عملت النهارده فراخ محشية وقلت لااااااااازم وحتما ولا بد اوريهالكم
و ادي الطريقة
المقادير
اول حاجه الفراخ:
دجاجه يفضل تكون صغيرة او وسط…بتاعتي كانت وسط واخدت حوالي ساعه وشوية على ماستوت
بصلة مفرومة
طماطم مفرومة
ملح وفلفل
بهارات
رشة قرفة
رشة جنزبيل
رشة توم باودر
عصير لمونة
الدجاجة المفروض تكون مش مفتوحة اوي…يعني انا وصيت طنط الي بتنضفهالي انها ماتفتحهاش اوي عملت فتحه صغيرة وشالت منها الي جواها ونضفتها كويس
ومافتحتهاش من فوق خالص
بنجيب الحاجات دي كلها ونخلطها على بعضها…ونتبل بيها الدجاجه كويس اوي على مانجهز الحشوة
مقادير الحشوة:
كبد وقوانص
كوباية رز…انا عملت كوبايتين عشان يفضل معايا رز لاني بحب طعمه
نغسله وننقعه ف مية
ملح وفلفل
رشة جنزبيل
بصل وتوم
مكعب ماجي
كوبايتين مية
الطريقة
بنفرم البصل
وفي صينية بنحط شوية زيت ونشوح فيها البصل شوية لحد مايبقى لونه اصفر..واضيف التوم
اضيف الكبد والقوانص واقلب شوية لحد مالونها يتغير
اضيف عليها الملح والفلفل والتوابل
اقلبها كويس واضيف المية واسيبها تستوي فيها شوية
الكبده مش بتاخد سوا كتير بس القوانص بتاخد وقت على ماتستوي
كمان لما تغلي ف المية تخلي المية ليها لون فلما تضيفي الرز يلون بسرعه 
انا ضيفت الرز الاول بس الافضل نضيف المية الاول…عشان اللون يبقى اوضح
نضيف الرز الي صفيناه من المية
ونقلبه كويس ونسيبه يستوي نص سوا كدا..او 3/4 سوا
انا بحب الرز طري ومستوي اوي..فعشان كدا بسويه 3/4 سوا قبل ماحشيه عشان لما يتحشي يستوي اوي
وبكدا تبقى الخلطة جاهزة للحشو
نجيب الدجاجه بتاعتنا…ونبدا نحشيها..نحشي طبعا الدجاجه من جوه
ومن عند الاوراك كدا
وبعدين يااما نخيطها او نقفلها بخلة سنان
انا بحب اقفلها بالخلة
هي ماشاء الله ماكانتش محتاجه غير عود واحد بس انا عملتها باتنين عشان ماتفتحش خاااالص
الرز الي اتفضل من الحشوة زودته مية وكملته سوا عادي زي اي رز
واكون مجهزة الصينية الي هحط فيها
انا حبيت اعمل معاها ف الصينية بطاطس…مش الي بالصلصة
قطعت بطاطس وجزر وطماطم وبصل طرنشات…ونقعتهم ف مية بملح
ورصيتهم في الصينية…وحطيت كوبايه مية تقريبا عشان يستوا..وحطيت لهم فيها ملح وفلفل وكمون
وبعدين حطيت الدجاجه ف الكيس الحراري وقفلت عليها وحطيتها على الوش
وكنت مجهزة الفرن سخن من قبلها بفترة
دخلتها الفرن
ولما استوت فتحت الكيس الحراري عشان تتحمر…بس للاسف مامتي كانت جت وكانت مستعجله عشان خارجه تاني
فحمرتها بالشواية وخلاص ههههههههههههه
وادي الطبق الي هقدم فيه…عملت باقي رز الحشوة كنت كملته سوا…فعملته ف طبق وحطيته بالشكل ده..ده طبقي
وادي شكل الدجاجه بعد التحمير..بس اتقطع الجلد مني وانا بقلبها عشان الاستعجال معلش
وادي البطاطس وبقية الحاجات حواليها
بس ماشاء الله كان طعمها جميييييييل اوي بجد يابنات
اتفضلوا معانا
لو الموضوع عجبكم ماتنسوش التقييم
بالهنا والشفا تسلم ايديك يا كيتى شكلها حلو واكيد طعمها كمان
جميله ماشاء الله يا كيتي فتحتي نفسي اعمل فراخ محشيه:21_93: …بس انا بحبها بالفريك هايبقى نفس الطريقه ولا ايه
حلوة قوى وجوعتينى هههههه
تسلم ايدك
شكلها حلو اوي اوي تسلم ايدك
جيت اقيمك منفعش معلشي
والله انا جايبة الاكياس من شهر ولسة ماستخدمتهاش لغاية دلوقتي بس انتي شجعتيني هاعملها باذن الله واقوللك علي النتيجة
تسلم ايداك ياقمر