مقتطفات من كتاب ""عشان السنارة تغمز""،،نقاط لتصحيح مسار العلاقة بين المراة و ارجل،، 2024.

"-حبي نفسك لإنك لو حبيتيها هتخليها الأجمل و الأصلح و الأحسن والأذكى والأشطر والأجدع وبالتالي كل الناس حتحبها وسمكك حيكتر

–بصي في المراية قومي بصي في المراية لو اللي انتي شايفاه عاجببك يبقى حيعجب الناس خللي بالك الناس بتشوفك بعنيكي انتي

– أنوثتك مش نابعة من تضاريس جسمك أنوثتك نابعة من ذكائك العاطفي ورقتك في الرد وحنيتك في التعامل وتعاطفك الحقيقي وقت اللزوم وكلامك الحلو اللي يلمس القلب كل دا اللي بيكون سحرك الخاص وأنوثتك الطاغية يعني الأنوثة شخصية مش هز كتاف

– لو في أي عيب انتي شيفاه في وشك ومخليكي مش بتعرفي تبصي في عينيه يبأه يا تعملي عملية تجميل يا تتعلمي ازاي تخبي العيب دا بالمكياج يا تتصالحي مع نفسكوتعرفي ان وشوش الناس كلها عيوب بمافيهم وشه فلا تعايرني ولا اعايرك الهم طايلني وطايلك

– لغة العيون مهمة جدا وسكة داري العيون داريها السحر باين فيها حقيقية لأن العين مراية النفس ولو النفس حلوة بتبان في النظرة ولو النفس وحشة يبقى تنسي سكة العيون دي خااااااااااااااااااالص

– مش أي نظرة عين توقع ده فن في بنات بتتقنه بالفطرة وفي بنات بتبص بسذاجة أجمد نظرة هي والوش نازل شوية والعين بتبص في عين اللي أدامها مباشرة مع خفيفة وإوعي تتكسفي وتبصي في الأرض حتديله انطباع إنك مش واثقة من نفسك وهتفضلي في خانة الأخت العزيزة!

– لازم تختاري واحد تكون بينك وبينه اهتمامات مشتركة
علشان هو ده مفتاح العلاقة الناجحة وافتكري القصة المشهورة اللي مالية الأفلام والمسلسلات الزوج اللي سايب الست في البيت ومنبهر جدا بزميلته في الشغل واللي ساعات بيتجوزها على مراته لإنها فاهماه وبتشاركه اهتماماته

– المعرفة سلاح لازم تكوني مثقفة وملمة بمواضيع كتير
بحيث انه يلاقي نفسه قاعد مع معجزة بتفهم في كل حاجة وبتتكلم في كل حاجةمش واحدة هايفة وكلامها فارغ أو عالمة بتتكلم في موضوع واحد بس كده حيزهق منك ولو حصل واتجوزك هو شهر وهيطير مع اصحابه بره البيت

– لازم تحترميه علشان يحترمك ولو هو طول لسانه أو مد ايده عليكي بتهريج يبقأه تحرجيه بذوق وتوقفيه عند حده الاحترام أساس أي علاقة سوية والراجل بيتشد أوي للبنت اللي بتفرض عليه احترامها إلاإذا كان هُزء ساعتها تديله أحلى شلوت ويتوكل

– التمثيل عدو أي علاقة ناجحة هتمثلي دلوقتي طب وكمان سنتين ؟؟ اتعاملي على طبيعتك واتكلمي بصراحة ده انتي ان كان عاجبه ولو مش عاجبه يضرب راسه في اجدعها حيط هي دي الثقة بالنفس اللي هتخليه يجري وراكي يبأه مش حابب شخصيتك الحقيقية طز فيه" مالوش في الطيب نصيب

– اسمعي مشاكله في البداية بحدودومن باب المشاركة والتعاطف لكن تعيشي في دور السبع رجالةوتنتحري علشان تساعديه حتتحطي في بند الصديقة الجدعة مش أكتر أو العلاقة حتتبني على اكتافك انتي وهيتعود على انك انتي اللي بتحلي وينام لك في الخط

– الراجل بيحب يحس دايما انه سيد الموقف فلمايشتكي اديله حلوة وجملة "انا واثقة انك هتعرف تحل الموقف ده وانا موجودة لوفي حاجة أقدر اعملها ياريت ماتترددش في انك تقولي" كده هيحس انك شايفاه عنتر زمانه وفي نفس الوقت واقفة جنبه

– ركزي في البداية على انك تكوني
"Good company"
يعني صحبة كويسة بلاش نكد بلاش الرخامة بلاش تحاولي تزنقيه علشان تطلعي منه كلام حلو أوطلب للارتباط بالعافية ونظام "أصل جاي لي عريس" والسكة دي قديمة أوي وكل الرجالة عارفينها دلوقتي فهيقولك ألف مبروك وبالتوفيق!

– اعرفي امتى تسمعي وامتى تتكلمي يعني لما يحب يحكي اسمعي ولما يخلص خدي انتي المبادرة واتكلمي في موضوع يشده أكتر المواضيع اللي بتشد الرجالة :
السياسة , الكورة , الدين ومجال شغلهم

– ياريت تختاري الحاجات اللي تتحكي خاصة في البداية وهو لس مش عارفك يعني بلاش مغامراتك في البسين و البنطلون اللي اتقطع في حفلة الجامعة
وال100 ولد اللي كانوا عايزين يصاحبوكي وبابا ضرب ماما مبارح

– البنات عادة بتستخدم ايديها وهي بتتكلم وممكن جدا تلمس اللي أودامها عادي وتهزر بايديها عادي برضه خليكي انتي مختلفة لإن الراجل ساعات بيفهم ده غلط وبيعتقد انك سهلة ومتاحة للجميع وبالتالي هيحطك إطار انتي مش هتحبيه وتبتدي ايديه تسرح
والرجالة يختي مابتسدق ههههههه

– لو عايشة في دور اللي معتمدة على نفسها وسكة البنت زي الولد ماهيش كمالة عدد ودفعتي أول مرة يبأه اعرفي ياحبيبتيان انتي اللي هتفضلي تدفعي بعد كده علطول واللي يلاقي الدلع وما يتدلعش يبأه حرام عليه

– أول مقابلة لازم تحافظي على توازنك يعني لا تهريج زيادة وتعيشي في دور الأراجوز ولا أتامه وبحلقة فيه كأنك بتتفرجي على حيوان خرافي بشنب ،،، كوني نفسك ببساطة وحذر

– مش من أول خروجة تثقي فيه حتى لو كان سيماهم في وجوههم يعني مفيش داعي تقولي له حجات انتي شايفاها أسرار حياتك وممكن تندمي عليها بعد كدهخاصة "لو طلع ندل"

– وياريت تحرميه في أول خروجة من النميمة على زمايلك والشتيمة في صاحبتك اللي بتغير منك وجارتك اللي ربنا فتح عليها وجابت توكتوك كده ممكن يفهمك غلط ويحس انه قاعد مع "قاسم السماوي" لكن لو انتي هذا الرجل فعلا يبأه ماتحرميهوش م الحقيقة لإنه هيعرفها هيعرفها

– بلاش في أول خروجة تنزلي عليه بسيل الأسئلة اللي هتفطسي وتعرفي اجابتها مرة وحدة وحدة وحدة على الراجل علشان ما يحسش انه قاعد على كرسي الاعتراف أودام وكيل النيابة وفجأة بقدرة قادر يترسم على وشك شنب يرعب شنبه

– أول خروجة هو عايز يعرفك حاولي تبروزي نفسك صح
وتخلي صورة أهلك حلوة ولازم تعتزي بأهلك مهما ان كانوا لأن اللي بيشتم في أهله بيدي انطباع زي الزفت للي قدامه وكل الشعب عارف ان "اللي مالوش خير في أهله مالوش خير في حد"

– اوعي في اول خروجة تشدي فنجان الشاي بتاعه عشان تحطيله السكر وسهوكة البنات دي كده هيكش منك وهيحس انك عايزة تدبسيه وعايشة في دور المدام
هيقول في عقل باله "آه من أولها كده ؟"
ويمكن يطلع بيشربه من غير سكر
ماتحرجيش نفسك يا قطة

– اوعي تطلبي نمرة تلفونه أبدا لازم هو اللي يحاول يديهالك ويتعب علشان يديهالكدي البداية اللي على مية بيضا":

– ساعات هو بيكون طاووس وواثق ان زيك زي غيرك وأكيد هتتكلمي ده التطور الطبيعي للحاجة الساقعة فلما مابتتكلميش انتي كده تكلمتي فعلا وقلتي له " لأ فتح ياحبيبي مش أي أي ولا زيزي ولا كل قط يتقاله يا مشمش"

– حصل وكلمك ياريت مايلاقيش فرح في التلفون واللي هو ناقص ترقعيله زغروتة لأن خاالص عايزاكي البت الكول التنكة موت المكالمة دي شيء عادي ومتوقع
ايه الجديد يا ماما ؟ ده سحرك المعتاد!
وفي نفس الوقت ماتبئيش مقموصة وإتمة
عشان كنتي مستنياها بدري عن كده
لازم يحس انك أعظم من انك تستني مكالمته أصلا

– التقل صنعة فعلا والبنت التقيلة هي اللي بتكسب خاصة في وجود بنات بتعاكس وبتخرج وبتعمل أقصى حاجة ممكن تتخيليها ..ايوة اللي جه في دماغك ده بالضبط !لازم تكوني مختلفة

– أول هدية لازم تكون ليكي مش منك ولازم تستقبليها بحماس وانبهار استقبال الهدايا فن لو ما أتقنتهوش هيبطل يجيبلك هدايا وترجعي تقولي مش بيجيب !!
وفي نفس الوقت لما بيجي الدور عليكي بغض النظر عن الهدية لازم تهتمي جدا بلفتها لكن نظام كيس المحل واحمد ربنا اني جبتلك هدية أصلايبقى حتفضلي في بيت بابا شوية

– ساعات البنت بتعتقد انها لما بتبأه قدامه على طول هي كده بتحميه من ظهور واحدة تانية ولو التانية ظهرت فعلا فالبنت بتتواجد أكتر ماهي بنت في منافسة لكن الواقع انها بترطرط وبتضيع فرصتها في الحصول عليه

– لما الراجل بيحس ان حياتك مش واقفة عليه وانك عندك أصحابك ومجتمعك سواء في شغلك أو في دراستك أو في النادي أو أي حاجة تانية بيترعب ولو حاطط عينه عليكي فعلا مش حيستحمل كتيير وهتلاقي المكنة طلعت قماش

– لو الراجل طلع كويس فعلا يبأه لازم تشيليه في عينيكي وأهم حاجة انك تحافظي على أسراره وعلى منظره قدام الناس كده هو كمان هيشيلك في عينيه ومش هيسيب سنارتك أبدا !! ولازم ماتعايرهوش بأي حاجة قالهالك أو حصلت له وحطي نفسك دايما مكانه واتصرفي باللي ترضيه لنفسك .

– خلي دايما بحر سنارتك هو التكافؤ الاجتماعي والمادي والثقافي والانساني والديني هو دا أساس العلاقة الناجحة وخلي بالك العلاقة الفاشلة بتؤدي لأمراض نفسية وبالتالي جسدية لأنها بتضعف جها ز المناعة الصحة نعمة لا تعوض

– لازم تاخدي الراجل اللي قدامك شروة على بعضها وياتحبيه بعيوبه وتحاولي تحسني فيها مش أكتر يا اما ماتظلمهوش وتسيبيه لوحدة تانية تستوعب العيوب دي ويمكن تشوفها مميزات كمان وبلاش نظام (عيني فيه وأقول اخيه)

– احترمي صمته لما يكون متدايق يعني ما تقعديش تزني فوق دماغه علشان تعرفي سبب ضيقه الراجل مش بيعرف يتكلم ويشتكي زينا غير لما يهدى وبيفضل انه يشتغل أو يصل حاجة أو يخرج يتمشى لغاية ما يهدى وبعدين يتكلم اديله فرصته علشان ما يرمكيش انتي في البحر


– مهم قوي انك زي ما بتدي تاخدي وزي ما بتاخدي تدي العلاقة اللي بتتبني على ان طرف واحد بيدي بس بالجزمة;)

– العلاقة الناجحة هي :العلاقة اللي بتحققلك السعادة على طول مش شهر آه وشهرين خناق يوم آه وعشرة متخاصمين خروجة آه وتلاتة مش طايقين نفسنا
علاقتك من النوع دا ؟ يبأه ما تعتبريش السنارة غمزت وبلاش جواز علشان ما تجنيش على أطفال بلا ذنب لأن عاجلا أم آجلا حد فيكم حيطفش

– "وعشق الروح ملوش آخر لكن عشق الجسد فاني" يعني ركزي أوي على الروح دي والشخصية اللي لازم تتعبي أوي سواء في اختيارها أو في :
تكوينها وتنميتها وتنصيحها وتثقيفها وتنقيتها وجهادهاوتقويمها

– خليه دايما يحس انه هو اللي بيصطادك حتى لو كنتي متجوزاه وعندك 10 عيال لازم يحس انه وجودك معاه مش أمر مسّلم بيه وانه لو طلع عن الخط اللي انتي رسماه لعلاقتكمحد فيكم حيطلع بره البيت وغالبا حيكون هو