حلو الشتاء الدافي حلاوة السميد مصوره من مطبخي 2024.

السلام عليكم ..
زمان ما نزلت موضوع بالقسم ..
بس الحلو اللي اخترته اليوم بينفع لأيام الشتا كتير لأنه بيتقدم سخن وما بياخد وقت .. يعني ممكن تعملي وضيوفك عندك ..
نيجي للطريقه :
المقادير :
كوب سميد
خمس اكواب ماء
2 كوب سكر
ملعقه او اكتر مرجرين او زبده
لوز للتزيين ..

الطريقه بسيطه كتير :
بنحط الزبده او المرجرين بالمقلى وبس يدوب بنضيف لهم كوب السميد وبنحمصه على ما يصير لونه اشقر ..

بنفس الوقت بنكون حطينا طنجره فيها كوبين السكر مع خمس اكواب الماء على النار ..وبنتركهم يغلوا ..

بعد هيك بنضيف السميد المحمص للماء والسكر وبنحركهم على النار الى ان يفتح السميد ويثقل الخليط ويتجانس ..

وما بننسى نضل نقلبهم بهالوقت ..والنتيجه انه بيجمد شوي وبتصير متل هيك :

بنسكبهم في صحون وبنزينهم باللوز المحمص وبنقدم حلاوة السميد وهي سخنه :

في ناس بيحبوا يحطوا بقلبه جبنة حلوم (بيضه )
انا ما كان عندي ..

صحتين وعافيه ..
رأيكم بيهمني اكيد .. بأنتظار ردودكم ..

تسلم أيدك على هالحلو الزاكي
أول مره أعرف طريقته سهله كثير

تسلم ايدك مشرفتنا (f)

اول مره اشوف هالحلى

شكله حلو وطريقته سهلة

تسلمي