اهلين اخواتي
بارك الله فيكم حبيت اعرف الجو عندكم كيف؟؟
والقريه العالميه فاتحه ولا لا؟
والتماشي احسن اقوملها الصبح ولا اخليها بعد الظهر ولا متى ؟
وايش احسن التماشي نظرا ان عندي 3 اطفال؟
واحسن الاسواق الي فيها ماركات عالميه للشناط؟
واحلى الاسواق حقات الجلابيات الغاليه والرخيصه؟
واطعم المطاعه ابي اذواقكم ماابي اسوي سيرتش بمواضيع قديمه؟
وولد وادي متى يفتح الساعه كم تقريبا؟
وابي اي شي عن ام خماس وين القاه عشان عيالي يموتون فيها ؟
وابي اسئل الدكتور المحرزي وين عيادته؟
ووين احسن مكان اجيب منه بنك مسكر العطر الي الكل يمدحه..او بالاحرى من وين اجيب عطوراتي احسن شي ابيها قويه ومركزه مو مغشوشه..
واحسن لايف ستايل؟
وايش تنصحوني لان رحلتي 7 ليالي فقط..
وايش تحذروني منه مااروحه او ماله داعي بايخ يضيع وقت عالفاضي..
وايش عندك تماشي فيها اكشن؟؟
والملاهي دبي لاند فتحوها؟؟؟
ووين في ملاهي كبيره مررره؟؟
الله الله فيني تراي ضيفه عندكم ومشهور عنكم كرم الاخلاق 
ابي بروقرام لناس راحو وش ينصحوني فيه لاني ماعرف التواقيت..
ووش في شي مميز بدبي مو موجود عندنا عشان اجيبه..
البخور الجلابيات الشيال كلش كلللللللللللللللللللللللش لا تبخلون عسى الله يجزاكم خير على كل حرف تكتبون…
والف شكر
وسبا وحركات بس للمحجبات
بالنسبه للجو فديتج هممم حر اشوي بس مرات في الليل اتحسين ان في هوا بارد…
اما بالنسبه للقريه لاااااا خلاص سكروها وعلى ماعتقد بيردون يفتحونها شهر 6 وبيخلونها دايمه…بس مادري جان شهر 6 الياي والا اللي بعده..
والتماشي احسن اقوملها الصبح ولا اخليها بعد الظهر ولا متى ؟
همممممم اذا تبين المراكز ماتكون زحمه وتاخذين راحتج سيري الصبح احسن وباقي الاماكن سيريلها العصر عشان الحر…
واحسن الاسواق الي فيها ماركات عالميه للشناط؟
اكبر مول عدنا هو مول الامارات وفيه كل الماركات..وغيرهم عندج برجمان..وافي..سيتي سنتر..دبي فستيفال سيتي..أبراج الامارات.. أب تاون روووووعه بس في الشتاااااا بس سيري شوفيه …ابن بطوطه حلوووو…سوق مدينة جميرا..
بالنسبه للمراكز الصغيره عندج..الريف مول..سنشري مول..حمرعين..مركز الغرير..مركز ميركاتو..مركز جميرا..مركز تاون سنتر
واحلى الاسواق حقات الجلابيات الغاليه والرخيصه؟
الجلابيات الغاليه بتحصلينهم في المراكز (مثال: اليشمك في مركز حمرعين أو الريف مول وبعد ماحيد فروعهم الثانيه)…وعندج راجو بلازا محل كبير عند مركز حمرعين..أما بالنسبه للجلابيات الرخيصه عندج سوق عكاظ عندهم وايد جلابيات….ووووو فريج المرر كله خياييط بس بتحصلين جلابيات جاهزه بعد.. همممم بعد عندج مركز بوهيل فيه جلابيات…
واطعم المطاعم ابي اذواقكم ماابي اسوي سيرتش بمواضيع قديمه؟
المطاعم جان تبين فنادق عندج فندق ماريوت فيه مطعم عجيب بوفيه وفيه كل الاكلات:لبنانيه–هنديه—ايطاليه
وفندق رافلز اللي عند وافي بعد عندهم بوفيه…فيه وايد مطاعم بس ماحيد اسامي المطاعم
فندق البستان روتانا فيه الاستيك هاوس..استيكهم حلو
فندق البستان..بلو ايليفانت (مطعم تايلندي)
فندق جراند حياة فيه مطعم لبناني اسمه أوتار..+رقاصه ههههههههههههه….
فندق جراند حياة فيه مطعم اسمه ماركت كافيه رووووووعه
أبراج الإمارات ..مطعم لبناني اسمه النافوره
فندق المطار ميلينيوم عندج مطعم ايطالي اسمه دافنجي
اعرف وايد مطاعم في الفنادق بس مابخلص لين باجر هههههههه
خليني اخبرج عن المطاعم العاديه
مطعم وافي قورميه في وافي..مطعم لبناني واكلهم لذيذ..خاصة الكوكتيل وورق العنب يمي يمي
مطعم صدف في شارع المكتوم(مطغم ايراني)
مطعم أرسلان في شارع المطينه(مطعم ايراني) بس طبعا عندهم اكلات صينيه وهنديه وغيرها
مطعم جوني روكتس في جميرا عندهم برجر بس مب اي برجر وااااااااااااااااايد لذيذ
مطعم جوني كارينوز مطعم ايطالي جدام سيتي سنتر انا ماعيبني اكلهم وايد مع ان وايدين يمدحونه
مطعم تشيليز في مركز الغرير
مطعم ماكروني(مطعم ايطالي) في دبي فستيفال سيتي
مطعم التنور في بردبي هو مطعم صغير ووايد عادي بس اكلهم لذييييييذ(مطعم هندي)
مطعم قصر الهند في شارع القرهود وايد راقي بس اكلهم اشوفه عادي مع ان وايدين يمدحونه
مطعم آشاز في وافي(مطعم هندي)
مطعم جازيبو ( هندي) في مركز بن سوقات والفرع الثاني في بردبي
مطعم قيصر (هندي) في شارع القرهود او القصيص او بردبي
مطعم Sea World مطعم المأكولات البحريه في شارع الشيخ زايد عند سيفستوي…واااايد لذيذ
مطعم حاتم في سيتي سنتر
عندج وايد مطاعم في شارع الرقه والمرقبات
مطعم كباب خاص..هو مطعم صغير وعادي في شارع المينا(قرب شارع الضيافه) بس تكة الدياي اوووفففف روووووووووووووعه
عندج وايد مطاعم حلللللوه في مرسى دبي ..أنصحج اتسيرين مرسى دبي روووعه في الليل
اميربه واااااااااااااااايد مطاعم بس مابخلص ههههههههه اذا خبرتج زياده بدوخج هههه
وولد وادي متى يفتح الساعه كم تقريبا؟
هممممم ماحيد والله
وابي اي شي عن ام خماس وين القاه عشان عيالي يموتون فيها ؟
اغراض أم خماس كانوا يبيعونها في القريه…بس انا شايفه بيجاماتهم في مركز البستان ..محل صغير مجابل الالعاب
وابي اسئل الدكتور المحرزي وين عيادته؟
ماعندي فكره حبيبتي
ووين احسن مكان اجيب منه بنك مسكر العطر الي الكل يمدحه..او بالاحرى من وين اجيب عطوراتي احسن شي ابيها قويه ومركزه مو مغشوشه..
عندج وايد محلات في المراكز..أجمل..الرصاصي..عبدالصمد القرشي..الياس..باريس غاليري..هارفي نيكلز..وجوه..
واذا عندج أي سؤال ثاني مايردج الا لسانج حبيبتي وحياج الله مره ثانيه
الاسبا عندج البيراميدز(الاهرامات) اللي عند وافي يمدحون الاسبا مالهم وووووو بعد ماتذكر وين..جان اتذكرت بخبرج فديتج…