هذا البسكويت الإيطالي من عائلة الماكروون، لأن أساسه هو المارينغ… و في الطريقة هنا يدخل معاه اللوز!
يمكن ذقتوه في المقاهي لأنهم عادة يقدمون قطعه منه مع كوب القهوة!
هذا النوع بالذات له أكثر من طريقة، و جربت كذا وحدة لحد ما وصلت للطعم و الشكل اللي أبيه…
الأماريتي يكون قوامه خفيف و هش، و ممكن نقدمه مع الحلويات مثل الآيسكريم أو البارفيه و يكون مجروش على الوجه أو مخلوط معاه، و اللي يتابع Giada de Laurentiis بتلاحظون إنها تستخدمه كثير حتى مع الباستا 
خطواته جداً سهلة و طعمه لذيييييذ لآخر حد!
نبدأ بسم الله…
نحمي الفرن على حرارة 350 فهرنهايت = 180 مئوية، و نجهز صينيتين و نفرشهم بورق الزبدة أو السيليكون، و إذا مو متوفر نستخدم صواني تيفال مدهونة بالزبدة، لأن هذا النوع من البسكويت يلزق في الصينية!
بنحتاج:
المواد الجافة:
1 ملعقة كبيرة طحين
1 ملعقة كبيرة نشا
1 ملعقة صغيرة قرفة
كوب لوز مطحون (مو مهم إذا كان اللوز مقشر أو لا)
ثلث كوب سكر
1 ملعقة كبيرة بشر ليمون
في البداية ننخل الطحين و النشا و القرفة و نضيفهم لباقي المقادير…
نخلطهم مع بعض و نتركهم على جنب، أفضل أخلطهم بالمضرب السلك اليدوي للتخلص من التكتلات…
الخطوة الثانية (المارينغ):
بياض بيضتين
ثلث كوب سكر
في وعاء صغير نخلط البياض حتى ينفش (هذي الخطوة أساسية، لازم نتأكد إن البياض نافش و متماسك)
و نضيف له السكر بالتدريج (نضيف تقريباً مقدار ملعقة صغيرة كل مرة) مع الإستمرار بالخفق بعد كل إضافة، حتى نحصل خليط قوامه مثل الكريمة، و يكون لامع و متماسك!
نضيف المارينغ لمقدار المواد الجافة و نخلطها بملعقة خشب أو السباتولا من تحت لفوق و بخفة حتى تندمج المقادير…
نوزع الخليط في الصواني، أنا حطيته بكيس كريمة، و استخدمت القمع الدائري بدون زخرفة، لكن هذي الخطوة مو ضرورية، و عادة أوزعه بالملعقة، آخذ مقدار ملعقة صغيرة و أنزله بالصينية بمساعدة ملعقة ثانية، و مو ضروري يكون الشكل مرتب!
حاولوا و انتوا توزعون الخليط إن القطع ما تكون مسطحة، يعني خلوها تصير مرتفعة فيها قمم، لأنها بالفرن تسيح و تتسطح شوي!
و مثل ما ذكرت، كل حبة يكون مقدارها تقريباً ملعقة صغيرة أو أكثر بشوي، و هالكمية عبت لي 3 صواني!
ندخل الصواني الفرن (و يفضل كل صينية لحالها)، على الرف الأوسط و لمدة ربع ساعة بالضبط!
و لما نطلعهم من الفرن، نتركهم يبردون 5 دقايق بعدين نرفعهم من الصينية بحذر حتى ما يتكسرون!
و ممكن بعد ما يبرد تماماً تحتفظون فيه في علبة ضاغطة للهوا لمدة 3 أيام أو أكثر على حسب رطوبة الجو! هذا إذا بقى منه شي 
و هذا شكل الأماريتي
أتمنى إنكم تجربونه، لأن ريحته لحالها تكفي، و صدقوني طعمه لا يقاوم!
و بالعافية F:
تسلم أيدينج حـبيبتي
بصراحه كل طبخج أضمنه وماتردد في تطبيقه لان ذوقج عالي بالطبخ ولج نفس زي مابيقولون
يعطيج العافيه ويحقق لج كل أمنياتج
^^
عوافي على قلبج
من جد الموضوع مرتب ومنسق بشكل يفتح النفس
عوآآآآآآآآآآآآآفي
مميز بجد
شكله حلووو وسهل جداً ..
إن شاء الله بجربه قريبا ً
:032:
يعطيك العافيه ديزي :032:
تسلمي وبجد شكله روعة
يعطيك العافية يارب
كما تعودنا منك الجديد واللذيذ كتير عجبني كانه جاهز ما شاء الله
والله يعطيكِ العافية