الخوات الي ساكنين في بيت أهل الزوج . ممكن شوي 2024.

السلام عليكم ورحمة الله وبركاته ….

خواتي أنا صار لي متزوجة تقريباً سنتين و 6 شهور … بس أول سنه لي كنت ساكنه في بيت بروحي وبعدها صارت لي ظروف وانتقلنا انا وزوجي إلى بيت هلي لأنه بيت هله صغير ومايكفينا … والحين ريلي يبي يسكن مع هله بحكم إنهم غيروا بيتهم وخذوا بيت أكبر … وأنا بصراحه ماأعتقد أقدر أتأقلم معاهم مب لشي بس طول حياتي أنا آخذ راحتي وإذا أنتقلت راح اتقيد بدخلت أخوانه وطلعتهم مع إنه راح ايكون لي ملحق في الحوش بس مادري متى أروح أقعد معاهم ومتى اتفرق حق نفسي !!! … وطول ما أنا بعيده أمه اتعاملني أحسن معامله بس أخاف اتغير معاملتها لأني أجوفها أشلون اتعامل مع زوجة حماي … بس بعد زوجة حماي لكم عليها شوي لها حركات … فأنا أخاف اتدخل في حياتي بعد وأنا ماأحب حد يدخل في حياتي أنا وزوجي ولا حتى في تربيتي حق ولدي ؟؟؟

فــ أيش تنصحــوني فيه … ممكن تعطوني من تجاربكم ؟؟؟

[FRAME="15 70"]

هو كانه مبين انك راح تسكيني معهم لفتره طويله دام انه لك ملحق

نصيحه حبوبه اعتبري نفسك في بيتك او بيت اهلك وعاملي حماتك مثل ما تعاملى والدتك بالضبط

بيني لها انها غاليه عليك قربي نفسك منها
بالطريقه هذي راح تكسبيها لصالحك وتزيد غلاتك عند زوجك

عسى الله يوفقك يارب

تحيايي لك حبوبه
[/FRAME]

مشكورة أختي … أنا ماأقول لج إنها ما تعاملني عدل لا والله اتعاملني احسن معامله بس أخاف إذا سكنت معاها تتغير وتتدخل في حياتي … لأنه هي فيها هالطبع ..

اولا مشكورة لانج عطيتنا الثقة ………… شوفي حبيت اقول لج شي انا ما اعرف حماتك بس اكيد زيي ماقلتي حماتك تحبك انتي خايفة تتغير لما تعيشين معاهم ………هذا شي بتحسينه اكيد تدرين ليش لانه راح تكونين معاهم في بيت اربع وعشرين ساعة وطول اللاسبوع على مدار الشهر كل السنه …. فراح اتعرفين طبايعها يعني هي راح تكون طبيعية طول اليوم مو زي لما تروحين لها تزورينها ………انا ما اقصد انها راح تتغير للأسوأ لا ……… بس لما تعاشرين الناس وتكونين معاهم تتعرفين على طبايعهم زين وتعرفين شنو يضايقهم وشنو يحبون وراح تلقين اللي يعجبك واللي مايعجبك وكلنا فينا اخطاء وعيوب ومحد كامل ……..عاد انتي وذكائك ………. تغاضي عن اللي تشوفينه ولا تخلين زوجك يشوفك الا بخييير يعني لا تحطين نفسك في مواقف شفت اللي صار او سمعت .. خليه يشوف ويسمع وانتي ساكتة ……….. لا تخلينه بالنص بينك وبين اهله …….. الدنيا لسه بخير……….. ماوصيك بحماتك هي امك حطيها بعيونك وسوي لها اللي تبي ولاتسمع وتشوف منك الا ان شاء الله ساعديها قبل لا تطلب وخلك في الصورة انتي اللي تحطين مكانك وتبنينه … تعشمتي خير يجيكي خيير والعكس.. ولي شافتك مهتمه فيها وفي زوجك بتحبك وبتعاملك بالمثل …… هذا ما يمنع ان بتكون في مواقف بتضايقك مصارين البطن الله يعزك تتخانق كيف الناس ………. خلك طبيعية وتوكلي على الله دام هالشي زوجك يبيه وكل ماكنتي له عون وسند حبك وخلاك في عيونه

مشكورة أختي ( ضحكة كذوبة ) بصراحه كلامج أثلج صدري … وإن شاء الله ماراح ايصير إله كل خير ..

يالغاااااااالية انا ااكدلج انها بتتغير لان اللي بعيد عن الغير قريب للقلب (انا عندي 2من حريم اخواني عرسن في نفس اليوم المهم كان تستوي حركات من امي بحكم العمه تبى اتكون الكل في الكل بعد 5سنوات وحده من حريم خواني طلعت، والحين عقب 10 سنوات اللي طلعت علاقتها ولا احلى مع امي اما اللي بعدها مع امي في حساسية بينهم)هذا شي طبيعي لانه العيشة مع بعض اتولد حساسية.

في امور لازم اتحطينها في بالج واتاكدي انها لازم تتغير:
اولا علاقتج مع ريلج جدام اهل ريلج،حاولي جدامهم اتكونين جدا عادي بينج وبين ريلج وفي ملحقج خذي راحتج، الام اتغار يوم اتشوف ولدها كيف يدلع حرمته او يكلمها او ياخذ رايها الخ حاولي علاقتج مع ريلج اتكون سطحية جدام اهله وحتى اذا صار اي نقاش لا تتناقشين معا جدامهم،في غرفتج سوي كل اللي تبينه ناقشي وحاوري وهو على فكره بتقبل افكارج وارائج بعيد عن عيونهم بفكر فيها بعقلانية اكثر من عناد او يريد يثبت رجولته جدام اهله الخ الخ يعني حاسبي على تصرفاتج جدامهم.

ثانيا خلي هو المتحدث الرسمي عنج عند اهل ريلج: اذا في موضوع او اي شي مب عايبنج هو اللي يتكلم عنج مثلا ما تبين تطلعي هو يقول انا مااريدها تطلع (السبب هم بقولون متكبره او مغروره وكلام ماله اول ولا اخر) و اذا صار موقف احد حاول يهزئج او يجبرج على شي ما تبينه هو يساندج (هذي اشياء بسيطه بس اذا ما حليتيها من البداية صدقيني بتكبر الضيقة في قلبج واتصير مشاكل مع ريلج…وهو اللي يحط حد بينج وبين امج يعني هي ماتتدخل في حياتج ولا انتي تبعدينها بالمره مهما كان هاي بحكم امج وبتلقين منها النصيحه والفايده والخبره حتى في تربيت عيالج….

ثالثا علاقتج بعمتج: لا اتروحين لعندهم وانتي متوقعه الاسوا مهما كان اعذريها اوتذكري عشرتها الطيبة واعذريها ان غلطت بحقج لانها بمكانت امج ولو غلطت عليج ابدا لا اتريدين عليها بوقاحة مهما كان احترام الكبير امر من رب العالمين …كل هذا بخليج تكسبينها وتكبرين بعيون ريلج لان احترمت امه…وحاولي ترضينها واتقربيها منج لانها هي حتى بتكون سند لج على ريلج اذا ظلمج في يوم…

واذا ريلج انسان قوي صدقيني بترتاحين اما اذا ضعيف وطيب واااااايد او ما يعرف كيف يتصرف بتتعبين شوي بس خليج انسانه واعية وفاهمه واتوجهين ريلج على الحق واتخبرين متى تبين يساندج وبدون ما تظلمين حد من اهله..

حاولي تفهمينهم واذا كانوا كثيرين المشاكل لا تحتكين فيهم وايد يعني وقت الغدى كوني معاهم عقب روحي لملحقج والمغرب يلسي معاهم للعشى وردي ملحقج..اما اذا كانوا طيبين المعشر اتغاضي عن الاشياء التافه ولا اتكبيرين المشاكل وتعطيها اكثر من حقها…

وهذي كلها من تجربتي الشخصية: عشت فتره بسيطه مع اهل ريلي كانوا طيبين معاي بس ما خلى من المشاكل مسانده ريلي هي اللي خلتني اتحمل العيشه معاهم(لان امه اتحب تتحكم بكل شي) وريلي ماقصر معاي ولا مع اهله وعطى كل واحد حقه وكان يوقف امه اذا اتدخلت في حياتي او في عيالي وكان يقولها خليها اتربي عيالها عكيفها انتي عطيهاخبرتج بس في النهاية هي امهم… يعني ما كان يخليها تتحكم فيني وكان يجبرني مرات اسير معاها للعزايم حتى لو ماكنت اريد بس لانه كان يتجنب المشاكل وفي النهاية كله لمصلحتنا..

والله يسعدج دنيا اخر…

حبيبتي انا ساكنه مع ام زوجي والبيت اساسن لزوجي وهو ولده الوحيد صحيح انك ماراح تاخذ ين راحتك بس هذولي الناس بمكانت اهلك لخاطر زوجك روحي معه لبيت اهله وكانك اول مره تشوفين هاالناس لازم طبيعك تكون مثل طبيعهم واكيد لازم تكون في خصوصيه لحياتك انتي وزوجك وولدك في طلعتكم وحياتكم الخاصه كل شي له حدود بس اهم شي خاطر ام زوجك اول شي للاجر ورضاء رب العالمين ودايم توكلي على الله واسفه طولة عليك بالحكي

:9_33:أتمنى لك التوفيق في حياتك اختي نور الدنيا

من تجربتي أنا عايشة في شقة ببيت أهل زوجي ، بس الحمدلله مرتااحة منهم وما اقوللك مافي مشاكل ابدا لان مع الاحتكاك اكيد هناك مواقف لكن الاهم كيف تتصرفين في هذي المواقف ،والحمدلله المشاكل بسيطة خصوصا لان ام زوجي طيبة وااجد وعاملتها برد الجميل لانها ربت وتعبت على زوجي الغالي وأهمشي انك تحسني الظن بها وتسامحي الهفوات البسيطة وتحملي حماتك على سبعين محمل ودائما اخذي كلامها بحسن نية لان مافي ام ماتتمنى سعادة ولدها مع زوجته.:21_86:

كنت قد ماأقدر اخلي زوجي يبرها ويهتم فيها لاني لا أنسى جميلها معي و مع زوجي والبشاشة والكلمة الطيبة والتواضع كلها من جذابات قلوب الناس .

اتمنى افدتك ومعذرة اختي لاني طولت عليكي

مشكورين خواتي عالمرور والردود … إن شاء الله مايصير إله كل خير …

انا صارلي معرسة سنتين و3شهور وعايشة مع اهل زوجي

يعني بملحق خاص بالحوش بس بعد ما آخذ راحتي احيانا

بس الحمدالله مرتاحة ومستعدة اتحمل اي شي عشان الغالي بو خليفة

ونصيحتي لج ,,,

ان اي شي تسوينه سويه عشان خاطر زوجج لان راح يحترمج ويقدرج زيادة