انصحونى كيف اساعد ابنى على الاستغناء عن الحفاضات

وفي عدة أمور ممكن تستخدمينها :

– كرري على مسامعه إن انت كبرت وعيب تلبس حفاظه
– قارنيه بأطفال في مثل عمره مايلبسون حفاظه
– شجعيه بإنه اذا ترك الحفاظه راح تسوين له كذا وكذا عشان ترغبينه في الموضوع.

إذا تقبل الفكره بعدها ابدأي معاه الخطوات العملية
– اشتري له كيلوتات خاصة بهالموضوع تكون من داخل بلاستيك.
– خليه طول النهار بدون حفاظه بس بالليل لبسيه على الأقل أول اسبوع.
– كل ربع ساعه اخذيه للحمام واصبري عليه وكل ماسوى شي في الحمام
شجعيه ( جهزي له هدايا بسيطه )
– راح تلاحظين انج بتبتدين تعرفين الأوقات اللي يحتاج فيها ولدج انه يروح الحمام
وراح تبدأين تلقائياً تطولين المده بدل كل ربع ساعه الى كل نص ساعه أو ساعه
– راح يبدأ طفلج يطلب الحمام بس بعد ما يسويها على ملابسه ( لاتطفشين ولاتقولين ماراح يتعلم
ومافي فايده لأنه بالعكس بدأ يستوعب وراح يحتاج فترة بسيطة عشان يطلب الحمام قبل مايسويها)

– لما تلاحظين ان ولدج بدأ يطلب الحمام منه ومن نفسه وتكون ملابسه نظيفه ابدأي
شيلي عنه الحفاظه بالليل ولاتخلينه يشرب سوائل بالليل وخليه يروح الحمام قبل
النوم

اتمنى اكون افدتج وهذا من واقع تجربه