الى الاخوة والاخوات الذين يعانون من تعرق الشديد تحت الابط
ويسبب احراجات وبقع تترك اثر على الملابس
انا ان شاء الله بعد 6 ايام راح اجرب ابرة البوتكس لاني اعاني من نفس المشكله
والكثير نصحوني بإبرة البوتكس لانها حقق نتائج مذهله
انتظروني سوف اعود لكم بعد النتيجه لاني اعرف معاناة من يشتكي من التعرق واحراجاته
لي عودة قريبه
و شكرا جزيلا على تفكيرك بأخواتك في المنتدى.. ونحن في انتظار تجربتك
موووووووفقه
اختي انا سويت العملية هذي واتمنى افيدج من تجربتي …. أول شي ماحد يحس بمعانات التعرق الا الي يعاني منه …. يعني الله لا يراويكم.. تلبسين القطعة يديدة خلال خمس دقايق انتهت بسبب شدة التعرق … العباه لازم تغيرنها مرتين في اليوم ومافي فايدة ..وناهيج عن الاحراج !!!
المهم جربت كل الطرق المعروفة وما نفع ،، ووايد ترددت قبل لا أسوي العملية لاني كنت خايفة انه يكون لها اثار جانبية والشي الي ما يشجع انها مب حل دايم ( 6-8 ) شهور ..
المهم في النهاية توكلت على الله وسويتها……………. والصراحة ما اقدر اوصفلج الأحساس العجيب من الراحة….. تلبسين الي تبينه حرير وغيره … شعور بالثقة ( حشى مسوية دعاية )
المهم اختي الصراحة العملية وايد مفيدة وانا انصح اي وحدة تعاني من التعرق انها ما تردد في انها تسويها .
بس لازم تراعين النقاط التالية المهمة :
1- بعد التوكل على الله… يجب اختيار الطبيب الموثوق والابتعاد على صالونات ومراكز التجميل لانه السالفة تحتاج خبرة ودرايه كافية .
2- التأكد من نوع البوتكس المستخدم في العملية لانه في انواع تجارية رخيصة وهذي بعيد الشر عن السامعين لها تأثيرات جانبية سيئة ( سبب استخدام البوتكس التجاري من قبل مراكز التجميل والصالونات الفرق الشاسع في السعر لانه البوتكس الأصلي سعره وايد غالي ).
3- انصحج فيه انج تستشيرين أكثر من طبيب في هل المجال لين ما تحصلين الطبيب الي يرتاح له قلبج ولا ادورين السعر الارخص لانه الي في فرق وايد في اسعارهم يمكن انهم ما يستخدمون البوتكس الاصلي .
4- لازم اتزيلين الشعر من تحت الأباط قبل العملية لانج اذا ما ازلتيه رح يشلونه بشفرة واذا انت مب متعودة تشلينة بشفرة بتكون العملية مزعجة والشعر بيطلع بسرعة .
5- يوم العملية البسي شي كت( يعني بدون اكمام حتى ما تطري تفصخين ملابسج )
واتمنى اني اكون افدتج واي سؤال أو استفسار انا حاضرة ..
غزل
كما وعدتكم عدت لكم بالنتيجه
كما قالت الاخت غزول بارك الله فيها
نعم انا اخذت حقن البوتكس عباره عن 200 ميلي في كل ابط والسعر 250 دينار كويتي
وسويتها في عياده دكتور ممتاز ومشهور صدقوني من الصعب اوصف لكم فرحتي
كنت بيت اليأس والنفرزه والضيقه واليوم ولله الحمد انا اسعد من كل سعيد
الي يعاني من التعرق الشديد لا يتردد
واي استفسار انا بالخدمه
ومبروك عليج الراحة
غزل
محد قال لكم من الدكاتره شو الجوانب السلبيه في الموضوع وبعدين انا سمعت انها مب زينه بس بصراحه ما اعرف اي شي عنها
على العموم الله يكفيكم شرها انشالله والله يهنيكن 
السموحه
كل الدكاترة أكدو لي ان مالها اي اعراض جانبية من أي نوع لا على المدى القريب ولا البعيد …………
وكل شي بيد الله
غــــــــــــــــزل
هي عباره عن ايش هالابره هذي ؟؟
حقن للغدد العرقيه او ايش بالضبط ؟
انا ما اشتكي منه لكن لمعلومه فقط ولان كثير من معارفي يشتكون منه
شكرا لك