السلام عليكم خواتي….ولدي عمره 3 شهور ، بدت معاه الأكزيما من ثلاث أسابيع تقريبا،وهي عباره عن جلد جاف وعقب فترة يحمر و يتهيج ويسبب حكة وقشرة، المهم وديته كذا مكان بس بعدها الأكزيما موجوده تحت وفوق عينه و على أذنه و خشمة و فروة راسه و ذقنه…
الصراحة وايد مضايقة من هالمرض، ولدي أول واحد يتعرض افعايلتنا لهالمرض…بنات ابليز اللي طفلها او طفلتها اتعرضوا لهالمرض اترد علي و اتقولي كيف عالجته و شو الادوية اللي استخدمتها وفي اي مستشفى؟ وهل يابت الادوية نتيجة ولا لاء ….و متى اختفى المرض نهائيا عن الطفل؟؟
ولا حتى رد واحد…..ليش انزين؟؟؟ معقولة محد مرت عليه هاي المشلكة؟؟؟؟
السلام عليكم ورحمه الله وبركاته
والله نفس مشكلة بنتي عمرها ثلاث شهور وماني لاقيتلها حل يس هيا عندها الأكزيما حول العينين وفروه
الرأس والوجه أرجوا انه أحد يساعدنا اللي عندها خبره أنا نصحوني اني أحطلها زيت زيتون بس ما فاد وألحين
أحطلها زيت جنسون حق الأطفال خف الي في راسها شويه بس باقي اللي على عيونها وخدودها
الله يشفيلك ولدك ويعافيه من كل شر
بس أنا لسه ما وديت بنتي المستشفى لأني وديتها قبل وقالت الدكتوره جيبيها بعد 3 شهور لأنه طبيعي
قبل 3 شهور وقالت اذا زادت وما راحت وديها عند أخصائيه جلديه بس لسه ناويه أوديها هالأيام ان شاء الله
هلا اختي سوالف ليل…الله يعافي بنتج انشالله…لازم اتودينها عند طبيب جلدي عسب يعطيج كريمات الترطيب…انا سرت مستشفى الوصل و عطوني مرطب ليبوبيز ومن بحثي فالمنتدى البنات يمدحون هالكريم وايد، هو مب علاج بس كريم مرطب ويمنع الجلد من التهيج…وعطوني بعد كريم الفاكورت بس يحتوي عالكيرتيزون واعتقد هي مادة ضارة اذا استخدمت على المدى الطويل…خلاص قررت اني ما استخدمه…وفالوصل قالي الدكتور نفس الكلام اللي قالولج اياه..انه مب لازم اوديه المستشفى بس الصراحة ما قدرت لانه الاكزيما اتزيد حوالين عيونه و اذنه و راسه …فوديته البارحة المستشفى الايراني و عطاني شرابين و مرهم..وقالي اسيرله بعد عشر ايام….
انشالله يخفون الصغارية..
وبعد قريت فالمنتدى عن زيت لقمان…يقولون انه زين حق الأكزيما و يخفها…بس للأسف مافي وايد تجارب….بنات اللي جربت هالزيت اتقوللنا رايها فيه…وهل هو فعلا علاج من الاكزيما؟؟؟
الله يعافي ولدج حبيبتي…ما حبيت امر من غير ما ارد عليج…بس للاسف ما عندي خبره..بس وايد ما اليهال عند اهل ريلي فيهم…بس ما اعرف شو يسوون…بس اخت ريلي اذكر استخدمت الفازلين لولدها و تقول احسن شي جربته له…وديه دكتور متخصص في الحساسيه احسن
وما يشوف شر الحلو
هلا والله بآنجل آيز…شخبارج و شخبار حمودي انشالله بخير…والله فرحت من قريت ردج.. مبروك عالحمل:wink:…الله يسمع منج و يعافي كل الصغاريه…وانا وديته عند طبيب مختص وقالي اراجعه بعد عشر أيام…انشالله يخف لين هذاك الوقت، والله والواحد يتم مهموم لين ضناه يتعافي…الله كريم…
اختي عروسة البحرين…الله يعافي بنتج يااااااااارب…امي الله يطول في عمرها يابت حق ولدي زيت لقمان اللي وحده من الخوات يزاها الله خير ذكرته في واحد من المواضيع…يارب ايكون ابفايدة…و بخصوص الحليب…ولدي لين احين يرضع طبيعي ماعطيته صناعي…مع اني ماخذه حليب ابتاميل و كنت ناوية ابدى معاه من يكمل ثلاث شهور لانه دوامي جريب…بس عقب ما ظهرت عليه الاكزيما خفت اعطيه و يتحسس..ومشكورة الغاليه عالمرور…
هلا خواتي…انا بديت استخدم زيت لقمان…لاني احس انه الكريمات ما فادت ولدي بالعكس..اسبوع عن اسبوع يزيد…وولدي ارضعه طبيبعي ما عطيته صناعي…تتوقعون الاكل اللي آكله يأثر عالاكزيما??
هلا حبيبتي فلونة ولدي المتوسط، صار لي احتكاك فظيييييييييييييييييييييع، والله لدرجة يطلع منه دم وولدي ما شاء الله عليه ابيضاني وفجسمه محمر وما كانت عندي خلفية انها اكزيما لين ما عرفت عن طريق صديقتي صدفة وركضت فيه عند افضل اخصائي وقالي وقفي كريمات الاطفال وعطاني كريم والله نسيت اسمه
المهم الحين اختفت نهائي
بس المصيبة الحين اتعرفين شوووووووووو!!!
انا اللي فيني اكزيما:
والله اقوم بالليل اتحكك بطريقة خيالية
وين طلعت لي عاد برقبتي!!
بموت ، رقبتي صارت حمرة ومن الحكة طلعت لي خطوط غريبة وصارت رقبتي حفلة
لما رحت الدكتور قال لي هذي مصيبة العصر وخاصة الحريم من كثر الكريمات اللي يحطونها!!
قال لي وقفي كريمات بتتوقف الاكزيما
والله يعينا يا اختي فلونة الحين تاركة شوي الكريما لين يخف برد اسوي لووول
متزوجة اتخيلي ما احط كريمات ما يصير !! والله مشكلة
هلا اختي مملكتي الصغيرة..ماعليج شر انشالله….عند أي دكتور اتراجعين؟؟؟ بخبرج عن دكتور جلدي خطير اسمه ابراهيم كلداري في جميرا…وديت ولدي عنده من اسبوع و عطاني كريم استخدمته لولدي و خفت عنه لاكزيما بنسبة 80 %، تقريبا كل المناطق الجافة و المتقرحة طاحت خلال ايام بس…واليوم عندي معاه موعد عسب يشوف الولد…جربي اتسيريله، اعتقد الكريم اللي هو يعطيه ما يتحصل فالصيدلية…والله يقومج بالسلامة…