعا

بعدين تخلون العطور الي تحبونها وتستعملونها بلبيت مع اللياف

بعد ما خلصنا من ملي البانيو بالماء الحار اول شي طبعا ننظف جسمنا عدل بللياف بس مو بقوى برقة بعدين نخلي الماسك على بشرتنا

نخلي شي تحت راسنا فوطة ونخلي خيار على محيط العينين ونرتاح وما نفكر بشي طبعا

معلومه

الحمار البخار نسوي بلاسبوع 3 مرات او 4 مرات بليل قبل ما انام

بهاي الطريقة نسوي

بعدين انام على الماء المنعش :shiny::shiny::shiny:

نبقى من نص ساعة ما فوق من نحس براحه تامه نكوم من الماء نفك شعرنا ونغسلة بالشامبو بعدين نخلي ماسك الشعر ورة ربع ساعة نغسلة بس بماء فاتر نشيلة ننشفة اول مرة عدل بعدين ندهن جسمنا باي كريم انتم تستخدمونة انا استخدم كريم بطعم جوز الهند روووووووووووعه بعدين من ينشف شعرنا نمشطة وانام :tooth:

قبل ما انام ندهن بشرتنا بكريم ما قبل النوم حتى نكعد الصبح منورين

هسة نجي كيف ننظف جسمنا من الشعر؟ طبعا ابتعدو من الموس والاشياء الي تكثر الشعر استخدمو او الحولاة او الة نزع الشعر نجي ثاني يوم طبعا لازم قبل العرس بفترة اسبوعين لاتشيلون الشعر ابدا من يقرب العرس نجي اول شي نجيب الحلاوة لو الة نزع الشعر

طبعا بعد ما نخلص من التنظيف نرجع لخلطة شهر العسل من بنت عذراي انا تقريبا من سنة وانا استخدمها بعد الحلاوة والله انها روووووووووعه بعد الحلاوة جربو وما تندمون

يتبـــــــــــــــــــــــــــــــــــــــــــــــ ـــع

لازم يكون عدنا بلبيت كل هاي الاشياء

كريم للجسم كريم لليدين معطر الجسم كريم للاستحمام بودي ماسك للبشرة

كريم مرطب للبشرة بالصبار لازم كل يوم قبل ما ننام ندهن وجهنا

دوش لجسمنا :tooth:

كيف نعتني بالقدمين ؟

طبعا شي جدا بسيط لازم نعتني برجليسنا بعد وما ننساهم صحيح :schmoll:
كل يوم لحد ما يجي العرس نسوي نجيب كريم ندهن رجلينا عدل نبقى شوية نفرك بيهم بعدين نجيب اكياس لايلون نلفهم عدا بعدين نلبس جواريب شوفو النعومة بعدين والبياض شلون وادعولي :flower:

يتبع

دش للجسم :tooth:

كريم القدمين مهم جدا

الطريقة نحتاج الى كريم للقدمين اكياس لايلون جواريب

ندهن القدمين عدل بعدين نفركهم 10 دقائق بعدين نلبس اكياس اللايلون ونلبس الجواريب يوم كل كامل كل يوم لحين يوم الزواج بعدين راح تشوفون نعومه ورقة وبياض مو طبيعي وادعولي

كبسولات الفيتامين

ما استغني عنهن بعض استخدمهم بوصفات بنت عذراي وانا بعض مرات قبل ما انام امسح وارش وجهي كلة كبسولة واحدة وانام تكعدون الصبح وجهم منور وشاد

فائدة الخيار والبطاطة والتفاح

بين يوم ويوم وانتي كاعدة ما عندج شغل قشري خيار او بطاطة او تفاحة امسحي وجهج بيهن لحد ما تملين او نامي وخلي على عيونج على محيط العينين

دردشة

النوم الكافي شرب الماء من اهم الاهتمامات الي اسويها طول الفترة هاي والاكثار من الفواكهة لان البشرة تحتاج الى الفواكه

هسة نجي لاهم خطوة راح نسويها :shiny:

بخار الوجة

أهم فوائد حمام البخار للوجه هي

زيادة تنشيط وتحسين الدورة الدموية في البشرة ، والعمل على تفتيح المسام للتخلص من أكبر قدر ممكن من الإفرازات الدهنيةوالسوائل الزائدة والمواد الضارة …

من أجل الحصول على بشره نظيفة بطريقه مثالية

ملاحظات أثناء عمل حمام البخار

قبل استخدام حمام البخار يجب غسل الوجه جيدا وإزالة جميع مواد الماكياج… ثم تغطية شعر الرأس بواسطة فوطة أو إيشارب لمنع تسرب البخار إليه وكذلك التركيز على بشرة الوجه .

نحتاج الى فوطة عادية عسل

بابونج

كريم ويفضل كريم بنت عذراي كريم اللــــــــــؤؤ

اول طريقة انظف بشرتنا من الاوساج وبقايا المكياج تماما

إذا كانت البشرة مصابة بأي التهابات أو حب شباب أو البقع الملونة، فينبغي استخدام الدواء أو الدهانات الخاصة بعلاج مثل هذه الحالات عقب الانتهاء من حمام البخار مباشرة حيث تكون جميع المسام متفتحة .. ولديها الاستعداد التام لتقبل مثل هذه المواد العلاجية .

اذا كانت بشرتنا جافة نستخدم كريم يكون افضل كريم بنت عذراي او اي كريم عدكم بلبيت واذا كانت دهنية انا استخدم العسل بعد ما اخلص من تنظيف بشرتي من المكياج والى الخ …..
ادهن بشرتي بالعسل او الكريم ما عدا محيط العينين بعدين املي الة البخار بالماء واخلي البابونج وشوية ماء ورد ادخل وجهي بعد ما الف شعري دون تساقط ادخل وجهي واغطي وجهي بالماء البخاري لمدة 10 الة ربع ساعة من اخلص من البخار

بعدين اجيب قطنة وامسج بيها وجهي مع التدليك الناعم

بعدين اغسل وجهي بماء بارد

بعدين استخدم خلطة الببن مع الخميرة وشوية عسل

املي بيها وجهي دون محيط العينين

لمدة ربع ساعة بعدين اشيل قناع اللبن مع الخميرة

اغسل بماء فاتر معتدل بعدين اخلي مرطب لبشرتي عادي وما شاء الله على النعومة والراحه

معلومه اخرى

انا دائما من ارجع للبيت حتى اريح بشرتي من التعب والمكياج طول اليوم اغسل البشرة عدل بعدين اخلي قناع اللبن مع الخميرة شوية عسل لمدة 10 دقائق

جدا مهم يا بنات نسوي لبشرتنا مساج وتدليك بس الحين نحتاج الى مساعدة من طرف اخر
اخت لو صديقة لو ام بين يوم ويوم جدا مفيد
شلون نسوي المساج وشنو نحتاج طبعا عدنا عدت طرق

الطريقة الاولى

نحتاج الى الكبسولات الفيتامين تجي المساعدة الج تخلي الكبسولة كلها على وجهك وتبقى تدليك وتسوي لج مساج لمدة نص ساعة برقة تامة

او كريم عادي

نصيحة مهمة

بنات الماسكات والاقنعة مهمة جدا ولكن لازم نحذر وما نتسرع ونجرب كل شي على وجهنا دون ما نعرف شنو سلبيات هاي الوصفة مو كل ما نشوف شي جربنا لازم نثق بالوصفة اولا مضمونة هل هيا مجربة بعدين راح نندم ونحتاج وكت حتى نتعالج واحنا ما نمالك كل هذا الوكت

حاولي تاخذين كل شي طبيعي وما تخافين من اي شي حسي براحة والاهم من تسوين الخلطة لو اي شي صفي النية وثقي انها بتجيب نتيجة اذا انتي بتخلين اي وصفة ومن داخللج تقولين لا ما راح تنفع ما تجيب نتيجة ترا فعلا ما تجيب نتيجة الاهم تسمين بسم الله وخلي بداخلج انها بتجيب نتيجة حلوة ان شاء الله

اجيب سطل مدور كبير اخلي بي حليب وقوالب ثلج

واقط وجهي بي لمدة دقيقتين واطلع ومرى اخرى وهكذا لمدة 10 دقائق بعدين من اخلص اخلي مرطب كريم لوجهي وخيار وانام ارتاح :tooth:

وما ننسى اسنانا يا بنات لازم نعتني بيهم قبل الزواج لازم نروح لدكتور الاسنان ونكشف عليهم

بسم الله الرحمن الرحيم

اهمية النظام الاسبوعي

اهم شي بنات انكم تسون لكم جدول اسبوعي بكل هاي الاشياء وحتى بعد الزواج من تتزوجون لازم نسوي النا جدول نعرف شنو بي وما يضيع دون فايدة ونعرف يوم نهتم بشنو وبشنو والافضل من يكون الزوج خارج البيت الوحدة تكدر تاخذ راحتها جدا حتى من يرجع يشوف عروستة اميرة الدنيا كلها

بيوم الملجة ما ننسى شي والاهم سلة الملجة الي ننخلي بيها الكاسات والحلو

في اشياء كثيرة ما نتذكرها بعدين نقول لنفسنا نسيت فلان وفلان شي بيوم الملجلة بيوم الخطبة او يوم العرس لو بشهر العسل ربي يجعل ايامكم كلها عسل بعسل

مو ننسى كامرتنا من نسافر بشهر العسل

نكمل الموضوع

:wavetowel2::wavetowel2: اكيد تعبتو ومن كثرة الموضوع وصارت عدكم خربطه بس تحملوني شوية رجعت لكم مرة ثانية بوصفة جديدة انا استخدمها روووووووووووووعه وطبعا من بنت عذراي بنت عذراي راح تهرب مني هههههههههه:tooth: المهم نرجع لمحوار حديثنا يا بنات الخلطة الي راح احجيلها الكم هيى وصفة رهيب انا جربتها هيا وصفة مقشر شهر

كل التعليمات موجودة بموضوع بنت عذراي لازم تكون هاي الوصفة من ضمن يومياتكم الاسبوعية

وهذا سائل الاستحمام

ما لازم ننساة ابدا

هسة شوفو فكرة عن يوم الملجة

كاسات يوم المهر يوم الملجه

انصحكم الوحدة اذا كانت معصبة تشرب قهوى على الاقل كوب كابجينو تريح اعصابها

هسة نرجع لمشتريات المهر

طبعا اول شي نسوية جنطتين الجنطة الاولى نخلي بيها الملابس العادية ملابس الطلعة البنطرونات الجنز التنورات والجنطة الثانية نخلي بيها الملابس الناعمة ملابس النوم الداخلية والحجابات والشيال وجنطة صغيرة للمكياج وجنطة نخلي بيها الكريمات الحلاوة الة نزع الشعر كريمات الجسم والبشرة والى الخ ……….

هاي جنطة الملابس الناعمة الي بيها ملابس النوم والحجابات وخلي مع الملابس بخور :shiny:

وهاي جنطة الملابس الكبيرة

المكياج طبعا اشتري من كل شي قطعة مو تكثرين لان المكياج ما يطير هههههه:wavetowel2:

ما ننسى شنو نحتاج بشطنة العسل

جنطة صغيرة للمكياج مع قطن للبشرة نمسج المكياج

وفراشتنا مرة ثانية اذكركم بيها يا بنوتات يا حلوات

مو تثقلو بلاغراض والجنطة بعدين تتعبون بدون فايدة تكون متوسطة جنطة صغيرونة ومرتبة

جهزي جنطتج قبل كل يوم مو بسرعة بعدين تنسون نص الاغراض ههههههه ويا فشلة اذا نسينا شي مهم

وقبل لانحط المكياج اكيد بنظف بشرتنا فلا تنسون مجموعة تنظيف البشرة

بعض المستلزمات الجانبية والضرووووورية :

الأستشوااااااااااااااار مهم مهم مهم مهم

الملابـــــــس والاكسسوار :

اياك عروستنا تغلطين وتودين تجهيزك كله السفر ….بيكون تعب عليك وعلى زوجك ….. بعد تحديد مدة شهر العسل تقدرين تحددين كمية الملابس المطلوبه والي هي :

1- قمصان نوم ( بكل أنواعها طويل وقصير )

– بجامات ( سواء صيفيه شورتات أوشتويه على حسب البلد )

– أطقم داخليه ( مايمنع تاخذين اطقمك كلها لانها هي الي تستهلك أكثر )

تنانير وحركات دلع قصيــره
5- ملابس للطلعات المميزه .. مثلا عشا في الفندق أوغيره بتحتاجين ملابس كشخه وغير عن الملابس العمليه

6- أحذيـــه عملــــيه لان شهر العسل معروف انه كله حركه وتجوال فلاتتعبين رجلك وبتلقين أحذيه عمليه وراقيه في نفس الوقت

7- شيل وعبايات ( للي تلبس )

8- اكسسوارات الشعــر

9- طقــــــم فــــوط لك ….. ولزوجك

10- بالنسبه للذهب والالماس … نصيحه لاتاخذون معاكم الا الي بتلبسونه يعني الدبله طبعا على كم حلق وكم خاتم وتعليقتين او 3 … يعني مب تاخذووون الذهب كله معاكــــم
11لاتنسي كمان الجلابية لو بتحبيهاا

فترة الخطوبه

الخطوبة..فترة قد تطول أو تقصر، ُيمني الشاب فيها نفسه بحياة جديدة وسعيدة،

تعد فترة الخطبة هي مرحلة الإعداد والتعارف الذهبية التي تكلل بالزواج السعيد الذي يستمر طوال رحلة الحياة.
فكيف تضمنين نجاح الخطبة لتحقق حلم العمر؟ وكيف تستفيدين من الخطبة في إرساء قواعد الزواج الناجح الذي يتمتع بالاستقرار وبالسعادة؟
وماذا يفعل الخطيبان إذا تسرب للعلاقة بينهما بعض من الملل أو الفتور، أو ظهرت بعض المشكلات التي تهدد استمرار الخطبة وتتويجها بالزواج؟

تتسرعي في إصدار الحكم على شخصية الخاطب أو المخطوبة، إذ إن جوانب الشخصية ومميزاتها لا تظهر إلا من خلال التعامل.
ـ من المهم ألا تلجئين إلى الارتباط بالخطبة تحت ضغط ظروف معينة، أو هرباً من مشكلة أو صدمة ما أو تحت ضغط أحد أفراد الأسرة بدون موافقتك الشخصية. فأساس نجاح الخطبة هو الاقتناع الكامل المتبادل من الطرفين، الذي لا يزال أو يتغير بتغير الظروف.
ـ المصارحة والأمانة في عرض الحقائق من البداية، توفران الكثير من المشكلات التي قد تظهر بعد ذلك.
ـ يجب ألا تكون نظرتك إلى الطرف الآخر نظرة خيالية بحيث يخيل لك أن هذا الشخص سيصنع الأعاجيب، وسيقتحم كافة الصعوبات، حتى يتحقق لك سعادتك. فالواقع يتطلب مشاركة كل من الطرفين مشاركة واقعية.
ـ في بداية فترة الخطبة، عادة ما ينشغل الخطيبان بفرحة إتمام الخطبة، وتهنئة الأهل والأصدقاء، ويشعر كل منهما بأنه الأول في حياة الطرف الآخر، مما يؤدي إلى صرف النظر ـ لبعض الوقت ـ عن بعض نقاط الضعف في شخصية الآخر. وهنا يجب عليك أن تسأل نفسك فور ظهور أي شيء قد لا يتفق مع ميولك أو مزاجك في شخصية الآخر: هل يمكن أن أتغاضى عن هذه النقطة؟ وهل نستطيع تغييرها معاً في المستقبل بود وتفاهم؟ أو هل سأنجح في التكيف مع هذا العيب مثلاً؟
ولا تنسين أن تسألي نفسك كذلك عن نقاط ضعفك التي تتطلب تفاهماً وقبولاً من الطرف الآخر.

اتمنى من العلي الغدير اني وفيت وياكم بهذا الموضوع وكدرت اقدم لكل عروس مخطوبة جديدة او على وشك الزواج ان تستفيد من موضعي هذا وتجاربي الموضوع من جدهي الخاص وهو لمنتدى وبنات عروسي فقط لا احلل لاي وحدة تنقلة دون ذكر المصدر لموقع عروس وهنالك تجارب كثيرة لكل وحدة منا مرت بفترة الخطبة هاي هديتي لكم قبل ما اسافر ان شاء الله بعون الله وان شاء الله عندي الوكت الكافي البي اكدر ارد على اسئلتكم وتسلاتكم عن الموضوع عندي وكت لمدة 12 يوم ان شاء الله قبل ما اسافر ان شاء الله هديتي لكم تكون جميلة وراح تستفادون منها جميع يا عرايسنا

نهاية الموضوع والحمدالله

اتمنى ما اكون ثقلت عليكم ومع السلامه

الينبـــــــــــــــــــــوعه