.:: نصائح تستحق التجربه ::. 2024.

السلام عليكم ورحمة الله وبركاته

اليوم يا أخواتي العزيزيات ..

بكتب لكم عن بعض التجارب الي اسويها بالبيت والي لاقت نجاح ببيتي

أول شي أحب اني اذكر إن الموضوع منوع بعض الشئ

يعني ما يخص النظافه بس الموضوع يخص عن كيفية إدارة بيتك وبأحسن الطرق ..

نبتدي بعون الله

أممم قرأت بأحد المواضيع بأحد المنتديات عن طريقة تجعل الملابس أكثر بياضا

فحبيت اجرب وبعدين اكتب عن تجربتي ….

لما تنقعين الثياب البيضاء مع مسحوق التنظيف اي كان نوعه ضيفي كاس من الزيت مثل العربي أو العافيه

ولازم يكون الماء المستخدم للنقع مياه حاره …

كاتبة الموضوع كاتبه ينقع الثياب ليله كامله ولكن انا نقعته لمدة ساعه واحده

وبصراحه النتيجه روعه روعه روعه بعد ما شلت الثياب من الحوض المخصص للنقع خليته بالغساله كالعاده

وبعد ما نشف الثياب يا الله بصراحه النتيجه كانت ممتازه ثياب ناصعة البياض بدون كلوركس …

إلي غسالتها موصل بمويه حاره ممكن تنقع الثياب فيه وبعد ساعه تخلي الغساله تشتغل وبتحصل على نفس النتيجه

الي غسالتها مو موصله بماء حار ممكن تنقع كل الثياب البيضه عندها بالبانيو وطبعا بالبانيو في مياه حاره بالتأكيد ..

طبعا بعد ما شفت النتيجه الرائعه صرت ما استغني عن هالطريقه لأن الثياب البيضه تكون كريه وهي مايله للصفار

………………………………………….. ………………………

طبعا في ربات بيوت يحذفون بقايا الصابون المستخدم للجسم لو صار حجمها صغير صح ….

لأن شكلها كريه بالحمام و ما اعتقد ان استخدامه بيكون سهل على افراد العائله لصغر حجم الصابون المستخدم

فأنا عن نفسي اخذ البقايا واخليهم مع الثياب الملونه بالغساله يعطيها رائحه حلوه ونفس الوقت استعملتها بشي

مفيد وتقدرين تقللين نسبة الصابون العادي المستخدم للثياب لأنك حطيتي صابون اضافي إلي هو بقايا صابون الجسم

………………………………………….. ……………………

كان عندي كولونيا للأطفال من بيبي جونسون كنت استخدمه لأطفالي بعد الاستحمام لتعطير جسمهم

ولكن لاحظت ان أطفالي من النوع الحساس يعني جلدهم حساس ما يستحمل الكولونيا المباشر على الجسم

فأستخدمت الكولونيا لبلاط الحمام بعد ما اخلص التنظيف آخر شي كم نقطه على البلاط وخلاص

لاحظت ان اليوم الثاني زوجي يسئلني وش الريحه الجديده بالحمام ريحه مريحه وناعمه

حتى لما خلصت العبوه رحت وشريت عبوه ثانيه وصارت الريحه مميزه صديقتي تقول أيش تستخدمين لتعطير الحمام

وقلت لها الطريقه قالت لي انتي مجنونه لأنها ما توقعت ان السر بكلونيا الاطفال إلي كان بالنسبه لي كنت

راح ارميه لأن ما صار لي به عوزه

…………………………………………..…………………

إلي عندها حديقه أو مكان صغير ببيتها مزروع أنواع الزرع الي تحبه

وإلي تحب الزراعه والاهتمام بالزرع

بقول لك طريقه سويها ببيتك حتى لو ما عندك مكان تزرعين

جيبي اصيص وخلي فيه السماد الخاص للزرع

ولما تجيبين لك بقدونس او كزبره او نعناع طازج وتبين تحفظينه

انصحك انك تزرعيه بالأصيص

واقطفي كل يوم من البقدونس و الكزيره الطازجه من بيتك

أو حتى النعناع للشاي دائما بيكون متواجد عندك وتحت يدك بأي وقت

الطريقه عزيزتي لما تجيبين رزمه من البقدونس مثلا اخذي من الرزمه عدد اثنين

واحفري بصبعك داخل السماد وحطيه وارويه ماء كل يوم راح تلاحظين انها ذبلت

لكن بعد ثلاث ايام او اربع ايام متواصلين راح تشوفين انها تعاود اليها الحياه وتكبر

وكلما تكبر قصي من فوق على قد ما تحتاجين وخلي البقايا ينزرع ويكبر …

طبعا الطريقه غريبه عليكم ولكن صدقيني ان الزرع لما تحطينه بالسماد راح يرجع ينزرع لها جذور ..

استفيدي عزيزتي من هالطريقه ..

راح اقول لك كيف ؟؟

مثلا رحتي بيت صديقتك وشفتي بحديقتها نوع من انواع الزرع وانعجبتي فيها …

ما يحتاج تروحين تشترين أستأذني منها واخذي من الزرع نفسه ولما ترجعين البيت على طول

حطيه بالسماد وارويه ماء وبتلاقينه بعد ايام ان شاء الله يكبر ويصير عندك الزرع الي تحبينه موجود ببيتك ..

علشان تحافظين على جودة السماد ..

عزيزتي لا ترمين قشر البيض اكسريه صغار واخلطيه باالسماد الي عندك لأن القشر فيه مواد تحافظ على نوعية السماد الممتاز ……

حتى الشاي الي نستخدمه اخلطيه مع السماد وشوفي كيف ان السماد راح يتفاعل مع النبات بالاسابيع القادمه لأنك

جددتي نوعية السماد بالمواد الموجوده بالشاي ..

خواتي انا اتبع هذي الطرق بحديقتي بالبيت واتمنى انكم تستفيدون منها …

………………………………………….. ……………………

كل يوم نغسل الحمام واحيانا بالفلاش…

وبعد تكرار عملية التنظيف الكثيره بالحمام

أكيد تلاحظون ان البلاط به فراغات بالزوايا صح ؟؟

أنا اقصد مادة الجبس الموجوده بين زوايا البلاط …

عزيزتي حاولي انك تحتفظين بالجبس البودره تلاقينها بمحلات البناء

كل ستة شهور على الاقل خذي كاسين من الجبس مع كاسين من الماء

واعملي العجينه امسحي على الفراغات

وصدقيني انك راح تلاحظين ان حمامك نور كأنهم توهم مركبين لك البلاط

………………………………………….. ……………………………..

أكره شي بحياتي كان لما تجيني بنتي وتقول عندنا اليوم حفظ الدرس

مثل آيه او قصيده …

كنت اكره قعدتي وانا احفظها ..

ولقيت الحل اني اخليه تجلس على الكرسي بالمطبخ وانا اطبخ العشاء مثلا

اتكلم واخليها تردد وتردد معي الين ما نخلص اشوي اشوي

يعني كل فقره او آيه عشر مرات وانا معها وعشر مرات هي بروحها وانا مشغوله بالمطبخ

يعني أثنين بواحد تكملين شغلك ولا تزهقين من القعده معها ويكون قعدتكم ممله وتحس انها مجبوره على الحفظ

ومنها انها راح تكون مبسوطه بقعدتها لأن البنات او الاطفال عامتا يحبون التواجد بالمطبخ مع الأم

أحيانا وانا اكوي الثياب أحفظ ولدي جدول الظرب مع انه لسه ما عطوه لاحظت السنه بعد ما عطوه تحفيظ جدول الظرب

إن ولدي لسه حافظ الجدول كله كنت حابه اشغله بدل النطنطه على الكنب عرفت ان الاطفال ما شاء الله

ذاكرتهم قويه

………………………………………….. ……………..

إن شاء الله الموضوع عجبكم

وشكرا لتواصلكم مقدما
طبعا الموضوع منقول لما فيه من الاشياء المفيده