اللحمة البوفتيك (اللى بتكون محمرة فى الزيت مع الفيجيتار وبتكون مقرمشة )
كل مرة اعملها تطلع فيها مشكلة
مرة الاقيها بتشد وكأنها لحمة كاوتش
ومرة تانية تكش و قطعة اللحمة تبقى صغيرة جدا
ومرة التتبيلة توقع فى الزيت وشكل اللحمة يبقى مش حلو
انا عايزة اعرف ازاى المطعم بيعملها وبتطلع معاه كويسةةةةة
ده غير ان فى لحمة شرائح كمان بتكون بالصوص
يمكن بنات مصر يفهمو قصدى
بس اللى تقدر تساعدنى متترددش وربنا يكرمكم كلكم
بصى يا ستى اولا هاتى لحمة بفتيك بتلو عشان تكون صغيرة و ماتاخدشى وقت فى السوا
و تنقعيها من بالليل فى بصل وتوم و فلفل رومى مفرومين و تتبليها بملح و فلفل و بهارات وجنزبيل و سماء وورق لورى مطحون وشوية خل
و قبل ما تبتدى تقليها بنص ساعة خدى كل قطعة و امسحيها من التتبيلة بتاعتهاوكونى مجهزة نص كباية لبن و تبليه بشوية ملح و فلفل و انقعى اللحمة البفتيك فيه لمدة نص ساعة بعد ما تخلصيه من البصل و التوم المفروم
و بعدين هاتى طبق فيه دقيق و طبق فيه بيض مربوب بالملح و الفلفل ( ماتكتريش الملح) و طبق فيه بقسماط عادى و اخلطى معاه كيس فيجيتار لكن مايبقاش كله فيجيتار
خدى قطعة البفتيك و حطيها فى الدقيق مع الضغط عليها بكف ايدك من الناحيتين و بعدين حطيها فى البيض و بعدين فى البقسماط برضه مع الضغط بكف ايدك جامد عليها من الناحيتين
اقدحى الزيت على نار عالية و بعدين حطى البفتيك ووطى النار و سيبيه يتحمر على مهله ماتستعجليش
ارجو انى اكون افدتك و بالهنا و الشفا
ملحوظة:دقى اللحمة من الناحيتين قبل التتبيلة بالجنب اللى فيه حديدة مشرشرة من مدق اللحمة بس ما تهريهاش فى الدق
السلام عليكم:21_92: