أنا متجوزة من 5 سنين عن قصة حب كبيرة أوي بس دلوقتي جوزي على طول متضايق مني وعلى طول بيقول لي أنت تغيرتي، واستحالة تكوني أنت البنت اللي حبيتها وخطبتها واتجوزتها ياريت ترجعي زي الأول
بصراحة هو عنده حق في كلامه لأني فعلا تغيرت…
بس دلوقتي مش عارفة أرجع زي الأول تاني
علشان كده عايزاكم تساعدوني وتقولولي أعمل إيه علشان أرجع زي الأول البنت الحلوة الجميلة الرشيقة
وإزاي أكون زي القمر في عين جوزي على طول حتى بعد 100سنة من الجواز لأني بصراحة خايفة يبص لحد غيري
فياريت تساعدوني لأني ماليش حد غيركم أستشيره
دي يا بنات واحدة من المشاكل اللي جاءت لنا الفترة اللي فاتت واللي كان معظمها بيحمل نفس المضمون ده، الظاهر كده والله أعلم إن دي بقت حالة عامة عند نسبة كبيرة من البنات المتجوزين….وهي إن فيه بعض البنات بعد الجواز بيتغيروا بنسبة كبيرة جدا سواء كان التغيير ده في طريقة اللبس أو في طريقة الكلام أو أسلوب الحياة، إحنا طبعا مش ضد التغيير طالما إن التغيير ده بيكون للأحسن بس المشكلة إن التغيير ده ساعات كتير بيكون للأسوأ يعني تلاقي البنت بعد الجواز بتبدأ تهمل في حاجات كتير زي مثلا إهمالها لنفسها ولبسها أو إهمالها لجوزها وحاجات تانية كتير، ومن هنا بتبدأ المشاكل في الظهور….
أكيد طبعا متفقين
بما إننا متفقين
طيب ما تيجوا نفكر مع بعض في الأول كده ونشوف إيه الأسباب اللي بتخلي البنت تتغير بعد الجواز بشكل كبير….
تعالوا نفكر مع بعض
-1-
التفكير الخاطئ
للأسف الشديد فيه بنات كتير بتفكر في إن البنت لازم تكون حلوة ورقيقة وتلبس على أحدث موضة وتتكلم كويس علشان أي حد لما يشوفها يعجب بيها وتتجوز، وإنها لما تتجوز مش مهم تهتم بنفسها لأنها خلاص اتجوزت والفاس وقعت في الراس وده طبعا تفكير مش صح لأن المفروض إن اهتمامها بنفسها بعد الجواز يزيد مش يقل… كمان فيه اعتقاد خاطئ عند معظم الستات المتجوزين وهو إن الزوجة ما تهتمش بنفسها ولا تضحك في وش جوزها إلا مرات محدودة علشان يحس بقيمتها ويعمل كل ما في وسعه علشان يشوف ابتسامتها وتبقى غالية عنده.
الاهتمام بالبيت والأكل
فيه بنات تانية شايفة إن الاهتمام بالبيت ونظافته والأكل أهم من أي حاجة تانية وبيعتقدوا إن الست علشان تحافظ على بيتها وحياتها الزوجية يبقى لازم تهتم بالحاجات دي "الأكل ونظافة البيت" وبس ومش مهم إنها تهتم بأي حاجة تانية وللأسف فيه أمهات بتعلم بناتها كده…علشان كده بنلاقي البنات اللي بتمشي على المبدأ ده بتدي كل اهتمامها للبيت والمطبخ على حساب اهتمامها بنفسها وزوجها وده طبعا شيء مش مطلوب في الحياة الزوجية.
الاهتمام بإنجاب الأطفال
فيه بنات تانية لما بتيجي تتجوز تلاقي إن الكل بينصحها ويقول لها "اغلبيه بالعيال يغلبك بالمال" وطبعا النتيجة بتكون إن البنت بتخلي المقولة دي هدف قدامها بعد الجواز بتعمل كل ما في وسعها علشان تحققه…. وبتكون النتيجة طبعا كمية كبيرة من الأطفال وبالتالي ضياع صحتها وجمالها وشبابها في سن مبكر بسبب كثرة الإنجاب مش كده وبس دي كمان مش بتقدر تهتم بيهم وتربيهم التربية الصح.
الاهتمام بالشغل زيادة عن اللزوم
أحيانا البنت بعد الجواز بتشوف إنها لازم تهتم بشغلها علشان تكبر وتحقق ذاتها وتوصل لمكانة كبيرة زيها زي زوجها علشان كده تلاقيها بتدي كل جهدها وطاقتها لشغلها وبتكون زي النحلة في الشغل وناجحة جدا والكل بيشهد بنشاطها طبعا خارج البيت لكن أول ما بترجع البيت بتلاقيها بقت مش قادرة تتحرك ولا تتكلم ولا مهتمة ببيتها ولا بجوزها ولا حتى بنفسها داخل البيت ولا أي حاجة ومع مرور الوقت بتلاقي إن بيتها بيضيع منها من غير ما تحس.
عدم اهتمام الزوج بالزوجة
علشان نكون موضوعيين في كلامنا أحيانا بيكون الزوج نفسه هو السبب في حدوث تغيير للزوجة بعد الجواز نتيجة عدم اهتمامه بيها وعدم تشجيعه لها بأي كلمة حلوة يعني مهما تعمل الزوجة دايما شايف إن اللي بتعمله ده شيء عادي وإنه واجب عليها لازم إنها تؤديه على أكمل وجه، وبكده تبدأ الزوجة تهمل نفسها وتتغير وماتبقاش زي الأول فعلا.
المفتاح الأول
اهتمي بنفسك على قد ما تقدري
ده المفتاح الكبير والأساسي علشان حياتك تكون سعيدة وهو إنك تهتمي بنفسك وده لأن أي راجل في الدينا دايما بيحب يشوف مراته أحلى ست في الدينا علشان كده عايزينك تهتمي بنفسك وبلبسك وماكياجك حتى وأنت قاعدة في البيت، يعني من الآخر كده خليك دايما على سنجة عشرة ويا ريت كمان تحاولي تغيري من استايل لبسك باستمرار وتلبسي على أحدث موضة وتغيري تسريحة شعرك باستمرار أو حتى تغيري لون شعرك يعني من الآخر كده خليكِ امرأة متجددة باستمرار.
اوعي تعملي بالمعتقدات الخطأ
في معتقدات كتير خطأ زي "اغلبيه بالعيال يغلبك بالمال" أو "جوزك على ما تربيه وابنك على ما تعوديه" أو "أقرب طريق لقلب جوزك معدته".. وغيرها من المعتقدات الخطأ اوعي تنفذيها في حياتك الزوجية لأنها ممكن تدمر حياتك واعرفي إن مش لازم زي ما مامتك عاشت تعيشي لأن مامتك كان لها وقتها وعصرها وأنت ليك وقتك وعصرك اللي لازم تعيشيه بالطريقة الصح وزي ما أنت عايزاه علشان تقدري تستمتعي بحياتك.
أنتِ لسه صغيرة
اوعي تفكري إنك علشان اتجوزتي وخلفتي تبقي خلاص كبرتي ولازم تلتزمي بطريقة معينة في اللبس والكلام وطريقة معينة في الحياة وإن الحياة لازم تكون ماشية على وتيرة واحدة؛ الأكل والمطبخ والنوم…بالعكس أنت لسه صغيرة وفي عز شبابك علشان كده المفروض إنك تعيشي شبابك وحياتك وتخرجي وتتفسحي مع جوزك وأولادك وليكن حتى أيام الإجازات.
نظمي وقتك
أي واحدة بتشتكي إن مفيش عندها وقت علشان تهتم بنفسها وإن البيت والأطفال والشغل -لو كانت بتشتغل- واخدين كل وقتها أقول لها ماشي.. الله يكون في عونك فعلا، بس دي مش أسباب تخليكي تهملي جوزك أو تهملي نفسك لأنك لو نظمتي وقتك بطريقة معينة على حسب ظروفك هتلاقي عندك وقت تعملي فيه كل حاجة… يعني على سبيل المثال مش لازم تروحي السوق كل يوم كفاية مرة في الأسبوع تجيبي فيها طلبات البيت بالأسبوع وتحطيها في التلاجة، كمان مش لازم تقفي في المطبخ كل يوم خلي المطبخ ده يوم واحد في الأسبوع تعملي فيه كذا أكله وتحطيها في التلاجة بحيث يبقى باقي الأسبوع فاضي..
كمان ياريت تحاولي على قد ما تقدري تخلصي أي حاجة من شغل البيت قبل جوزك ما يرجع من الشغل علشان تكوني فاعدة في انتظاره بابتسامة حلوة.
بيتك أولى بيكي
ولو شايفة إن الشغل واخد كل وقتك وإنك مش قادرة توفقي بين الاتنين وإن ده مأثر عليك أو على اهتمامك ببيتك ومأثر على صحتك وفي نفس الوقت مش محتاجة العائد المادي اللي بيجي من الشغل ده يبقى اقعدي في بيتك واهتمي ببيتك وجوزك لأن دول هما أهم حاجة في الدينا واوعي تفكري إن ده بيقلل من قيمتك في الحياة وإنك بكده مش هتكوني زوجة مثقفة ومش عندك أي خبرات في الحياة واعرفي إنك ممكن تثقفي نفسك حتى وأنت قاعدة في البيت من خلال القراءة والاطلاع على كل ما هو جديد.
شوفي جوزك بيحب إيه واعمليه
مش عيب أبدا إنك تشوفي جوزك عايز يشوفك إزاى وتحاولي تخلي شكلك زي ما جوزك عايز يعني مثلا لو بتعاني من مشكلة زيادة الوزن بعد الجواز وجوزك عايز وزنك يرجع زي ما كنت في أيام الخطوبة يبقى حاولي على قد ما تقدري ترجعي وزنك زي ما هو عايز.
بس قبل ما نقول سلام بنأكد عليك إنك لازم تاخدي
بالك كويس وتهتمي ببيتك ومعاه تنتبهي لنفسك ولمظهرك ولوزنك ولزوجك علشان تقدري تحافظي على حياتك الزوجية
ولا أنت ليكي رأي تاني؟!
مستنين نعرف آراءكم وتعليقاتكم الجامدة قوي على العدد
سلام
الموضوع منقووووووووووول
من موقع بص وطل
لقيت انه موضوع مفيد لينا جميعا
بالله عليكم تدعولي ربنا ييسر عليا امور الزواج
انا للحين ماتزوجت بس مخطوبه وباحاول وبكل جد اتبع النصايح القيمه..
ودمتم..
شكرا ليكى
