كل عام والجميييع بالف خير اعاده الله عليكم باليمن والمسرات والفرج عن الشام واهل الشام وربنا يحمي جميع بلاد المسلمين
حبيت اشارككم سفرتي الشامية انا واختي وان شالله تنال على اعجابكم واستحسانكم وبطلب من الله التوفيق لي وللجميييع
المنيو عبارة عن
الطبق الرئيسي : اوزي شامي …. فريكة باللحم
المقبلات : يالنجي وسمبوسك وسبرينغ رول وفتوش والتسئية الشامية
الشوربة : شوربة الشعيرية بالخضار
العصير : عصير الفروالة والعسل
الحلا : حلاوة الجبن السورية
ان شالله المنيو يكون عجبكم وخلونا نبدأ بالتفاصيل
رح ابدأ بالطبق الرئيسي اللي هو الاوزي وان شالله الصور بتوضح الطريقة
1ـ نحمس اللحمة بالسمنة او الزيت ونضيف لها البازيلاء والقليل من البهار والملح
2_ نقوم باضافة الرز المصري المغسول سابقا ثم المرقة = الماء بكمية تناسب كمية الرز ونضعه على نار هادية حتى يستوي الرز ويتفلفل تماااما
3_ منلاحظ ان الارز بالبازيلاء واللحمة استووا تماما وصاروا عال العال منضيف قليل من المكسرات المحمصة سابقا
4_ نضع رقاقة بف باستري من السنبلة في زبدية صغيرة ((سلطانية صغيرة))
5_ نضع كمية مناسبة من الارز والبازيلا
6_ منقفل الرقاقة ومنقلب السلطانية ومنحط كور الاوزي بصينية للشوي
مندهن وجه الاوزي بالسمنة وعلى الفرن تتحمر من فوق وتحت
وهي الاوزي الشامي صار جاهز وهنا وعافية ومناكل جنبه سلطة لبن بالخيار
****
الفريكة : هلأ بعرف ان الشرح لطبق واحد بس حبيت اشرحلكم الفريكة للي طلبها مني
1_ منحط سمنة بالطنجرة ولازم تكون سمنة وياريت لو سمنة طيبة متل سمنة فارم لان الفريكة بالسمن اطيب من الزيت
2_ بعد مانغسل الفريكة وننقعها بالمي منحمصها بالسمنة
3_ منضيف من مرقة اللحمة اللي سلقناها اول بكمية تغمر الفريكة قدر 2 سم ومنزود بهارات شوي وملح وماننسي ان مرق اللحم مبهر ومملح
4_منضغطها بطنجرة الضغط اسرع وافضل وخاصة نهار رمضان قصير… نضغطها مدة 3 ارباع الساعة
5_ وهي هون مفلفلة ومستوية وبتشهي
6_ منحمص شوية مكسرات انا هون عندي بس لوز
1_ هي اللحمة صبايا تبع الفريكة منغسلها ومنحطلها بهارات مشكلة وملح ومنسلقها حتى تستوي
2_ أنا هون حمرت اللحمة بالفرن بعد سلقها ,, دهنتها سمنة ورب البندورة واتحمرت وصارت بتشهي
3_ هي سلطة اللبن بالخيار بتتقدم جنب الفريكة والاوزي عبارة عن لبن وتوم مدقوق وخيارة مبشورة وشوي ملح
4_ سلطة اللبن صارت جاهزة
وهي فريكتنا صارت جاهزة للأكل وصحة وهنا ان شالله تعجبكن
****
ومنجي للمقبلات خير الله كتير الحمد لله الله يكتره على الجمييييع متل ماذكرت فتوش وسمبوسك وسبرينغ ويالنجي وتسئية بس حبيت اشرحلكم واصورلكم التسئية الشامية بالسمنة
منجهز حمص مسلوق وخبز مقطع ومسبحة اللي هي ((حمص ولبن وكم حبة توم وملعقتين كبار طحينة وملح وعالخلاط ))
1_ منقطع الخبز
2_ وبعد ماقطعنا الخبز منسقيه بمرقة الحمص المسلوق ومنضيف على الخبز كمان كمية من الحمص المسلوق ومنخلطهم مع بعض كويس
3_ وهون حضرنا المسبحة اللي شرحناها فوق((حمص ولبن وكم حبة توم وملعقتين كبار طحينة وملح وعالخلاط ))
4_ ومنضيف المسبحة على الخبز والحمص ومنتبلهم كويس وعلى الوجه
ومنزين التسئية بالمكسرات والحمص والبقدونس والرمان اذا تواجد عندكم
وهي التسئية الشامية صارت جاهزة وبيبقى اللمسة الاخيرة اللي هي تئدحوا ملعقتين سمنة عالنار وتديروهم على التسئية على طووول
وهنا وعافية يارب
*****
&& شــوربة الماجي بالشعيرية &&
1_ منحمص شعيرية بزيت زيتون
2_ منكون مقطعين الخضار اللي تحبوها انا هنا حطيت جزر ودرة وفطر ودرتهم فوق الشعيرية
3_ منغمرهم ماء مع مكعب ماجي وملح وملعقة صغيرة طحين حتى تثقل شوي
4_ الشوربة صارت جاهزة ولمسة اخيرة منضيف ملعقة معجون طماطم ممكن تحطولها شوية بقدونس بيعطيها طعم حلو ومميز
وهي الشوربة صارت جاهزة وهنا وعوافي
****
&& عصيــر الفراولة بالحليب والعسل &&
1_ بالخلاط حطيت فراولة وكوبين حليب وملعقتين عسل كبار ومكعبات تلج وشووية سكر
2_ العصير جاهز
وصحة وهنا يارب عاد زينوه بالطريقة اللي تحبوها
*****
&& حلا : حلاوة الجبن الـسورية &&
حلاوة الجبن السورية كتيير طيبة وغنية عن التعريف وعنا اهل مدينة حماه وحمص اكثر ناس معروفين فيها هما أهلها وناسها والله يرجع الامن والامان والاستقرار لبلدنا وترجع الايام الحلوة
منجي للطريقة
1_منحط كاسة ونص حليب وكاسة سكر على النار مع ربع كاسة ماء زهر وبس يغلو منشيلهم من عالنار
2_ومنحط فوق السابق كاسة ونص سميد ناعم او خشن ومنحركهم منيح ومنرجعهم عالنار
3_ منحط فوق السابق كاستين موزاريلا ومنحركها بسرعة لتذوب الجبنة
4_ منفرد نايلون وعليه قطر ومنمد العجينة عليه ومننتظر شوي حتى تبرد
1_ منفرد العجينة بالشوبك
2_ ومنحشيها بالقشطة او الجبنة او الاريشة اللي راح اذكر طريقتها
3_ ومنلفها رول ومنقطعها مستطيلات صغيرة ومنزينها بالفستق الحلبي وتشرب بالقطر
اما عن طريقة القشطة المنزلية او الاريشة فهي كالتالي
1_ منغلي كاسة ونصف حليب وبس يغلي تماما منضيف له ربع ملعقة صغيرة حمض الليمون حتى يفرط الحليب ويصير قطع وجزيئات
2_ شكل الحليب بعد مافرط
3_ نصفيه بالمصفاية ومنحشي فيه حلاوة الجبن
وهي حلاوة الجبن بالشكل الاخير وصحة وهنا :winki:
ملاحظة معايير القطر: كل كوبين ونصف سكر كوب ونص ماء وبس يغلو على النار منضيف ملعقة صغيرة عصير ليمون ومنركهم يغلو حتى يثقل ويثخن القطر وبالنهاية منحط ملعقة صغيرة ماء زهر
وهي سفرتنا بشكلها النهائي ان شالله تنال اعجابكم ورمضان كريم ومبارك على الجميييع
وبالتوفيق للجميييع
رووووعة أكلاتك ياقمررر ومتعوب عليها
كلهم عجبوني وبيشهو يسلمووو ايديك حبيبتي
وموفقة بالمسابقة
ما شاء الله أكل بيفتح النفس
يعطيكِ ألف عافية
تسلم الأيادي والله يعطيكِ العافية
وموفقة باذن الله
بسم الله ماشاءالله
سفره رائعه ومتعوب عليها
تسلم ايديك انتي واختك
والف صحه وعافيه
والله يوفقك
والميزان معلق معاي
((اسيره الغربه )) سابقا
أكلات جمممميلة بالعافية
وموفقة
سفرة شهية
فالك الفوز ان شاء الله
وفالك الفوز
وأكلاتك جميـلة تسلم أيدك حبيبتى
واجمل تقييم لعيونك .
.||~