يسألوني عن سر الرائحة 2024.

السلام عليكم ورحمة الله وبركاته

فن العطور فن لايتقنه الاقلة وهذا سبب اننا نقول والله فلانة ريحتها تهبل تمشي وراها واذا حضرت مجلس عرفنا انها موجودة بمجرد نشم الريحة والسر هنا مو في معرفتها بعالم العطور وبس ..هي اكيد تتقن فن اقتناء العطر المميز وفن ابراز العطر من حيث مزجه مع مكونات ثانية وكمان هي تعرف وش يناسب كيمياء جسمها واكيد قبل كل شي هي انسانة تحب النظافة لأن العطر مايظهر الا بالجسم النظيف ومو شرط انها تقتني اي صرعة جديدة في عالم العطور ممكن يكون عطرها قديم او نازل قبل خمس سنين وبغض النظر عن سعر العطر بس هي ابتكرت طريقة مميزة تبرز فيها ريحة مميزة ..

مثلا جدتي ام امي الله يطول بعمرها اعتبرها فنانة لما تتعطر رغم ان الجدات ماعندهم خيارات مثلنا بس والله من يوم وعيت عالدنيا ونا اعرف اي شئ متعلق بجدتي من ريحتها المميزة هي كانت تسوي بخورها الخاص فيها ومخلطاتها وشي اسمه زباد تخلطه مع اشياء غريبة ويدهنو فيه شعورهم ريحته تفضل في الشعر 3 ايام او اكثر وكل ماقعد بردت ريحته اكثر ..وكانت تستخدم عطور رخيصة تعرفو زمان الامكانيات كيف كانت والسوق ماكان يوفر اللي يوفره بالوقت الحالي المهم مرة ضاعت طرحتها بزوواج ونا افرفر في الصالة ادورها والاقي كذا طرحة والوانها متشابهة بس عرفت اميز حق جدتي من ريحتها ..طولت عليكم بس ان شاء الله الفكرة تكون واصلة

قبل الزواج ماكنت مهتمة يدوبك اشتري عطر وبعد الاستحمام ابخبخ واذا زودتها مره حطيت مسحتين عطر زيتي او دهن عود .. اما بعد الزواج العطر من ضروريات زينة المرأة لزوجها ..فصرت ابحث كثير وكل مارحت سوق اخذ التستر واشمه لين اليوم الثاني والعطور اللي اجربها ماتقل عن 3 انواع وصار بالفترة الاخيرة اميل للعطور العميقة اللي تحلى ريحتها مع مرور الوقت وغالبا تكون عطور قديمة مميزة ..

منها اقتنيت امبر روز وكانت ريحته باودر خالص وكان جميل حتى لو انحط لوحده ..بس اللي طلع معاي اني اسنخدمته بطريقة وطلع غاية في الجمال ومميز وانسألت عنه والريحة ظلت ماسكة فيني يوم كامل والطريقة :

اول شي استحمام بجل شاور القرشي بالمسك للجسم والشعر بأي شامبو تحبي بعدين استخدمي زيت جونسون البيور وجسمك ندي واطلعي بروب الحمام وقد لفيتي شعرك بالمنشفة امسحي اطراف شعرك بدهن عود او مسك افضل مسك هو مسك العروسة من القرشي بس كان مخلص فاستخدمت المسك الأبيض من الرحاب تبع بزورتي ريحته هادية ودهني جسمك بلوشن المسك للقرشي اهم شي الاطراف رجولك ويداتك لأنك رطبتي الجسم بجونسون قبل واستخدمي مزيل عرق افضل شي بالباودر او المسك انا بستخدم ليدي سبيد ستيك بالباودر وهذي صورته :

وحطي نقط من المسك على اماكن النبض معصم يداتك خلف الركب و تحت الاذن ..وبخري شعرك واذا لبستي اخر شي بخري ملابسك وانتي لابسه فوقها قميص صلاتك عشان اللبس يتشبع بالريحه وقميصك يكون معطر عالدوام وانتي تقابلي ربك ..تعالي بعدها شوفي الريحة.. راقية ورايقة مو مزعجة وكمان فواحة بنفس الوقت تحسي انك اميرة …

وهذي صورة مجموعتي :

بالنسبة اللي ماتلاقي عطر امبر روز لأنه مابيتوفر بأي مكان عندك عطر شرير تو او عطر نيوتس وهم من نفس الشركة برضه ريحتهم روعه كل مابردو ومع البخور يجننو..

ان شاء الله اكون افدتكم ولو بالقليل …

الموضوع مجهود شخصي وغير منقول اللي تبغا تنقله مافي مانع بس تذكر المصدر وانتظروني بالمواضيع الجاية باذن الله