السلام عليكم ورحمة الله وبركاته
مرحبا بكل الأمهات وعساكم تكونون جميعا بأحسن حال..
يا الغاليات عندي استفسار على طلب مساعدة وعلى فضفضة … كل شي ببعضه 
ولدي الحين عمره 3 سنوات وشهرين واهوا أول عيالي وما عندي خبرة في سوالف الروضة
والحضانة.. وبصراحة احترت من الناس.. اللي يقول لي دخليه الروضة واللي يقول لي
توه صغير وبصراحة مو عارفة شاسوي.. واللي يعور القلب اكثر اني بديت مع زوجي
ندور حضانات..
وبغينا نسجله في احد المدارس اللي فيها كل المراحل من الحضانة لي الثانوي
اتصلنا المها طبعا قالوا ما بياخذونه حق روضة وممكن نسجله شهر واحد حق الدراسة السنة
الياية بس طبعا بيكون ريسبشن مش روضة والقهر ان بيكون على لائحة الانتظار
يمكن ياخذونه ويمكن لا ونفس الشي مدرسة ما ادري ايش بارك قالوا لنا انها ممتازة
بس نفس الشي ما بياخذونه هالسنة ولازم نسجله شهر واحد حق السنة الياية
وهم ممكن يكون على قائمة الانتظار ويقولون الاولوية حق اللي عنده اخوان
اذا هو بجري من وين يكون له اخو في المدرسة 😐
بس قالوا الافضل ندخله روضة مستواها ممتاز على النظام الانجليزي مثل المها
انزين والمها ما في مجال.. طيب وين نوديه؟؟ في حضانات ثانية مستواها ممتاز وممكن
يكون فيها كل المراحل ؟؟؟ واذا وديته حضانة ما فيها كل المراحل بعدين وين اوديه؟؟
كلش مو عارفة في هالامور
انا ساكنة في المعمورة يعني اي الحضانات القريبة من المعمورة وفي نفس الوقت
مستواها يليق بالمها والبارك لانهم يبون الطفل يكون مثقف :p
سمعنا عن حضانة ستيب وان Step One في حد سمع عنها
يا ليت تفيدوني بأقرب وقت ممكن علشان يسجلونه حق شهر 9..
واللي تساعدني ربي يوفقها ويرزقها الجنة وربي يجبر بخاطرها مثل ما جبرت بخاطري..
بإنتظاركم F:
هلا حبوبة .. ماحبيت ادخل بدون لااعلق .. بس انا مااعرف حتى انا محتاره وين اودي ولدي .. سمعت عن المها وقالوا انهم راح ايروحون الصناعيه .. ان شاء الله الخوات ايفيدونا ..
أنا ولدي في نيوتن الهلال ويوم دخلته كان عمره 3سنوات و7شهور بس ماشالله وايد استفاد من المدرسة كتابة حروف وأرقام وحافظ اناشيد انجليزية وبعض سور القرآن القصيرة ويفهم حق كلام المدرسة ويتكلم انجليزي بس بجمل بسيطة .. وهاي أول سنة له فيها والسنة الجاية ان شالله بيكون تمهيدي
اريد اسجل ولدي في الروضة حكومية ولكن يعطيني رقمالشخصي غلط من صار لها نفس المشكلة وكيف حلتيها علما اني مدخلته صح