اثار احزاني وجدد ندمي لاني ما رضعت بنتي طبيعي
صحيح ان بنتي بتكمل الخامس خلاص بس للان الموضوع ماثر علي
وكل مرة اتمنى لو عطيتها من عندي
وكل مرة لازم يذكروني اني ما رضعت بنتي طبيعي
يعني مو كفاية الندم والاحساس بالذنب اللي احسه تجاه بنتي
وهم يعني عيالي وامي وحتى صديقاتي كله يلوموني لاني مارضعت فدوكة طبيعي
خاصة اني ربة بيت يعني لا دراسة ولا وظيفة…
علما باني حاولت ارضعها طبيعي بس ما الله كتب
ياريت رضعتها بس ما تنفع ياريت
قووولووو لي شاسوي لبنتي عشان اعوضها واكفر عن ذنبي وياها.
الله يحفظ لش البنوته ان شاء الله وانا حاسه بنفس الشعور اللي انتي تحسينه تجاه بنتش ماباليد حيله 
لاتحطين بقلبج ياعمري الي صار صار وحتى الرضاعه الطبيعيه مابتنفع بنتج الا بأمر الله ولا عيال قبل كانو كلهم يرضعون طبيعي ما مرضو؟
والي يقولون الرضاعه الطبيعيه تخلي الولد يبر بأمه ترى مو شرط ماعمرج سمعتي من الكبار عن ولد عاق ؟
هو صج الرضاعه الطبيعيه أحسن للبيبي صحته تصير حلوه ويصير كتكوت وباذن الله تزيد مناعته لكن تراها مو كل شي الاهتمام والمتابعه والنظافه لهم دور.
لو تفتح عمل الشيطان انسي الي فات وركزي بتربية بنتج واستفيدي من هالتجربه بالمرات اليايه.
بس بصراحة يعتمد على الاسباب.. يعني لو كان بايدك انتي وانتي الي ماعطيتيها فاسمحي لي يا اختي عمرك ماراح تتخلصي من هالشعور..
اما اذا الاسباب مو بيدك فوكلي امرك لله وهو الي بيحفظها.. وعوضيها بحنانك واهتمامك فيها وبصحتها وهذا اهم شي.. لان الي مايرضعوا طبيعي المناعه تقل عندهم..
انا ولدي مايرضع طبيعي بعد بس على كثر مو حاز في نفسي انه انحرم منه وودي اعطيه لكن مو بيدي.. ولا عمري في يوم فكرت بهالاحساس لانه مو بيدي وعارفة ومتأكدة ان مالي دخل بحرمانه منه
الله يعوض عليه وعلى كل الي انحرموا من حليب امهم
الله يعوض علينا انشاء الله
ونرضع طبيعي المرات الجاية
ام فدوكة ! اثرتين مزيج من الحزن و التعاطف بداخلي !
حبيبتي ، كل شي مكتوب لك و لبنتك تأكدي انه لصلاحكم ، و ما في حد مذنب ! بنتك رفضت صدرك مثل باقي الاطفال ، و انتي حاولتي معاها .. سويتي اللي عليك ..
فيه امهات برغبتهم ما يرضعون البيبي بشكل نهائي ! مباشرة من يطلع من البطن يجهزون زجاجة الرضاعة ! حتى ما يعطونه اول رضعة اللي فيها فوايد كبيرة ! و مرتاحين و لا شاغلهم شي ، دام يشوفون البيبي مصحصح و سليم قدامهم ..
و اهم شي انك تعطين لبنتك اكل صحي و تعوضين الرضاعة الطبيعية بالبيبي الثاني !
كل شي له ايجابياته و سلبياته !
انا ارضع ولدي طبيعي و كل يوم اقول ابي افطمه و اتردد ، لان الرضاعة بعد تحمل سلبيات !
اهو انا اقول ما ينفع اني اتحسر واقول لو
بس هالشعور مسيطر علي
انا حاولت وياها اليوم الاول بالمستشفى كنت تعبانة
اليوم الثاني والثالث جابوها لي ورضعتها
اليوم االرابع و الخامس كان صدري متنفخ ويعورني فما رضعتها
مع ان امي كانت تغصبني ارضعها بس من الالم ما قدرت
وبعدين رضعتها طبيعي اسبوع ويوم وبالغصب لانها تعودت ع الصناعي
يعني رضعتها عشرة ايام وما كانت تشرب خلالهم من صدري الا لمن اعطشها
وبعدين لمدة شهر صرت اشفط لها واعطيها اياه بالرضاعة وتالي قطعت
يعني هي ما بغت بس متحسفة اني ما اصريت اكثر
اففففففففففففففففففف
لول
حبيبتي كلامج هدى نفسيتي اشوي
تصوري اليوم كنا في جمعة مع صديقاتي
جان ارضع فدوكة بالمرضعة
جان تقول صديقتي لبنتي يخلف الله عليج من هذه ام
وتقولي جيبيها انا ارضعها طبيعي
وصراحة هي قصدها الخير لانها كاسرة خاطرها بنتي
بس انا انقهرت وايد من كلامها
طولت وهدرت وايد
لا صديقتك تصرفها خطأ ، و ليش ينكسر خاطرها عشان بنتك ؟ الحمدلله ان لها ام متحملة فيها و حنونة عليها !
و لا تتركين لاحد مجال انه يقول لك مثل هالكلام ! اظهري عن غضبك و مشاعرك اذا زعلتي حتى ماتصير لهم جرأة انهم يقولون مثل هالكلام !
احضني بنتك و عاهدي نفسك انك تتركين التفكير و الندم عشان الرضاعة الطبيعية ، و اوعدي بنتك برعياتك و حبك و حنانك لها و راح ترتاحين ..