السلام عليكم ورحمه الله وبركاته
مساكم سعادة ياربي وخير 
شخباركم جميعاً ؟!
من زمان ماكملت السلسلة النفسية بسبب الشسمه
بس اليوم بكمل الجزء الثاني..!
والي اهو جزء ضخم لو انتوا خذتوه على محمل الجد . .
سبق وقلت لكم ان الطاقة حولنا بشكل دائم بس المشكلة في نوعها
اما تكون ايجابيةوتجلب لنا الخير والمنفعة او تكون سلبية تضرنا بشكل كبير جدا وتعيق تقدمنا
معظمنا نعرف هالشي من احنا صغار بس مانعرف كيف يصير ..!
او دوم نعرف لما نتفائل بالزين والخير دوم تكون النتايج حلوة ومرضية
بس كيف ..!
العقل والقلب والاعضاء الجسمية تحتاج لغذاء روحي
مثلها مثلنا . .
تحتاج انها تكون مرتاحة وفرحانة عشان تأدي كل شي بشكل صحيح . .
يعني مالاحظت لو انت متضايق حتى طريقة ركضك تختلف ..!
لان اعضاءك ماتحس بانها " على مايرام "
وطبعا شي معروف . .
ليش لما نحزن حززن شديد نتضااايق واايد وقلبنا ينقبض ؟
لان القلب حزين
وهاي الشي مؤكد بشكل اكيد . .
طيب خلونا من هالنقطة . .
وخلونا ننقاش العلاج بالايحاء الايجابي
من فترة تعلمت شلون احلل الالوان
لون لون . . وكل شخصية لها لون يناسبها وشنو مايناسبها
وخلال بحثي حسيت ان للالوان علاقة قوية بالطاقة الي حولنا
لانها اساساً تشتغل ع هالناحية ..
فقلت شلون ندمج ذي × ذي
لما قدرت اخدم نفسي بطريقة حلوة تساعدني ع تخطي كل المشاكل النفسية بشربة ماي
طبعا هالشي مب براءة اختراع بس شي من استنتاجي . .
المهم
في البداية كنت جد جد محتاجة لدعم نفسي قوي من نفسي خصوصا اني ماقدرت احصله من برا
او ساعات تحس بمذلة تعرف يعني تخاف تشكي والناس تتأفأف ويقولون اووه كاهو يه راعي الشكاوي . .
فتبي تشكي لنفسك وتحل مشاكلك بهدوء تام بينك وبين نفسك
بس كيف ونفسك اصلا مهزوزة ..!
لو حد كان معاي في مواضيع الالوان وقلت ان لكل لون طاقته الخاصة
وكل لون نقدر نخليه تحت خدمتنا بشكل كااااامل وشكل ايجابي
حتى اللون الاسود
في فترة حسيت ان ماعندي سالفة ههههه يعني تعرف لما تحس انك ولا شي وماتسوي شي
بعكس ماكنت سابقا ..
وتبي توق ع ريولك وماتقدر ..!
تبي تبني مشاريعك الخاصة بس مالك مزاج لحد . .
تبي تتواصل مع الناس بس تحس انهم مجرد ناس مالهم داعي ..!
تبي تنجح في دراستك وحياتك بس ماتقدر تحقق هالشي لان وايد يكسرون مياديفك
و انت اصلا تكسر مياديفك بروحك وتتذكر اشياء في الماضي تعيق حياتك ..!
عندك امر يحيرك في حياتك وتحسه شاغل كل شي بس مب راسي على بر ..؟
عيل كل شي باذن الله بيتوضح اهنيه
و اوعدكم لو مشيتوا وياي لمدة اسبوعين من العلاج ان كل شي تبونه بيتحقق
مب لازم يكون ذات الشي الي بيغيتوه بالضبط , نو بيكون احسن واحسن واحسن
شواقي
عبق الدلال المفرط
</I>
عدنا
سووري والله ع التاخير بس هالايام مفهية خخخ
خبرتكم من قبل ان موضوعنا يتكلم عن علاج الروح بالايجابية
والعلاج سهل سهل سهل .. بس يبيله تصديق
يعني لو انت او انتي مو مصدقين الموضوع لاتعبون اعماركم وتطبقونه
وعقب تقولون والله ماجاب نتيجة معانا ..!!
لان العلاج ماشي معاي عال العال الحمدلله
وماشي من ملايين من الناس من الي جربوه وجد استفادوا
طبعا العلاج معرو
اهو بكل بساطة [ تغذية النفس بالطاقة الايجابية ]
يعني تجذبون كل شي ايجابي في حياتكم
وتبعدون الافكار السلبية عنكم
خل نضرب مثال واقعي او قصة او خل نقول مرحلة قبل العلاج وبعد ما جربت العلاج :
سابقاً كنت اعاني من مشكلتين اساسيتين في حياتي
ومن هالمشكلتين تتفرع المشاكل الثانية
اولا : *سوء تنظيم الوقت
والي تتفرع منه
– التوتر الزائد . .
– عدم الراحة . .
– تفكير متواصل . .
– خلو حياتي من المتعة ..
-اعمالي ما انجزها بالوقت المطلوب . .
– انجازاتي قليلة . .
– بالتالي يسوء مزاجي واحس اني كفء باي شي ..
وثاني مشكلة
* الشعور بالظلم + السلبية . .
وهاي المشكلة تتفرع منها :
– احباط مو طبيعي . .
– انقباضات في القلب . .
– ألم داخلي حاد . .
– دوم اتهاوش مع ربعي واهلي . .
– مزاجي داون . .
– انجازاتي قليلة
طيب شنو الحل لهالمشاكل كلها ..!
مافي شي الا وله حل .. بس شلون وكيف !!
اهنيه بديت اسال دكتورتي العزيزة امل عن الراحة النفسية والذاتية
وبديت اجوف افلام اجنبية " درامية " فيها بعض من الحلول , وقريت كتب روائية تحل بعض المشاكل
وعقب ولعت اللمبة الي فوق راسي
وقلت بستخدم طريقتي " الايحاء الايجابي اللوني اليومي "
و اول خطوة سويتها ..
قمت اكتب في دفتري الخاص
اني بخير واني مرتاحة واني مستانسة
بس سويت غلط مو طبيعي ..
الا واهو
اني كتبت
I will Be OK
وقانون الايجاء الايجابي في جذب الايجابية
انك تقنع نفسك انك بخير . .
مو راح تكون بخير . .
لانك جي قاعدة تقول لروحك : انا مب اوكي بس باصير اوكي
وتجذب هالطاقة المترددة لك وبالتالي ماراح تستفيد شي
فقمت عدلت خطأي وشلت will be
وقمت اكتبها في اليوم 10 مرات في ساعات متفرقة
خلال كم يوم حسيت بتحسن بس مو اهو التحسن المطلوب
عشان جي قررت انتقل للخطوة اقوى
</I>
الخطوة الي بعدها
اني ابي احسن نفسيتي باستخدام العبارات الايجابية التشجيعية + الالوان
ومافي احلى من اللون الوردي الفااتح ( انتبوا الفاتح ) في تهدية الروح
لان اللون الوردي يخلق راحة نفسية وجي تحس بسكينة وهدوء
عشان جي صار الوردي للبنات ( لانه يرمز للهدوء والرقة والسكينة )
بس انا ضد فكرة ان البنات لهم لون والشباب لهم لون
طبعا مهم مهم مهم للي يبون يخوضون معاي هالعلاج
يكون عندهم دفترين اوراق ملونة
ويفضل الالوان الي داخل تكون فاتحة وغامجة يعني مكس
تلاقونها في المكتبات ..
وهيك قمت اكتب عبارات ايجابية مهما كان مودي . .
</I>
استمريت ع الخطوة السابقة ايام قليلة
لاني حسيت ان في شي ناقص ..!
بعد ماقريت كتاب the secret
عرفت ان هالشي المفروض يكون جدامي على طول
مو مجرد ورقة اكتبها واخبيها ..
عشان هيك
خذت دفتري " مال الاوراق الملونة "
وقمت اقصص منه مستطيلات
وقمت اكتب عليها الاشياء الي ابي احققها
اكثر " الاشياء " . .
وقمت افكر في مكان وايد اجوفه
ومافي اكثر من اللاب ومرايا الحمام
ولصقتهم هونيك
</I>
هالفترة اعتمد بشكل كبير ع اللون الاخضر في حياتي
لانه لون والله له قوة جبارة لو بكتب من اليوم لي باجر عن فوايد هاللون مابخلص
هاللون بكل اختصار
يعزز الروح الطيبة .. يقوي العزيمة .. يشعر المرء بالطمأنينة .. يصفي الذهن .. يريح الاعصاب
وينشر الايجابية ..
باختصار اهو لون مثاالي لكل الحالات وعلاج ضد اي مرض داخلي
علشان جي قمت اشتري اشياء لونها اخضر كثيرة
ولما اكتب عبارتي التشجيعية اكتبها بقلمي الاخضر العزيز
ف الخطو التالية اهي تخصيص مساحة من حياتكم للون الاخضر
سواء فاتح او غامج
شي ثاني :
تذكرون الخطوة السابقة لما قلت لكم اني بديت اقصص اوراق والزقها بمكان جريب واجوفه كل يوم
طيب انا اكتب فيها اشياء ابي احققها
ولو تلاحظون في الصورة السابقة ان لون الالواق مختلف
في اخضر و في ازرق فاتح
طيب تعتقدون انا بس جي نوعت الالوان ع كيفي ..؟
نووو
طيب رجعوا للصورة الي قبل الاخيرة
بتجوفون فيه ورقتين وحدة بالاخضر و وحدة بالازرق
الي في الاخضر مكتوب عليها
♥Aysha is good
ليش خليتها بالاخضر :
لانها تخص حالتي النفسية بكل كبير
واللون الاخضر
مثل ماقلت لكم سابقا يلامس الروح اكثر من اي لون ثاني
عشان جي استخدمته لهالعبارة
والعبارة الثانية بالالون الازرق الفاتح :
Study in uae
خليتها باللون الازرق الفاتح لانها تمثل الطموح
والازرق الفاتح" السماوي " يمثل الطموح والتفكير العميق
ودراستي بالامارات تمثل لي الطموح وماراح اوصل لها الا بالتفكير الجدي
عشان هيك استخدمت هاذي اللون ..
النتايج بقوولها في نهاية الموضوع
بس ليلحين ماخلصنا . .
</I>
عدناا
الخطوة التالية من العلاج
* كتابي العزيز
دفتر الاحلام ودفترالوقت و المهام
عندي دفترين واحد صغنون واحد كبير
الصغنون بقولكم سالفته بعدين
اما الكبير فهو دفتر الاحلام . .
هالدفتر يحتوي على اشعاري ومشاعري واحلامي الخاصة
وافتحة كل يوم مرة او مرتين
والنتايج في اخر الموضوع
</I>
الخطوة الاخيرة
مع تطبيقي لك الي سبق بشكل يومي
وتفاؤلي الي مب طبيعي بشكل يومي ايضا
حبيت اني انهي اخر مشكلة اساسية لي
الا وهي تنظيم الوقت . .
واهنيه بديت استخدم دفتري الصغنون الازرق
في هالدفتر مهم مهم مهم ماقدر اضيعه او اتركه في اي مكان
واستخدمه بشكل يومي ومتكرر . .
وافتحه اكثر من 10 مرات باليوم ,
هالدفتر يختص بتنظيم وقتي بشكل كبير وتحقيق اكبر عدد ممكن من الانجازات
وطريقته حلوة وايد
الا وهي
كل يوم استخدم صفحتين او 3 واكتب فيه مهامي لهذا اليوم او لهاي الاسبوع ..
على شكل نقاط , ولما احق هالشي احط علامة صح ..
وللعلم اني لما افتحه ما افتح ع اخر تاريخ
لا , من اول صفحة لي اخر شي عشان اجوف النقاط الي ماحطيت عليها علامة صح
وهالطريقة تساعد ع التحفيز ع القيام بالاعمال والتذكير بالمهام وتنظيم الوقت وتجزيئة
وتحقيق جميع المتطلبات بشكل سهل وميسر وبدون اي مشاكل
</I>
النتايج
اعتقد هاي اهم بارت صح
بديت هالعلاج من فترة لا باس فيها
وتشبعت بالافكار الايجابية والالوان الاجابية
وهالعلاج خلاني اطرد اي افكار سلبي في حياتي بشكل مسالم
وذكي وسهل ..
اي شي يزعجني اعالجه بالايجابية والالوان
اي شي مستصعب علي اعالجه بدفتر الوقت والمهام والاحلام . .
لما صرت جد انسانة مهتمة في حياتي وانجازاتي بشكل كبير
علاماتي في المدرسة زينة
تعاملي ع الجميع زين .. تمر علي مشاكل بس اكون حليمة وهادية وما اعصب بسرعة
احل مشاكلي لحالي وبشكل منظم وبدون اي شوشرة ..
علاقتي مع الناس صارت هادية وحلوة وممتعة . .
مزاجي مايقدر يحكمني ويسيطر علي ..
صرت اجوف الدنيا احلى . .
صرت اجوف ان مافي شي ماقدر اسويه ..
وماصرت اجوف اي حد عدو لي . .
حتى لمجرد اني احقد ع شخص لثانية
تلقوني امسوية اسمه ع ورقة خضرا ولازقته ع الاب
خخخخخ كانو 8
بس الحمدلله الحين مافي الا اسم وشلته امس . .
صرت احس اني سوبر واني انسانة مستقلة مميزة ومبدعة
ما اعتمد الا ع ربي ونفسي . .
واثقة من نفسي بشكل كبير
وايد من مشاكلي انحلت واولها وزني القليل
زاد وزني بسبب نفسيتي الزينة مع اني مضغوطة من المدرسة بس ماخليته عذر عشان اخرب مزاجي
بالعكس صار مزاجي احسن لما اروح السكول , والكل ملاحظ هالشي ..
الحمدلله
اتمنى استفدتو من الموضوع
</I>
عندي اعتقاد بان الالوان لها تأثير عالنفسية .. بس الصرااحة ما كنت اتوقعها بهالشكل .. ! شي جميل ..
وانا اقرى .. شوي أقول خليني أجرب .. وشوي أقول أدري ما ينفع معاي ..!
بس ان شاء الله برجع اقرى الموضوع بهدوء .. لأنه حيييل عجبني ..
الله يوفقج ويسعدج ويهنيج يااارب ..