السلام عليكم ورحمة الله وبركاته
هذي اول مشاركه لي في هالقسم و حبيت اني افيدكم ولو بشي بسيط بأني اعرض منتجات العناية بشعري واعطيكم فكره عن المنتجات الي فادتني وطبعا كل الي بذكره عباره عن تجربه و آراء شخصيه.
بعطيكم فكره سريعه عن نوعية شعري.. شعري دهني لعادي فالجذور وجاف نوعا ما عند الاطراف او من الجزءالسفلي للشعر ان صح التعبير.. سبب الجفاف هو كثرة الصبغات ويت فتره ما كنت اهتم فيه ابدا يعني ما كنت استخدم اي كريمات غير الشامبو و البلسم وحمام الزيت احيانا وبعدين لاحظت انه بدا يتساقط بشكل كبير والحمدلله ان شعري غليظ ولا جان قرعت هههه المهم اني بعدين اهتميت اول شي بأكلي و التغذية السليمه هي اهم شي وهذا روحه موضوع ثاني لو تكلمنا عنه.. كعناية خارجية اول شي سويته اني قصيت شعري للنص لانه كان طويل بس ما كان صحي والشي الثاني اني وقفت استشور شعري الا للضروره و طبعا الضروره اقصد المناسبات فالعزايم او العيد وشعري وايد تحسن وخف الجفاف وايد وبتكلم الحين عن المنتجات الي ساعدتني
كنت استخدم شامبوو بلسم تريسمي
وكان مناسبني بس غيرته لاني كنت محتاجه لشامبو يعالج الجفاف ويرمم الشعر وكنت ملاحظه ان وايد بنات في اليوتيوب يمدحون منتجات ماكديميا وكل مره كنت اسير نزيه كنت اشتري شي من منتجاتهم و يعيبني و ارد آخذ شي ثاني يعني مب كل شي خذته مره وحده
عائلة الماكديميا :032: طبعا هالعائله غنيه عن التعريف وصارت مشهوره و وايد بنات صارو مايستخدمون الا منتجانهم الي تحتوي على زيوت ومن ضمنها زيت الارجان على حسب كلام البياعه
نبدا بالشامبو وخذت اكبر حجم لان اوريدي كنت ماخذه سامبل للشامبو من عندهم و عيبني و رديت خذت اكبر حجم من شهور و لين الحين ما خلص يعني حجم توفيري وريحته حلوه ويوم اغسل شعري ماحس انه يجف بعد التشطيف قبل لا احط الي كريم مرطب
حجمه 1 لتر و سعره ب 250 درهم واسمه Rejuvenating Shampoo
كريم اسمه Nourishing Leave-In Cream حجمه 300 مل وسعره ب 108 درهم واستخدمه اثناء التمشيط اذا شعري جاف شوي وناشف مب مبلل
اسبري No Tangle حجمه 100 مل وسعره 80 درهم ومن كثر مااستخدمه مابقى منه الا شوي واكيد برد اشتريه مره ثانيه و ثالثه و استخدمه دوم.. ارش شوي ع كامل شعري للجزء السفلي يعني بدون الجذور ويعطي انتعاش للشعر
اسمه Healing Oil Treatment حجمه 10 مل واظني سعره بشي وثلاثين ورغم انه صغير بعدني ما خلصته لاني دوم انسى انه موجود وله اكثر عن طريقه فالاستخدام بانه ممكن ينحط عالشعر مباشره قريب من الجذور او آخذ منه قطرتين واخلطه مع الماسك الي بذكره بعد شوي وينحط عالشعر عشر دقايق
نيي للماسك الي دووووم مخلص في نزيه واضطر آخذ العينات الصغيره الي تكون ما شامبو وسيروم و الماسك طبعا ومن احلى الماسكات الي استخدمتها فعلا يرطب الشعر ويهديه حتى بعد التنشف احس ان شعري بعده رطب وناعم وهاي هي صورته
ولي زياره قريبه ان شاء الله لنزيه و اتمنى اني احصله هالمره بس عندي بدايل لكريمات ثانيه احبها ونتيجتها حلوه بعد
هالبلسم مثلا جدا ممتاز ويرطب الشعر اسمه Conditioning Balm Nourishes and Repairs Dry, Stressed Hair من ماركة Matrix وكان عندي الشامبو لنفس الماركه بس مارديت اشتريته لاني اكتفيت بشامبو ماكديميا.. ماذكر سعره بس فوق الاميه خذته من صالون وممكن تلقونه فبعض الصيدليات..
البديل الثاني هو هذا الكريم بزيت الزيتون كنت اشتريه من الصالون ب 50 درهم وريحته رووعه واستخدامه وايد حلو ونصحت خواتي فيه وكلهم عيبهم وقبل فتره قصيره كنت سايره السوق الصيني لشغله وانصدمت لقيته هناك ينباع في كشك بشي وثلاثين قلت يمكن مب هو بس فتحته وجربته وجفت ان هو نفسه ونفس الريحه وخذت منه اثنين
ومن كارفور آخذ نفس هالكريم بس الي بالثوم وكان مخلص جان آخذ هذا بس لونه ما شجعني هههه الثاني الي بالثوم من الكريمات الي احبها وترطيبها حلو بس مب دوم احصله فيوم احصله آخذ مؤونه هههه
هالكونديشنر خذته من الصالون ومدحولي اياه بس بعدني ماستخدمته وبخبركم عنه ان شاء الله اذا نفعني بعد الاستخدام
كريم من لاش اسمه R&B Revive & Balance finishing hair moisturiser احب ريحته واستخدامه حلو بس ما ناسبني لانه وايد كريمي ويدهن شعري خاصه اذا استخدمته وقررت اني استشور شعري اليوم الثاني احس ان تأثيره قوي وابدا مايضبط الاستشوار عسب جي وقفت استخدمه وبما اني قاعده اتكلم عن لاش بخبركم عن الشاامبو الي استخدمته
اسمه Rehab shampoo بزيت الزيتون و استخدامه حلو كاستخدام خفيف.. بالنسبه لي ماناسبني وايد لاني احط زيت فشعري لمدة ساعتين وبعدين اغسله واذا استخدمت هالشامبو فالغسيل احس ان فروة راسي تحرقني.. ماعرف كيف هالشامبو احسه حار.. مره عقب ماستخدمته حطيت سيروم عالجذور وحسيت بحرقان فظيع وانا ع بالي انه من السيروم وبعدين اكتشفت انه من الشامبو.. احسه نوعا ما يهيج فروة الراس او يمكن ما ناسبني انا!!
شامبو Daddy-o استخدمته فالفتره الي كنت صابغه شعري بلون فاتح لان هو شامبو لاي شعر لونه فاتح سواء اشقر او بني و كان يحافظ عاللون.. والكونديشنر American cream قبل كل شي ريحته وايد حلوه ريحة الميلك شيك هههه ويرطب الشعر ترطيب حلو بس ما اعطيه 10 من 10 يمكن بيناسب الي شعرهم خفيف لان شعري غليظ
هالكريم كنت استخدمه من قبل كنت سارقتنه من اختي هههه وعقب ما خلص طلبتها تاخذلي واحد من الصالون الي تسيرله فبوظبي لان ما لقيته فالصوالين الي اسيرها فدبي وهالكريم وااايد حلو خاصه قبل الاستشوار لان يحمي الشعر من الحراره و يرطب الشعر بطريقه حلوه بدون مايدهنه ويستحق اني اقول عنه روووعه
هالكريم كنت استخدمه قبل ما استخدم كريمات ماكديميا و كان يمشي الحال يعني ممكن يكون بديل مؤقت لحالات الطوارئ هههه
نتكلم الحين عن السيروم من ويلا وخذتهم من الصالون
هالسيروم بعدني ماستخدمته لان عندي غيره استخدمه حاليا ويوم بيخلص بستخدم هالسيروم بس اختي بعد خذت نفس هالسيروم يوم انا خذته ومدحته بعد الاستخدام
هالسيروم الي استخدمه حاليا للجذور مع مساج خفيف و جدا جدا حبيته لانه يعطي لمعان للشعر بطريقه صحيه ويرقد الشعرات الي دوم اطير فالهوا هههه والاهم انه مايعطي المنظر المدهن للشعر يعطي منظر صحي ويوم احطه يسألوني شو مسويه فشعرج شكله مرتب ويلمع :slaugh:
هالسيروم من Paul Mitchell ماستخدمه حاليا ومثل ما انتو شايفين ما بقى منه الا شي بسيط ومن احلى السيرومات الي استخدمتها ويستخدم حتى بعد الاستشوار ويعطي منظر حلو للشعر.. كانت تستخدمه فشعري الحرمه الي تسوي شعري فالصالون وكان يعيبني شكل شعري بعد ماتحطه وطلبتها واحد وفعلا روعه..
هالسيروم هو البديل للسيروم الي قبله وتقريبا نفس النتيجه وبعد خذته من الصالون واستخدمه لاطراف شعري و استخدمه عقب الاستشوار وبكل الحالات يعطي نتايج روعه
زيوت الشعر دخلتها ضمن روتين العناية بشعري واسبوعيا احط فشعري الزيت مع مساج خفيف واخليه لمدة ساعتين واغسله.. كنت اشتري زيوت مختلفه على حسب الي اقتنع فيها من خلال قرايتي عن كل زيت فالنت واخلطها واحطها فشعري.. ويوم كنت اسير الصالون واسوي حمام زيت لشعري كنت الاحظ انها تسخن الزيت وتغمس حبة قطن فالزيت وتعصر القطنه وهي توزع الزيت ع فروة راسي وتكرر العمليه ع كامل فروة الراس وبعدين تحط الي باقي ع كامل الشعر وتسوي مساج.. اشتريت من عندها الزيت لان حبيت خلطتهم احسها نفعت شعري وايد و اسوي نفس الي ذكرته روحي فالبيت
صوره لبعض الزيوت الي كنت استخدهم
زيت الارجان المعروف انه مفيد للشعر و البشره.. آخذ منه شي بسط وامسحه بايدي شوي واحطه على اطراف شعري عشان يمنع التقصف او الجفاف
نيي للامشطه الي استخدمها.. هالمشط من صيدلية بوتس ومهم جدا ان المشط الي نستخدمه مايطيح الشعر..
مشط ماكديميا No Tangle وفعلا نو تانقل يعني ماتحسين وانتي تمشطين شعري بأي عقدة فالشعر او حتى اي ألم بسيط من الشد للشعر وروعه هالمشط وحالته نفس حالة الماسك انه دوم مخلص.. كنت ابى آخذ لبنت اختي الصغيره لانها وايد حبته تقول مايعور بس ما لقيت..
مشط صغير للشنطه من محل هيلو كيتي والصراحه انه ابدا مب صحي ويعور ويسحب الشعر وماقمت استخدمه
امشطة الاستشورا واغلبها من نزيه واكثر مشط مكروف هو البني أظني واضح هههه لان شعيراته مب وايد قويه واحلى مشط استشوار استخدمته مايجلع الشعر وايد
هالامشطة الي يستخدمونها اكثر شي فالصوالين وخذتهم بس ماستخدمتهم مادري احسهم يضرون الشعر لانهم حديد ومع الحراره احس ان ممكن يتأذى الشعر اكثر من الامشطه الخشب.. هذا تحليلي انا هههه كل مابى استخدمهم اتيني هالفكره الي مادري اذا كانت صح او غلط 
wYfv:
wYfv:
الكليبس الي استخدمهم لشعري اثناء الاستشوار لان تقسيم الشعر بطريقه صحيحه وايد مهم عشان قدر ما نقدر نخفف ضرر الاستشوار
استشواري الي استخدمه بس مثل ما خبرتكم اني حاليا ماستخدمه
سيراميك بيبي ليس من نزيه
بيبي ليس هير كيرلير وبعد من نزيه
بعض الاشيا الي ممكن استخدمهم مع الهير كيرلير
وهالسيراميك الي من آخر مشترياتي استخدمها لقصتي او مقدمة الشعر بما اني حابه ابتعد عن الاستشوار وقلت اجرب سيراميك جوس ايبر و لين الحين مرتاحه وايد باستخدامه احسن من البيبي لس
الشي الي بعدني حابه اجربه هو الشامبو الباودر الجاف واول ما ألقى شي اقتنع فيه بحط رفيو عنه
اتمنى اني فدتكم ومعظم المنتجات الي ذكرتها خذتهم من الصوالين لاني قمت احاول اعتني بشعري بروحي وكل ماسرت اي صالون ادور احسن المنتجات الي عندهم واشتريها اما منتجات ماكديميا تلقونها عند نزيه وبالنسبه لي معظم الاحيان اشتريهم من فرع الاتحاد مول بما انه مول صغير وعند الجمعيه ومافيه اي زحمه فافضل هالفرع ولو عندكم اي استفسار ان شاء الله بجاوبكم بلي اعرفه 
جميله جداً منتجات ومجوعه العنايه بشعرك .. ربي يجعل شعرك من اروع ما يكون بس نصيحه قللي من الاستشوار والسيراميك خصوصا السيراميك مضر جداً
روووععععععععععععععة , حبيبتي بخصوص السيراميك نصيحه نصيحه نصيحه لا تستخدمينه إلا قليل لأن طيح شعري بشكلل مو طبيعي وربي إني ندمانه نفسي شعري يرجع مثل اول , اولا يحرق الشعرة يعني لازم تقصينها ويخرب ويبهت مرة يعدم الشعر , بتوفيق .
تسلمي الغلا
مشكوووورة ياقمر 
مشكورة
ماشاء الله منتجات روعة وعسا شعرك كمان الله اتمم عليك وتخلصيهم بالهنا حبيبتي مجموعة المكداميا بس اخلص اللي عندي ناوية اشترها بس يلزمني اجمع شوية فلوس اختك مفلسة هههه
يسلمو……
يسلمووووو
يسلمووووووووو