بموضوع سابق تحدثت من ان أحد اصحابي زواجه خلال اسبوعين من الان واستمرت الخطبة (( 4 أشهر )) .. جاءني في استراحتي بعدما تم مهاتفتي تلفونيا ..وتحدث معي ان اعصابه هاليومين (( تالفه ـ وتعبان )) وحاب ان يفضفض لي اللي بقلبه .. ورغب مني النصيحة وكانه داخل على معركة (( ام المعارك )) او (( عاصفة الصحراء )) طبعا انتهت هالحروب ونسيناها ولكن صاحبنا مقبل عليها وهذا من كلامه مو كلامي ..قال خطبت لي امي واختي الكبيرة من عائلة (( الفلان )) واصرتا كل من امي واختي عليهم ( لان البنيه مدرسه وجميله .. ومن عائلة جدا مناسبه لعائلته .. المهم ورغم ان الخطبة جاءت بعد ماتخرج من الجامعة هذا كلا م صاحبي (( لعلمكم ماتوظف صاحبنا حتى الآن )) ولكن الله يستر عليه متوظف بمؤسسة براتب ( 2800 ريال )) لان التوظيف قالوا له بعد خبرة سنتين تراجعنا .. يقول ظنيتهم يقصدون خبرة بالزواج لان استمارة التوظيف اول ماتعبيها مكتوب ( متزوج أو غير متزوج ) المهم خطبت من تلك العائله .. وامي ماخلت زين ( بمنطقتي ) الا واذكرتها لي بعروستي المنتظره (( طول .. وجسم .. وبياض .. رغم ان بعض بناتنا ورجالنا الوانهم حنطي والبياض نادر ماتلقاه والسبب هالغبرة والحر اللي ماسكتنا هاليومين .. المهم ويقول من اوصاف امي لخطيبتي بعد ( ان فمها على قولت امي ماتدخل حلاوه الملبسه منه من صغره .. مادرت امه الله يعطيها الصحة ان فيه حلاو ملبس ماتاكله الا اللي فمها من الاذن للاذن .. لان حلاو اليوم مو مثل حلاو الامس .. اللي لحقوا عليه امهاتنا ( لان فيه تقشف ) ..ومن اوصافه ايضا (( شعرها طويل يضرب الى تحت ركبتها )) ماعرف صاحبنا ان البنات هاليومين دلعها في قصر شعرها .. المهم صاحبنا ماترك للبنيه شين ابد .. كل اوصافه لها زين بزين لان امه واخته ذكرنها بتك الاوصاف الجميله .. على قولت نسواننا ( تجنن ) الله يكفينا شر الجنون .. وصاحبي مصاب ذيك الايام شبيه بالاكتئاب ويقول (( مرة يجيني مغص ومره ينتفخ عندي القولون ومرة ……… ومرة ……..)) اكرمكم الله .. منحاس حوسه .. قلت له ليش متنكد وخلقك ضايق واعراضك ومؤشراتك المرضية زادت هاليومين ..والمفروض اللي يبي يتزوج يفرح ويفرفش ويكون انبساط العالم كله بجانبه .. قال (( الاول مادري عن اوصاف البنت هي زينه هي شينه هي طويله هي قصيره هي بيضاء هي سمراء هي متسلطة هي ضعيفة الشخصية هي ….. هي …… كل اللي اعرفه ان امي واختي مبسوطين من البنت (( العروسه )) بس انا لما اشوف اخوتها اقول الله يستر مابهالعائله زين ابد .. بيني وبينكم امه اعرفها شخصيا سبق وان توسطت لها باجراء عمليه ( عيون بمستشفى تخصصي بالرياض ) ومسويه عمليات بعيونها مرتين وعليها ضعف شوف بس ماحبيت اذكر صاحبنا بهالسالفه )) قال انا ابي ادخل على البنيه شختك بختك .. كذا بس ادخل ولااعرف عنها شيء ابد .. حتى مدرستها اللي تعمل فيه مو معلميني فيها وحتىتخصصها الدراسي مابعد عرفته .. والله حرام لان اهلها رفضوا ان اشوفها وقت الخطبه .. حتى من يومين كذبت عليهم قلت ابي نطلع شهر العسل بعد الزواج خارج المملكة ابي صور للبنت اقص لها جواز (( قصدي اشوف صورتها والا انا ماني طالع حدود المملكه وشهر العسل ابي اقضيه فوق ……. )).. رفض اخوها (( الشيفه )) وقال لا معارفنا بالجوازات اكثر منك .. المهم الله يستر رغم ان صاحبنا انا كافله بمبلغ 150,000 الف ريال .. وباقي التكاليف كلها اسلاف باسلاف (( بناتنا غاليات )) بس مابعد عرفوا بعض اولياء الامور ان فيه شايب عمره 60 سنه تزوج من احد البلدان العربية ( شافها وشاف جمالها وبياضها وماكلفه الزواج 20000 عشرين الف .. اما حنا بالذات ( بمنطقتنا )) زواج على شوفت امك او اختك وهذه هي المصيبه الكبرى .. لان الفروق الفرديه بين البشر تختلف من شخص لاأخر .. ويمكن ذا الشيء يعجبني بس مستحيل يعجب شخص آخر .. ولو ماختلفت الاذواق لبارت السلع على رآي المثل .. وكلا منا له رايه واستقلاليته .. ولايمكن ان يقنع بني البشر ضمن اذواق الآخرين الا ماندر .. .. و على قولت صاحبي بكرى لما يصير مشاكل بين الزوج والزوجه بالمستقبل قالوا ياكثر مشاكلهم ماهم متفقين .. يعني يتخلون عنك مثل شربت الماء .. حاولت من خلال كلامه ان اقول له الزواج قسمه ونصيب .. ونسيت اقوله بعد الزواج (( وضرب من الافكار.. والافلاس )) بس صاحبنا زوجته معلمه ماعليه .. بكرى يتساعدون بينهم .. كل سواليف صاحبنا فعلا اعجبتي مما آثرت ان اكتبها لكم لان الفكره اعجبتني .. بس احب اقول (( ليش مانكون صادقين مع انفسنا وفي حالة انسان خطب من احد العوائل ومعروف خلقه ودينه وبي ازودها زين وعارفين فلوسه ومركزه العملي او الاجتماعي .. بأن يتم مشاهدته (( لخطيبته أوعروسته )) حسب النصوص ووفق الشريعه .. او مانعرف ايها الآباء النصوص الشرعيه الا اذا صار هناك خلاف بين ( الزوج .. والزوجه ) ليش مانتبع السنه والشرع من بداية الخطبة وحتى نهاية العمر .. اليوم حتى (( حلاوابوفال )) انقطع من السوق لان فيه ضحك على الناس .. لانك تدفع مبلغ من المال على امل ان يطلع لك هديه اكبر من المبلغ المدفوع .. والله ضحك بضحك .. مابالك تدخل ذاك الليلة على عروستك وانت كاشخ وانت بايع اللي وراك وقدامك والديون واصله اقصى حد من الخطوط الحمراء اللي تؤدي بهذا العريس الى الهاويه .. والنتيجه (( ماطولك ياليل )) الاصباغ ماليه الوجه والالوان منتشره في كل اجزاء جسم العروسه .. وبعد اسبوع وهدؤء العواصف تقوم الصبح مبكر وتناظر بوجه العروس وهي نايمه بجنبك وتقول (( وش جاب صديقي الشيفه عندي بالفراش )) او تحصل على التسريحه اللي بغرفه النوم من بكرى ( الرموش الطويله ـ والعيون الملونه ـ والشعر المستعار وبالاالوان ) لا والمصيبه اذا كانت معلمه وهي زوجتك وراتبها كله تقسيط لانها تبي تبني (( فلل دبلوكسات )) رح عاد سدد الديانه نتيجه للمبالغ المسحوبه منهم علشان (( العرس ومهر صديقك …عفوا عروستك )) والايام القادمة تشوف كلامي .. بس اللي يبي يتزوج وهذه وجهة نظر شخصيه لاافهم غلط بعد لاننا نعيشها هذه الايام .. لابد ان تشترط (( لازم اشوف العروس او الخطيبه وبالقوه لانك بسوق الخيار .. بس بشرط امام اهلها امها او ابوها .. وبناتنا يستاهلن من يتزوج منهن اقسم بالله .. ولايمكن ان نبتعد عنهن ابدا مهما وضعت امامنا من عراقيل .. بس خلك حمش واترك آراء واوصاف الام او الاخت .. عينك عينك )) لو تترصد لها عند الباب وهي طالعه للسوق بس المشكلة ماتبي تشوف الا العيون لانها منقبه والزول ..والمشكلة بعد اذا كانت لابسة ( كعب عالي من الموضه الجديده )) المهم هذا هو راي الشخصي وبسلامتكم والله يبارك لكل من يريد الزواج من بناتنا وشبابنا .. وعلى فكره ذا الموضوع منطبق فقط بمنطقتي وحسب علمي ببعض المناطق فقط .. والا فيه مناطق وهم على صح من انك تشوف خطيبتك وامام اهلها .. والشرع اجاز ذلك .. وللحد ايضا من المشاكل التي تحصل بعد الزواج اذا لم يشاهد خطيبته او عروسته .. وعلى فكره صاحبي طبعا تزوج من شهر بعد .. بس حسب مااعتقد بانه مبسوط .. لانه يقضي شهر عسل ( بجده والطائف )
الله يغربل ابليسك
الاستاذ الفاضل
سلمت يمناك وكلامك صحيح 100% وموجود في اغلب المجتمعات وللاسف رغم ان الشرع اباح للخاطب رؤية خطيبته إلا انه ما يزال لدى البعض جهلاً بذلك او عادة وعرفاً يمتنعون من خلالها .. ولكن متى تقع المشاكل لدى البعض عندما يتم وصف الخطيبة بصورة قد يرونها ولكن الخاطب قد يتفاجأ بذلك ولا يرى شئياً مما تم وصف فيقع الفاس في الراس.
يزاك الله خير وسدد الله خطاك
بسم الله الرحمن الرحيم
السلام عليكم ورحمة الله وبركاته
اشكرك اخي الفاضل على مشاركتك الجميله
لكن ليتك ابتعدت عن الوصف الدقيق والتطويل في المشاركة قد يشعر القارئ بملل دون الوصول للهدف الذي تعنيه منها ..
ارجو ان تتقبل رأيي برحابة صدر
ورؤية الخاطب لمخطوبته شرع لم يحرمه الدين الاسلامي بل حث عليه سيدنا محمد صلى الله عليه وسلم ..
رغم رفض الاهل لرؤيه الخاطب لأبنتهم قبل عقد القران وذلك بسبب ما تفرضه عليهم العادات الاجتماعيه والتقاليد من قيود …
الاتتفقون معي بأن الاهل بحاجة لأكتساب ثقة الخاطب حتى يمكنوه من الرؤيا لأن بعض الشباب هداهم الله لم يعودوا متقيدين بتعاليم الدين من هذه الناحيه وهي عدم وصف المخطوبه فنجد الشاب اذا لم تعجبه اخذ بوصف ابنتهم عند الناس وهذا ينفر الخطاب منها ..
لكن متى توافر شرط الكتمان اصبحت الرؤيه امر عادي لدى الاهل …
وللمعلومه جميع من مر بتجربة الرؤيا يقول ان الخاطب يشعر براحه نفسيه تجاه الفتاة حتى وإن كانت على قدر بسيط من الجمال مجرد مايقذف الله في قلبيهما السكينه والميل ..
ويبقى كل شئ قسمه ونصيب
لك تقديري واحترامي
أخي الكريم ملياردير
أرى كلامك جداً منطقي وهذا يعود لأنه الأمر في حدود الشرع
وقد سن الأسلام أن ينظر الخطيب لمخطوبته … فإذا تيسر ذلك دون أن تعرف ولاكن في حدود علم ولي أمرها
حيث روى جابر " إذا خطب أحدكم فإن أستطاع أن ينظر منها إلى مايدعوه إلى نكاحها فليفعل" قال فخطبت جاريه من بني سلمه ..فكنت أتخباء لها , حتى رأيت منها مادعاني إلى نكاحها"
رواه أحمد وأبوداود
وهذا بحد ذاته يدل على حرص الأسلام على أتخاذ الخطوات الفطريه والطبيعيه
ولايمنع الأمر بأن ينظر المخطوب الى خطيبته لأنه ذلك من حقوقه في كونه سيرتبط بتلك الزوجه
ولاكن مأجهله هو سبب تعصب بعض من العوائل من هذا الأمر مع العلم أن ذلك لايخل بالدين
وقد يكون الخوف أو السبب الحقيقي وراء رفض عائلة الزوجه هو بأن يتراجع الخاطب بعد رؤيته عن الزواج
وأنا لاأرى عيباً لأنه ذلك أيضا من حقوقه بكونه سيرتبط بها مدى العمر أذا شاء الله وليست هي بالفتره القصيره
وهذه هي وجهة نظري القاصر
وشكراً لك أخي الكريم على هذا الموضوع
ولاتحرمنا من جديدك
ولك مني كل التقدير والأحترام
تحيااااااااتي
2222
what"s wrong?????
ههههههههههههههه
طااااح ما احد سمى عليه ؟؟؟؟