شخبار عرايسنا الحلوين… عساكم بصحة و عافية…
اليوم عالغدا جازفت و ألفت من راسي هالطبخة، و طلعت الحمد لله لذيييذة، و أهم شي إنها عجبت أبو الشباب :cool2:
و سويت معاها رز بالليمون، لكن هذا أخذت طريقته من Jamie Oliver…
ما أطول عليكم، و بسم الله نبدأ…
الكمية تكفي شخصين…
4 شرايح فيليه… أنا استخدمت هامور
ربع كوب زيت زيتون
طحين
التتبيلة:
بصلة صغيرة مفرومة (اللي ما يحب البصل ممكن يستغني عنه)
عصير ليمونة…استخدمت الليمون الأصفر الكبير
بشر ليمونة
قرن فلفل أخضر حار مفروم (إختياري)
ملعقة كبيرة خل أبيض
ملعقة صغيرة ملح
ملعقة صغيرة طحين
2 ملعقة كبيرة زبدة
ملعقة كبيرة شبت مفروم، أو بقدونس
نخلط البصل و عصير الليمون و القشر و الخل و الملح مع بعض، بعدين نضيف لهم الفيليه و نقلبهم…
نترك السمك يتتبل، لمدة نص ساعة أو ساعة… و نحركه من وقت لوقت عشان يتشرب السمك زين…
في هالوقت نجهز الرز…
كوب رز، مغسول و منقوع
ملعقة صغيرة ملح
2 ملعقة كبيرة زيت
ملعقة صغيرة حبوب الخردل
ورقة غار
بشر ليمونة
عصير نص ليمونة
ملعقة كبيرة كزبرة مفرومة
نسلق الرز مع الملح، نص سلق… بعدين نصفيه…
في نفس القدر، نحمي الزيت و نضيف له الخردل و ورق الغار… و نخليه لحد ما تبدأ حبوب الخردل تتفرقع…
بعدين نضيف له الرز مع عصير و قشر الليمون و الكزبرة…
نخلطهم مع بعض، نغطي القدر و نخليه على نار هااااادية…
الحين نرجع لهامورنا 
نحمي مقدار زيت الزيتون في مقلى كبير، و على جنب بيكون عندنا صحن نحط فيه كمية من الطحين… نرفع السمك من التتبيلة (ونحتفظ بالتتبيلة) و نغمسه بالطحين، و ننفضه عشان نتخلص من الطحين الزايد… (ما صورت هالخطوة عشان يدي كانت مشغولة )
نبدأ نحمر السمك على نار متوسطة من كل الجهات، و نتأكد إنها استوت من داخل…
و في هالوقت نسوي صوص الليمون…
في مقلى صغير، نذوب الزبدة والطحين (اللي بقوا معانا من مقادير التتبيلة)… بعدين نضيف لهم بالتدريج تتبيلة السمك اللي احتفظنا فيها… ونحرك لحد ما يختلطون و يصير عندنا صوص ثقيل شوي… و آخر شي نضيف الشبت المفروم…
إذا حسيتوا إن الصوص ثقيل كثير، خففوه بشوية ماء… (حتى هذي الخطوة ما صورتها لأني كنت مستعجلة)
الحين نقدم الأكل في طبق بيكون فيه الرز و على جنب فيليه الهامور مع صوص الليمون…
و هذا الشكل النهائي…
إن شاء الله يكون عجبكم، و تجربونه (f)
و ألف صحة و عافية على قلوبكم (f)
ما شـــــــــــــــــــــــــاااء الله
داااائما تتحفينا بأطباقكم الجديدة والمميزة
تسلمين يالغالية
مشكورة جدا على مجهودك الرائع.
:9_28::9_28::9_28:[/FRAME]
امممممم
عاد اليوم مشتريه فيليه سمك
بجربه باذن الله
تسلم ايدك طبعا مو غريبه عليش متعودين على اكلاتج
الحلوه الي تفتح النفس
الله يسعدكم و يبارك فيكم (f)