اشحالكن يالغاليات
عزيزاتى هذي أول مشاركة لى على مدونة عروسة
لما شفت المشاركات الحلوة بصراحة شدت انتباهى فقلت ليش ما اطرح مشكلتى وربما أحصل أو
أجد حل لمشكلتى
عزيزاتي أنا وحدة عمري 24 سنة و عقد قرانى على شخص مب من أهلى يعنى من طرف وحده
تعرفت عليها و صارلى تقريبا شهرين وأسبوع
ألحين بتقولون لى شو المشكلة!!!
حبيباتى مشكلتى أن ريلى أو زوجى دايما يقولى أنت ليش ناشفه عاطفيا ما اسمع منج كلام حلو
أو حتى يوم يزورنا في البيت أكون خجولة شوى بس والله العظيم حاولت أنى أكون عادية
كل ما نظر بويهي ابتسم له و على فكرة (هو بعد من النوع الخجول)يعني في التلفون مسوي
عمره ملك الحب والرومنسية بس يوم اشوفه يكون رومنسي بس في نوع من الخجل لدرجة انى
لما ايلس اتأمل في ملامحه يستحى ويحاول يطالع اي مكان يعني ما يحاول يركز نظره على…
والى اذكره
كانت اول محاولاتى انى تقربت له في يلستى يعنى لصقت فيه يعني أنا مب خجولة ذاك الزود
الىى الوحدة ما تقدر تعبر عن مشاعرها … يوم يتصل أول ما اكلمه أقوله هلا حياتي هلا حبيبي
وحتى يوم يكون تعبان اقوله سلامتك من التعب ياريت فيني ولا فيك … مثل هالحركات الحلوة
بس في بعض الاحيان اتنح يعنى اتجمد ما اعرف شو اقوله … لما يسمعنى كلام حلو أحس ما عندي
رد على هالكلام فيحرج ويعصب يقولى يعنى على اسهل شئ ما تعرفين تردين قولى اي شئ
المهم لا تسكتين
وانا عاد اقفط و أنحرج وردت فعلى اما السكوت أو انى اضحك (بس ضحكه خجولة)
حاولت كذا مرة انى اسيطر على الوضع أو ارد عليه بكلام حلو بائت محاولاتى بالفشل
وحتى وهذي اكبر مأساة لى ان لما نطلع مع بعض مثلا لما بنحجز حق العرس قاعة و بطاقات ومن
هالسوالف ونحن في السيارة يحطى ايده بأيدي وانا شو اسوي بس امسك ايده وما يكون
عندي ردت فعل انى ابين انى منجذبه له او انى سعيدة
صدق انا وحده ما تعرف تعبر عن مشاعرها وخصوصا ان زوجي يحب ان الوحدة تعبر عن
مدي حبها وانجذابها لوزجها وانا معاه في هذي النقطة و اذا ظلت المسألة بهذي الطريقة بتتطور
أكثر وأكثر بكون عاجزة عن التعبير له عن هذا الشئ
خواتى علمونى ثقفونى من هالناحية عطونى افكار حلوه ورومنسية تخليه يغير نظرة فيني
طبعا افكار تناسب هذي المرحلة (الملجة) … و أتمني انكم تعطونى كلام حلو اسمعه علشان
أبرد قلبه (هههههههه) يحليله تعب منى
ما أدري الفترة إلى قضيناها مع بعض غير كفيلة أو كافية لكسر حاجز الخجل إلى عندي أو
انى أنا ما عندي رومنسيية من الأصل بس صدقونى أنا اموت على اللحظات الرومنسية بس
المشكلة أنى اعيشها وحدي من غير ما أنا احسسه أنى متأثرة بهلاجواء
الله يخليكم خواتى المتزوجات وإلى عندها أفكار أو خلفية في مثل هالأمور تريحنى
والله يسعدكم دنيا وآخرة
ويوفق كل وحدة ترد على و يهنيها في حياتها و لا يدخل في قلبها اي هم وحزن
والله يسعد كل زوجين ويجعل بينهم المودة والرحمة
شكرا خواتى
والسموحة على الأطالة
بس الله يسعدكم ردو على بأقرب فرصة
هالشي عادي.. وطبيعي يحصل لينما تصيرون جريئين مع الايام.. ويا حلات البنت بخجلها..
تقريبا المواقف الي تصير لج كانت تصير لي.. واتصدقين لين الحين ما ازقر زوجي باسمه او ب حبيبي او حياتي او ب ابو سعيده وحتى بالتلفون اتخيلي؟! حتى مرات يعصب ويقولي انا زوجج مش واحد من السكه هههههههه.. اناديه اقولك ؟؟!؟!؟ اقولك تعال اقولك وينك اقولك بتوديني.. وهو يرد علي ويقولي ودي اسمع اسمي مره بلسانج ههههههههه؟!
واذكر على ايام الملكه كنت خجوله ومول ما اتكلم ويوم اتصل فيني اول مره كنت ساكته ومول ما اتكلم حتى اتنرفز وتم معصب.. حتى اول ما زارني واول مره اشوفه شاف ايديني قالي شو هاليد كانه ايدين وحده خبازه هههههههههههه وحتى صوتي ما كان ينسمع يالله يالله اضحك بخفه.. والله ايام حلوه.. بس صدقيني مع الايام بتشوفين نفسج صايره جريئه..
اختي فارسه
واخبارش الحين , تجربتك أتوقع أخف من تجربتي :shy:
وخذي نصيحة الناصحة ام سعيد
وعندي لك فكرة مره حلوة وأنا سويتها
أذا تقدرين تدخلين غرفة خطيبك بدون علمه وبمساعدة أخوات خطيبك
وترتبين سريره وترزين فوقه هدية متواضعة أو ( تحفة مكتوب عليها شعر)
وتعطرين المخدة .
وتطلعين ولا من شاف ولا من دري
وشوفي ردة فعل خطيبك
وطمنيني
تحياتي
حبيبتي وعزيزتى أم سعيدة تصدقين أحس أن شخصيتج نفس شخصيتى يعنى خجولة شوى جدام ريلج رغم أنج تعودتى عليه بس ما تقولين له أو تنادينه بكلمة حبيبي أو بأسمة
أنا الحين كم من يوم تجرأت وبديت أقوله حبيبي حياتى أكثر عن أول بس مرات أنسى عمري وإذا بغيت منه شئ أقوله بغيت تودينى مكان الفلانى من غير حبييي ولا هم يحزنون هذي وأنا في ملجة جي عيل بعد العرس شو
انا ما أحب أكون ناشفة في كلامى من غير ما أزقره بلأسم إلى يحب يسمعه منى
تعرفين أبغى أيميلج علشان عندي أشياء أبغي أعرفها
بعد أذنج أطرشين لى عالخاص علشان ندردش عالمسنجر أفضل
ما ادري ارتحت لج وأحس أنج بتفهميني والله عندي أشياء كثيرة أبغي استفسر عنها
وعزيزتي و حبيبتي مرايم السعودية فديتج والله ما قصرتى في الرد وفكرتج مرررة حلوة وعجبتنى تعرفين كانت في بالي تقريبا نفس فكرتج ان لما يجي زوجى عندنا بالبيت
أخذ مفتاح سيارته وأخلى حد من أخوانى انه يحطي في سيارته باقة ورد كبيرة و دبدوب كبير
ويعطر السيارة ….
وانتظر انى انفذها لما تسنح لي الفرصة على فكرة باين عليج رومنسية وياريت نتواصل عالخاص علشان استفيد من افكارج الحلوة وبعد ياريت تكتبين لى ايميلج
أحبكم في الله
الفارسية
انا لو ابو الهول تكلم كنت تكلمت في الملجه..
بس الجين ما شا الله صرت بلبل..
وبيني و بينج ما تعودت على زوجي و صرت على طبيعتي الا بعد 5 او 6 شهور…
كنت نفسج باالضبط ماكو ردة فعل و هالشي طبيعي و الله..
والله يهنيكم ببعض
:flower::flower::flower:هذا شيء طيبعي اختي في البدايه لانه تحسين كانه لازال شخص غريب عليج
كنت شراتج زوجي يتضايق
كنت بس اطرش مسجات يقولي انتي هذا الي تقدرين عليه بالمسجات (r)
بس مع الايام وخذيت وعطيت وياه عقدة لسان انفكت
في فكره كنت اسويها صح هي بسيطه بس خلتني اتعود عليه
اني كنت اعزمه على غدي او عشاء عندنا في البيت الاهل طبعا
فجاته اني جلست قربه على السفره قعت اكله بيدي
هو بروحه استحي هههه
2
الله يوفقج ويوفق الجميع ان شا ءالله
بعطيك كلااااام وافكار اتمنى انها تعجبج…
1- اذا سمعج كلام حلو قولي والله ياعمري اني أحبك وابادلك نفس الشعور بس والله استحي والله انا ايام الملجه كنت اقوله بس عاد استحي يقعد يضحك ههههههههه واقوله بعد يااااااااااااني احبـــــــــــــــــــــــك يستانس…:o
2- بعدين اذا بتعلقين الرجال فيج بينيله انج تغارين عليه والله ان الرجال يموت بالمره اللي تغار واسألي مجرب… يعني بينيله انج تستفسرين اهو راح يحس انها غيره اذا سألج قوليله لا واذا رجع اسألك قوليله اي اغار عليك موووووووت …
3-واذا طول مااتصل عليج بينيله انج متضايقه قولي ليش مااتصلت مالي قيمه عندك يعني بدلع مو بدفاااااشه … يعني انا اتذكر اني كنت اقول لزوجي لما يمر يومين مايتصل اقوله زين ذكرتني روح حق اللي اخذك مني يقولي شغلي والله شسوي اقوله انا اكره شغلك لانه ياخذك مني مااحبه يقعد يضحك اقوله تضحك يقولي خلاص عمري اقوله اها اها (يعني ابكي بس بدلع كذب يعني عن طريق ضحكه مو صج) مابي مابي زعلانه يقولي بعد محاولات ارد عليه بكلمة احبك … يستانس وااااايد
جربي وقوليلي
أنا ملكتي كانت قبل الفرح بيوم واحد بس مااعرف ولاشي
تزوجت صغيره في البيضه :eek2: