مساء الحب/صباح الحب
لكل اللي بمرون وبشاركونه بآرائهم صراحه في بالي موضوع مهم واعتقد الغالبيه يعانون منه انا عن نفسي للحين ماصرت ام وان شاء الله في القريب العاجل بس من اللي الاحظه
1)هل تشوفون من حق الأهل سواء من جهة الأم او الأب المشاركة والتدخل في توجيه وتربية الأبناء؟
2)ولو كنتو تشوفون ان مو من حقهم هالشي فما هو السبب من وجهة نظركم؟
3)ولو كنتو تشوفون ان بالعكس من حقهم التدخل فهل تدخلهم يكون بحدود او يكون لهم الحريه المطلقه في توجيهم؟
4)ولو كنتي تعارضيين احد يدخل في توجيه وتربية ابنائج فشنو الطريقه اللي ممكن تفهميين فيها الطرف الثاني ان ما تبينه يدخل بدون ما تزعلينه او تجرحيين مشاعره او تسببين اي حزازيات او مشاكل لا سمح الله؟
5)هل عندكم تجارب شخصيه حول هالموضوع ياريت تخبرونه عنهم؟
بقولكم ليش طرى في بالي هالموضوع اللي الاحظه في جيل الامهات الحالي (البعض وليس الكل) اعتمادهم الكلي على الأهل في ان يمسكون اطفالهم ويراعونهم خصوصا لو كانت الأم عامله كل هذا حلو وبارد لكن لما تسمع اي توجيه من الجده او الجد خصوصا لو كانت من ناحية اهل الزوج تشوفينها تضايق وممكن تصير مشاكل فيعني بقولكم موقف بسيط صار من جم يوم خلاني اكتب هالموضوع عندي بنت اخت صغيره ما تجاوز عمرها السنه والنص متعلمه حركه غلط ودائما تكررها فابوها قام يضربها على بوزها(فمها) وطبعا الياهل في هالسن ما يفهم فامي تدخلت ومنعته ان يضرب البنت لانها صغيره وما تفهم فرد عليها انا ابوها وامها موجوده (بما معنى احنا حريين في بنتنا) فاهني احترت مع من الحق وهل فعلا انتو الامهات تكرهون احد يعطيكم توجيهات لطريقه التعامل مع ابنائكم ولو ماعجبكم التوجيه شنو الأسلوب اللي يفهم الطرف الثاني بطريقه ما تجرحه او تضايقه والموقف مجرد مثال يعني ممكن تصير مواقف ثانيه يعني لا تاخذون المثال كمبدأ نبي نسمع عن مواقفكم وآرائكم وتجاربكم عن هالموضوع واعذروني كلامي ملخبط بين اللهجه العاميه والفصحى بس ان شاء الله وصل البوينت اللي ابي اوصله اننطر تفاعلكم
اني اؤيد ان الأهل يتدخلون في تربية الطفل و يوجهون له الملاحظات اذا الطفل تصرف غلط او ضرب احد اطفال العائلة
وانا عندي انهم يتدخلون بالحريةالمطلقة لأنهم مثل عيالهم اكيد مثل ما ربونا يعرفون يربون عيالنا
وزتسلمين اختي على الموضوع
الله يتمم عليش و تربين البيبي أحسن تربية
1)هل تشوفون من حق الأهل سواء من جهة الأم او الأب المشاركة والتدخل في توجيه وتربية الأبناء؟
المشاركة ممكن لكن التدخل نوووووو إلا إذا تطلب الأمر …. ما يتدخلون في كل كبيرة و صغيرة
أما المشاركة فالوحدة بدون مشاركة الأهل سواء أهلها او اهل الزوج و خصوصا للمرأة العاملة أو حتى مو عاملة
مثلا تحتاج تروح مكان أو لا سمح الله صارت مريضة أو صار لها ظرف طارئ لازم مشاركة الأهل ان يشيلون عنها
عن نفسي أشوف الطرفين ما أستغنى عنهم مثل ما أحتاجهم يحتاجوني
2)ولو كنتو تشوفون ان مو من حقهم هالشي فما هو السبب من وجهة نظركم؟
وضحت رأيي إن مع المشاركة
3)ولو كنتو تشوفون ان بالعكس من حقهم التدخل فهل تدخلهم يكون بحدود او يكون لهم الحريه المطلقه في توجيهم؟
طبعا بحدود
يعني إذا واحد من الأبناء مو قادرة أعرف أتصرف وياه ممكن أطلب مشورتهم بحكم الخبرة و ممكن أحد من الأهل يكون قريب للطفل و يسمع منه و ممكن يؤثر عليه يعني بحدود و في أوقات معينة و حسب نوعية المشكلة
4)ولو كنتي تعارضيين احد يدخل في توجيه وتربية ابنائج فشنو الطريقه اللي ممكن تفهميين فيها الطرف الثاني ان ما تبينه يدخل بدون ما تزعلينه او تجرحيين مشاعره او تسببين اي حزازيات او مشاكل لا سمح الله؟
إذا ما حابة تدخله …. اكلمه بروحنا و أشكره و أقوله (تدخلك يعني حبك و إهتمامك لنا بس خلني أتدخل بروحي و أحاول أحل المشكلة إذا ما قدرت أكيد بطلب مساعدتك ) أو أقول (أدري ما تقصر و عندك خبرة في التربية بس ممكن ميول إولادي ما تعرفها فخلني أجرب أربيهم بطريقتي و بستشيرك في بعض الأمور ) طبعا بإسلوب بعيد عن العصبية
5)هل عندكم تجارب شخصيه حول هالموضوع ياريت تخبرونه عنهم؟
لا ما عندي خخخخخ
لأن ما عندي أحد يتدخل … لكن بعض الأحيان أطلب من ماما إنها شوي تدخل لأن أمي ربت أولادي و تعرفهم زين و يحبونها واجد يعني تملك التأثير عليهم
أوافقها الرأي بس طبعا مو التدخل المطلق
لكن مثلا لو صار شئ و أني ما أدري عنه و أتدخل عمهم لو خالهم و حسيت إن في مصلحة أولادي أكيد ما بقول شئ لأن ينصب في مصلحتهم
و أهلي يحبوني أكيد يحبون مصلحة أولادي
يعني مستحيل أوقف في وجه عمهم لو خالهم لو جدهم إذا كان الموضوع يهم مصلحة اولادي
لكن لو يتدخلون في أشياء تضر أولادي ما برضى
مثلا أني لو عاقبت ولدي بسبب خطأ سواه و يجي جدي و يقول لي خليه لا تعاقبينه و يهاوشني أكيد ما برضى هالتدخل لأنه ما بيتعلم الصح