السلام عليكم خواتي بنات الامارات فديتكن كلكن،،،،
انا عندي طلب غريب شوي بس مضطرة شو بسوي وخاطري حد يساعدني في هاي المسألة لاني وايد احاتي،،، وما احد غيركن يروم يساعدني،،،الغاليات،،، ان شاء الله على الشهر الياي ناوية اييب مربية حح البيبي اليديد فديته يوم الله بيكتبلي اربي بالسلامه ان شاء الله آآآمين،،، وخاطري في مربية اندونيسية زينه تعرف حج اليهال وحنونه وماينخاف منها،،، عسب يوم بداوم اخلي البيبي عندها بإشراف الوالدة،،، وفي نفس الوقت ابغيها تعرف تطبخ وتنظف يعني عندها خبرة وجد مشتغله من قبل،،، لاني يوم برد البيت من الدوام بجابل البيبي وبخليها هيه تجابل البيت،،، اختي ما شاء الله عليها طلبت بشكارة بنفس المواصفات عن طريق وحدة من الاهل كانت تشتغل عندها قبل ووايد تمدحها والحينه اختي وايد مرتاحه منها،،، خاطري احصل لي وحدة عدله مثل الناس وما اتبهدل وياها،،، البشكارة اللي عندي احينه زينه لكنها وايد ساذجة وهبله وتنسى وايد،،، وكم مرة تنسى الغاز مفتوح على سبيل المثال لين ما اتلاحقه"هذا بس مثال واحد" ومرة كنت راقدة وهي مخلتنه مفتوح بالساعات طول الليل زين ما احترقت،،، حاسه اني لو خليتها بتكون نهايتي على ايدها،،،الصراحة ما فيه اجازف اخليها عندي وودي وايد في بشكارة زينه وتفهم،،، يعني لو وحدة منكن كانت عندها او عند اهلها بشكارة ممتازة وروحت بلادها او تعرف حد يعرف هاالنوعية من البشاكير اللي يكونن زينات في حضانه الاطفال ومجابل البيت والطبيخ والله وايد بكون ممنونه وبدعيلها من كل قلبي،،، والله بنات وايد احاتي السالفة والحينه ياسه اصلى استخارة بس خاطري في وحدة تدليني على بشكارة ممتازة جد روحت بلادها وانا اييبها من هناك عن طريق عنوانها،،، وفي شي ثاني بعد،،، اتمنى لو تكون كبيرة في حدود الثلاثين وعندها عيال عسب تعرف تتعامل ويا اليهال،،، "طرار ويتشرط" بس لانه اللي يون صغار دومهن متوهجات من عمارهن واهتماماتهن تكون في الحركات والطلعات واللبس الله لا يبلينا،،، اختي الثانية كانت عندها مربية في حدود اوائل العشرينات،، ولو انها كانت زينه ويااليهال بس اختي اكتشفت عجبها انها تطلع كل يوم الفجر ويا واحد هندي وعندها موبايل خاشتنه حج ها السوالف لين ما طفشتها،،، عشان جيه خاطري في وحدة في حدود الثلاثين يعني لا بنها صغيرة ولا عودة بس وسط،،،، يعني شبعانه من هاي السوالف،،،
يالله عاد بنات لا تردوني بليز والله ما عندي حد غيركن،،، واللي بتساعدني والله بدعيلها من كل قلبي وكفايه انها تساعد لوجه الله عشان الله يجزيها كل خير ويكون لها الاجر العظيم عند رب العالمين آآمين،،،واتمنى انه ثقتكم فيهن تكون في محلها،،،
يزاكم الله خير
ربي يقومج بالسلامة و تقر عينج بشوفة البيبي
الغالية شوفي…
لإختيار مربية ممتازة للبيبي
أولا… لازم يكون عندها عيال
ثانيا… تختارين الخدامة على اساس انها مربية و بس
ثالثا…لازم تكلمنيها بروحج من المكتب أو الاي حد من المكتب يكلمها انها بتشتغل لبيبي و بس
رابعا..إختاري المكتب الموثوق فيه(لانه اغلبية المكتاب يستغلون حاجة المواطن)
و لا تنسين تكلمينها بالتلفون
و حاليا بالنسبة لي ما احب الأندنوسيات:o:pain:
جربتهم و اكتشف انه فرق كبير بينهم و بين الفلبينيات:o
كله آخذ فلبينيات خبره و كبار بالسن..يعني فوق ال 33 سنة
لأنهم أنظف من اي جنسيات اخرى
و هذي خبرتي مع الخدم:smile:
وانا يايبتنها من مكتب واااايد زين نتعامل وياه تقريبا من 8 سنين وتعامله واااايد اوكي وانتي قوليله المواصفات وهو بيعطيج احسن الخدمات اللي عنده … واذا بغيتي اسمه بطرشه لج مع الرقم …
السموحة الغالية
:shy:
ويموتوا على العلاقات .. وخاصة الهنود 
2
الكثير من الحريم اللي تعاملوا مع هذه النوعية بالذات يعتقدوا أن الأندونيسيات عندهم مشاكل نفسية ويعانوا من عدم الاستقرار
جيبي شغالة عمرها ما أقل من 35 وياريت لو توصل الأربعين بعد .. والأفضل فلبينية .. على الأقل متعلمة ونظيفة .. بس لا تنسي حتى الفبينية تحتاج متابعة خاصـــــــــــــــــــــة وبالذات من ناحية الأطفال
الله يوفقك
بس تشرف عليها يوم بتلعب في الحوي أو يوم أصلي ..وكل شوي أطل عليها ..
وأنا تعاملت مرتيين مع نفس المكتب والخدامتين ممتازات ..الأولى كملت سنتين وراحت .. والثانية عندي من شهر …
اولا اشكر خواتي اللي تفضلن بالنصيحة وانا وياهن انه الفلبينية انظف وزينه ويا اليهال،،، لكن المشكلة ابغيها بعد تطبخ لي لاني اكون في الدوام وما اروم اطبخ وهذا الشي ضروري عندي،،، وفي نقطة ثانية،،، اتخيل الفلبينية اذا بيبها لازم تكون نصرانية لانها معروف عنها انظف عن المسلمة سبحان الله ما ادري ليش مع انه المفروض العكس،،، وإذا كانت كافرة عبارة لازم تلبس بناطلين،،، وانا تبون الصدق ما احب بشكارتي تتلبس بناطلين جدام ريلي او لما تطلع،،، هو عادي عندي بس اشوف الحريم يرمسن عن ها الشي،،، وما اتخيلها كافرة وبتلبس جلابيب،،، ما ادري بنات شو رايكن يستوي امنعها من البناطلين والا لا؟!!!
تبون الصدق يوم قريت آرائكن امتحنت ازيد،،، الفلبينية زينه لكن ما ادري جان بتعرف تطبخ إذا علمتها،،، ما احد يقولي لازم بس تكون مربية،،، لاني بحتاجها تطبخ بعد وإلا شو خانتها يوم انا برد البيت وبجابل بنتي،،، الصراحة ما بتفيج ايلس اطبخ وبنتي عندي،،،، اتخيل ما بيكون صعب عليها انها تطبخ لاني سمعت عن فلبينيات يشتغلن طباخات شرا اللي عند اهل ريل اختي،،، وممتازات بعد في الطبخ ويتفنن بعد في الاكل،،،،
وزيادة على جيه بنات ما خبرتوني جان تعرفون بشكارة ممتازة عسب ايبها من بلادها،،، يعني هذا هو كان طلبي الاساسي،،، يالله عاد شدوا حيلكن،، اسألوا منيه مناك عل وعسى تحصلولي وحدة زينه،،،
ومشكورين مرة ثانية،،،
هلا الغالية أوركيد
حبيبتي المربية غير عن الطباخة
كيف بتطبخ الصبح و أنتي في الدوام؟؟
و البيبي بسم الله عليها ..منو بيكون وياها؟؟:rolleyes:
أنا جربت مره إني اعتمد على خدامة وحده بالبيت
بس بصراحة..تلعوزت على الرغم اني ما اشتغل:o
ابدا ما قدرت..:o
فإضطريت اييب طباخة هندية خاصة فقط
للمطبخ و الطبيخ و حق الحوي فقط:cool2:
و الحمدلله ما مشت اموري زين إلا لما يبت وحده للمطبخ
و الثانية لللبيت و مساعدتي بشؤون الصغار
بي تدرين عااد أكيد أنتي ظروفج غير عن ظروفي:smile:
و الله يوفقج بخدامة تشل البيت على راسها 🙂
 |
اقتباس |  |
 |
| كاتب الرسالة الأصلية : فوانيس هلا الغالية (u)أوركيد:shy: ربي يقومج بالسلامة و تقر عينج بشوفة البيبي الغالية شوفي… و لا تنسين تكلمينها بالتلفون و حاليا بالنسبة لي ما احب الأندنوسيات:o:pain: و هذي خبرتي مع الخدم:smile: |
||
 |
 |
ومــا اقـدر أزيـد عـلـيه,,,لأن كـل كلـمــة مـنــه صـحـــيــحـة
والله يـقــومـج ان شـاءالله بالسـلامـــة
انا عن نفسي ابد ا الفلبينية ما مشت معاي كله اندنوسيات وبصراحة ما اييبهم من مكتب اييبهم من حرمة تييب خدامات وكله اجيب جدد ما اشتغلن الا في ماليزيا وسنغافورة يعني دول الخليج والدول العربية مستحيل لأنه اللى عندها خبرة من النادر تحصلينها زينه واذا زينه راح اتمشيج على طريقة مخدومتها السابقة وطبعا اهم شي تكون كبيرة في السن 35 أو 38 سنه ..
اتوكلي على الله والحمد الله الخدامة راح تكون مع امج ومب بروحها يعني على الارجح البيبي ما عليه خوف بأذن الله
العتب