قصة بنتي وشوكة السمك ورحمه رب العالمين 2024.

والحين بقول لكم قصة بنتي اللي عمرها سنه و5 شهور اللي انتهت بفضل ورحمه من الله على خير

في يوم الجمعه الماضيه كالعاده كان غداي عند بيت هلي وزوجي رايح رحله مع

ربعه كان غداهم سمك وقعدنا ناكل وبتتي الله يحفظها كالعاده قاعده تدور حوالينا

وكل ما جات عند وحده من خواتي اعطتها لقمه من السمك وفجأه قامت تصيح

وطلعت الاكل من فمها ومب قادره تبلع اي شي حتى الماي مب قادره تشربه وتقول

ماما وتأشر بصبعها على فمها وهنا عرفنا انها شوكه من السمك واقفه في حلقها امي

جابت لها تمر عشان تنزل الشوكه بس هي ما رضت تاكله عيت تاكل اي شي

وقامت ترجع وتصيح وتقول ماما وترجع عورت قلبي فديتها قمت حطيت صبعي

في فمها قلت يمكن تطلع الشوكه بس بدون فايده المهم طرنا فيها على المستشفى

وكشف عليها الدكتور بس ما قدر يشوف شي لانها صغيره وحلقها صغير وما تعرف

تفتحه صياح وبس المهم قال سوي لها اشعه ويوم سويناها طلعت الشوكه موجوده

تحت اللوزه بشوي وقالتلي الممرضه حقت الاشعه عطيها موز بتنزل الشوكه جبنا

لها موز وكلت منه شوي بس بدون فايده وجابو لي دكتور استشاري حنجره وقال

لازم تمسكينها عدل وتفتحين فمها بالقوه عشان اطلعها ولا بحولها عمليه وهنا حسيت

الدنيا الواسعه ضاقت بي ومب قادره اوقف على رجولي قلت خلاص يا دكتور

بنحاول معاها كذا مره لين ما تطلع الشوكه قمت مسكت بنتي بالقوه وهي تصيح

وفتحت فمها قام الدكتور دخل الملقاط عشان يشيل الشوكه اول مره ما قدر قال

محاوله مره ثانيه وهي ميته من الصياح بعد ما قدر وفي المره الثالثه دخل الملقاط

ويوم طلعه طلع معاه دم ومع هذا كله ماطلعت الشوكه انا يوم شفت الدم مت من

الخوف ما ادري ايش سوى في بنتي اكيد جرح لها بلعومها وما يندرى بعد ايش

بيسوي بعد فيها احس انه مب شايف شي داخل وانه قاعد يكشف على الفاضي لانه

كل ما دخل الملقط قال مب شايف شي قمت من الكرسي انا وبنتي وقلت له بروح

بره اسكتها من الصياح وبرجع لك مره ثانيه ويوم طلعت من الباب على طول للباب

الرئيسي قالو لي خواتي وين رايحه قلت البيت قالو ليش قلت ربي اللي خلا الشوكه

توقف في بلعوم بنتي قادر على انزالها والله يا بنات ان الكلام اللي طلع مني كان

من صميم قلبي وعقلي وكلي ثقه بالله انه ماراح يخذلني وركبت السياره وانا ادعي

ربي انه يحلها من عنده واقول في نفسي يا رب انا داخله عليك فلا تردني يا رب لا

حول لنا ولا قوه الا بك وعلى طول طلعت صدقه لله بكل الفلوس الموجوده في

الشنطه هذا كله وانا في طريقي للبيت و طلعت المرضاعه وقامت ترضع قلت الحمد

لله هذه تباشير خير ونامت فديتها بعد معاناه صياح وترجيع ونسيت اقولكم انها

طول هذه الفتره فاتحه فمها ما تقدر تبلع حتى ريقها كان يطلع بره واقعد امسحه لها

كانت تعور القلب ورجعت البيت وصليت العصر وصلاه الحاجه وتميت

اسمي و اقرأ عليها ما تيسر من القران وادعي ربي انها تقوم من النوم سليمه

معافاه من شوكه السمك ومن ملقاط الدكتور واول ما صحت من النوم اعطيتها ماي

زمزم مقري فيه قامت تناضرني بعيونها وانا ماسكه قلبي واقول يارب تكون

الشوكه نزلت وشفت فمها لقيته مسكر وقالت ماما قلت لها قومي البسي النعال

عشان نروح الالعاب ابي اشوفها ايش بتسوي رجعت لطبيعتها والا للحين قامت الله

يحفظها تلبس في النعال وشافت جدتها وقال جده تعال يعني يلا معانا انا هنا سجدت

شكر لله على النعمه وهي انزال الشوكه من عنده بدون دكتور ولا عمليه فله الحمد

حمدا كثيرا مباركا فيه وهذه يا بنات فصة بنتي وانا اسفه على الاطاله والسموحه يا

الغالين

نسيت اقولكم ان من ذاك اليوم ما خليت احد يأكل بنتي السمك انا بس اللي اعطيها