F: F: F:
من اول ما اشتركت بهالمنتدى ودخلت ركن قضايا وحلول
وانا الاحظ ان 90% من مشاكل البنات (متزوجات او غير متزوجات) متشابهه ومكرره مثل :
كل صديقاتي تزوجوا انا ليش ما تزوجت ؟؟
زوجي ما يقعد بالبيت ..
زوجي ما يسولف معاي …
ام زوجي ما تعطيني وجه ..
زوجة حماي يعاملونها احسن مني ..
خطيبي كله مشغول عني …
جسمي موو حلوو .. لووني مو حلوو ..
وغيرهااا وغييرهاا .. من مشاكل ما ابي اقول انها تافهه
بس بصراحه ما تسوى كل هالضيق والزعل والتفكيييير ..
ما سألتوا نفسكم مره شنو الشي اللي قاعد يخليني اضخم واكبّر
المشاكل اللي يمكن تكون صغيره و ما تستحق كل هالاهتمام ؟؟
وشنو اللي يخليني اهتم بكل التفاصيل و الحركات من الناس اللي حولي وافسرها تفسير ثااني.. واشغل بالي فيهاا.. واتعب نفسيتي.. ؟
و شنو الشي اللي يخليني دايماً اقارن بين حياتي و حياة غيري
وبين شكلي وشكل غيري و بين علاقاتي وعلاقات غيري .. طول الوقت؟؟
تدرون شنو هالشي ؟
اهو وقت الفراغ الكبييير و الملل و الكبت..
لما اشوف حياة البنت اللي قاعده بالبيت لا شغل ولا دراسه ولاشي ..
(متزوجه او غير متزوجه)
وحياة البنت المشغوله سواءً كانت طالبه او موظفه او اللي عندها هوايه او شي مفيد شاغلها .. (متزوجه او غير متزوجه)
الاحظ فرررق كبيير بطريقة التفكيير و طبيعة المشكلاات اللي يعانون منهاا
ما اعتقد ان في منكم بنت جاهله .. مو متعلمه !!
اكيد الكل متعلم وعنده شهاده ..
توظفي بشهادتج ..كملي دراستج ..
عندج هوايه.. نميها .. طوريها ..استفيدي منها ..وفيدي غيرج
ما عندج هوايه ؟
دخلي دورات تنمين فيها شخصيتج ومستواج الفكري و النفسي
اختلطي بالمجتمع .. كوني صداقات جديده .. تعلمي اشياء جديده
طلعي مع صديقاتج ..استانسي شوفي الدنياا ..
تعلمي من المواقف اللي تصير لج ..
و في الف طريقه وطريقه تقضين فيها على وقت الفرااغ المتعب
خلي عندج طموح .و .اهداف تحققينها كل سنه
كل هالاشياء .. راح تعطيج ثقه بنفسج ..وتقدرين نفسج .. وتعرفين انتي شنو و انتي منو .. تعرفين تحلين مشاكلج بروحج ..
تفيدين نفسج مادياً ومعنوياً .. وتصير لج شخصيتج المستقله ..مو تابع حق زوجج او لأي شخص كان ..
و بالتالي ماراح تضخمين ادق التفاصيل و اتفهه المشكلات اللي تصير لج .. ماراح تهمج ..لانه بكل بساطه .. انتي مو فاضيه
زوجي مشغول عني ؟ اشغل نفسي بشي ثاني
حماتي/صديقتي ..الخ ما تعاملني زين ؟ اتجاهلها ..
ما تزوجت ليلحين ؟ متى ما بيصير النصيب يصير .. عندي اشياء تشغلني
باختصار بداخلنا طاقات و مواهب فوق ما نتصور .. بس للاسف اغلبنا يكبتهاا… ويعيش طول عمره بمحيطه الصغير البسيط الممل ..
نفس الناس نفس المواقف تصير كل يوم .. لي متى ؟
الدنيا فيها واايد اشياء حلوه ..حلوو لو نجربها ونعيشها و نفجر الطاقات اللي بداخلناا ..و نكون مميزين بمحيطنا
وسلااامتكم ..
هالكلام كنت ودي اقوله من زمان .. اتمنى لو انه يفيدكم
او يأّثر فيكم .. و لو بكلمه وحده .. راح اكون سعيده
F:
.
^
^
ابتسامه تفقع : )
كلامك صحيح ومفيد
حتى لو انك مشغوولة موت موت ماتقدرين تحكين شعرك من المشاغل
وعندك مشاكل شي طبيعي تفكرين في هالمشاكل / بس اكيد مو رايحة تشغلك كثر الوحدة اللي جالسه فاضية
مشكورة اختي على الموضوع الحلو والمفيد وان شاء الله الكل يستفيد منه
والله يوفقك الجميع بإذن الله ( اللهم آآآآآآآآآآمين )
يعني خلاصة كلامي اذا الشخص مومهتم وعيونه مسكرة الناس تفتح عينه علىالشي وتغربله
انا شهادة لله منتدى عروس وايد له تأثير حلو في حياتي يعني قبل وايد اكتئب عشان الموضوع حتى تصدقين قسم تجهيزات العروس ما كنت ادخله من كثر الاكتئاب اللي صادني بس هني حصلت اشياء وايد تشغلني عن الموضوع وخصوصا هني في هاي القسم يعني مو بس انا عاني وايد بنات يعانون يعني مثل مانقول support group صرنا
تصدقين حبوبة انا مندشيت هني تعلمت اني اخذ الاشياء بالورقة والقلم يعني اوضح لي مرة خذيت ورقةوقلم وزينتها وحطيتها عنوان عليها " ماهي طموحاتك يا وجوه الخير" وكتب شنو اطمح له انصدمت بطموحاتي بالاحرى اكتشفت ان الزواج ابدا ما كان من طموحاتي ولا من مخطاطاتي بس يمكن من ضغط المجتمع عليي فكرت فيه:|
اما الحين تشوفني مطنشةالموضوع ككل:p وعايشة حياتي في انتظار وظيفتي " دعواتكم لي ربي يسهلها عليي و اتوظف بسرعة " واللي الله كاتبه بيصير صار الحمد لله ما صار هم الحمد لله
بس وايد هذرت:o والسموحة طولت وايد في الكلام
طلعت اللي في خاطري:biggrin:
تحياتي
أنا فعلا فى بداية غربتى عانيت من إكتئاب شديد
وكل مشكلة تعدى عليا أحسها كبيرة جدا
لكن بمجرد ما بدأت بشغل وقت فراغى بأشياء
مهمة وحددت لى أهداف أسعى لتحقيقها أصبحت
الآن اتمنى تأخر زوجى فى عمله حتى أنهى كل
ما اريد فعله
وايضا ثقتى فى نفسى إرتفعت جدا
وبدأت أشعها لمن حولى واصبحت أبث التفاؤل
والسعادة لمن حولى بدلا من أن كنت تعيسة
وكئيبة
تقبلى مرورى أختى وتسلمى على موضوعك ياقمر