بسم الله الرحمن الرحيم
السلام عليكم ورحمة الله وبركاته ,,
كيف حالكم حبايبي عساكم بخير إن شاء الله ,,
ويلا نبتدي بعون الله …
حياكم …,,,
ميز التواليت أحنا البنات ماشاء الله علينا يوم رازين العطور على الشمال
ويوم رازين المكياج على اليسار وكل وحده ما شاء الله لها ذوقها
ولكن دائما ننتظر الجديد بالتنظيم …
هذي الصوره لترتيب العطور بالشكل القديم
وبصراحه فيها حوسه …
خصتا ان وقت تنظيفك لطاولة التواليت او البعض يسميه التسريحه جدا
بتكون صعبه انك توخرين كل هالعطور وبياخذ منك وقت ..
طيب بالنسبه لي شوفوا ايش سويت
اخترت مجموعه من العطور الي حاليا استخدمها والباقي حطيتهم بالدرج
ومجموعه ثانيه لزوجي
يعني يكفي كل واحد ثلاث عطور وممكن تزيدينهم مثلا عطورات عربيه تبع التولات
الي تجي اشكالها صغيره وحلوه ومرصوص بالكرستال ..
على حسب العطورات الي عندك ..
كان عندي صحن حاطته على طاولة القاعه راصه فيه شموع بأشكال خشبيه
زهقت من هالتنظيم والديكور فشلت الصحون
وبصراحه الصحن مهو جاي مع الشموع يعني انا اخترته بس للديكور
خذيت الصحن وحطيته على ميز التواليت
ورصيت عليه عطوراتنا وشكلها مره مره روعه
اخترت صورتين تقدرون تستفيدون من الصحون الحلوه الي عندكم
لتغير الديكور …
شوفوا الصور
مثلا هالصوره تقدرين تحطين عليها ريش بشكل افقي او انك
تغطينها بشكل كامل على حسب ذوقك
وهذي النوعيه من الصحون حلوه وانيقه انك تستخدمينها لرص العطور …
او صينيات من الفضه ان بقت فيها مساحه بعد ما نظمتي عطورك حطي بينهم
البخور الي تستخدمينه بغرفتك وهكذا نظمتي ورتبتي وريحتي نفسك وقت التنظيم
توخرين الصحن وتنظفين الطاوله وترجعين كل شي مكانه …
بالنسبه للميك آب ..
ما احبذ فكرة انك تحطين اغراضك كلها على التسريحه
كل ما تكون المساحه متروكه باينه وما فيها اغراض متراكمه
كل ما تحسين ان الغرفه مريحه ومرتبه …
خصصي درج او شنطه خاصه للمكياج ..
ونفس الوقت خصصي شنطه صغيره فيها مثل كحل وبلاشر وقلوس
هذي الشنطه خليها تحت تصرفك هذي الي تحتاجينه بشكل يومي للبيت
بشكل سريع …
ونصيحه مني يا متزوجات …
كل وحده تجي توعد نفسها تقول من اليوم ورايح بتكشخ لزوجي وبراويه فنون المكياج
وهات يا لطخ ههههه
شدو كحل سائل كريم اساس فوقه بودره ولمعه ومحدد وحمره وقلوس عشان الشفايف تلمع لمع وغيره واخر شي البلاشر حشىىى صدقيني كلها ايام وبتملين من هالحاله
وآخرتها بتملين من هالروتين المتعب 10 او 15 دقيقه وانتي تتزينين وكل وحده عندها الي شاغلها
يعني بالاخير بتملين وتتركين التزين وابو الشباب تمر عليه ايام واسابيع ما شاف من زينك
على الاقل هالشنطه الصغيره بتسوي اللازم بخلال دقيقه او دقيقتين كفايه
على الاقل يدخل عليك وانتي مورده وعيونك مكحلته بالقلم بدل السائل
والشفايف ما شاء الله …
خليك بسيطه تدخلين قلب زوجك ببساطتك واناقتك واسلوبك البسيط
وخلي الشدو وغيره من المكياج الثقيل ليوم واحد على الاقل بالاسبوع
عشان تطلعين بعيونه لوك جديد ويحس بالتغير ..
كاني دخلت عرض بالموضوع …
عموما نرجع لميز التواليت أيـــــــــــــــوه
بالنسبه للكريمات ما يحتاج تظهرينها برضوا خصصي درج
ما احبذ فكرة سله بها كل كريماتك وشغلاتك والبكل و الجيل والزيت ومدري وشو ..
خصصي درج لهم وفكي نفسك من تنظيفهم من الغبره
دائما بسطي الأمور لنفسك أفضل من قضاء وقت اطول بالترتيب ..
خليه بس فازه للأشياء المهمه
مثلا للمفاتيح
او للاغراض الي يطلعهم زوجك من جيبه وقت رجوعه للعمل
مثل هالصوره …
طيب بالنسبه للطاوله كيف تزينيها او كيف تحافظين على منظرها مثل ما شريتيها
كثير جتني رسايل من الأخوات تقول طاولتي انكب عليها استون او مدري وشو
وتغير لونه …
اول شي ان كنتي بتتزوجين قريب وبتفصلين لك طقم غرفة نوم
اشرطي على النجار انه يحط لك قطعه زجاج بمقاس ميز التواليت وعلى الكومدينات
هذي احلى واحلى طريقه انا سويتها وكل ما اشيل الزجاج اشوف الطاوله كأنها جديده
لا خدوش ولا بقع ولا شي
وتنظيفه ولا اسهل بختين من منظف الزجاج وكل شي يلمع عندك
بس برضوا زينتها …
شفتوا هالمفارش لطاولات الطعام ..
لما رحت شريت مفارش لطاولة الطعام جتني الفكره ليه ما استغل هالمفارش لغرفة النوم
مثلا شوفوا القطعه الي تجي بشكل مستطيل على طول الطاوله
وبنهايتها بشكل مثل المثلث فيها كركوشه
حطيتها على ميز التواليت ..
اما الطقم الباقي الي يجي مربع لتحت الصحون حطيتها على الكومدين وفوقها الابجوره
والله شكل الغرفه تطلع هاديه ونظيفه ومرتبه …
:::::::::::::::::::::
نصايحي لبعض الاخوات الي ساكنين ببيت إيجار ..
أول شي أدعي الله ان الله يرزقكم ببيت الملك وترتاحون عن قريب ..
لما الوحده تسكن ببيت إيجار
أكيد التصميم ما يجي على ذوقها …
واهم حاجه للحرمه عندها المطبخ …
مثلا الدواليب مو عاجبها او اللون مو رايق لها
والحمام كرمكم الله نفس الشي مهو منسق ومرتب
قبل ما اعطيك النصايح الي عندي
حابه اقول لك ان بلااااااش تصرفين على بيت مهو بيتك
وتصدعين الرجال بطلباتك
وفري للبيت الملك ان شاء الله وبدون التوفير الواحد ما يقدر
يوفر الشي الي يبيه …
كل ما حبيتي تغيرين شي بالبيت تذكري ان انتي منتي
مستقره بهذا البيت الى الابد
لمجرد تنظيمك الممتاز ببعض الامور ونظافة البيت بشكل عام
راح توفرين الحياه المريحه لأسرتك
لعل بعض الاشياء ممكن تغيرينها بشكل بسيط
مثلا عندك دواليب المطبخ
ممكن تجلدينهم بجلاده لاصقه واحيانا هالجلادات تجي بأشكال
والوان الخشب منها الغامق او الفاتح او جلادات اللون الواحد مثل هالصوره
ومن لون دواليبك اختاري بعدها اكسسواراتك الحلوه البسيطه
زيني مطبخك وان شاء الله راح تحسينه تغير بنظرك ويفتح النفس …
على فكره , فكرة التجليد جدا ممتازه يسهل امور مسح الطاولات والدواليب بشكل سريع …
أما الحمام كرمكم الله
ممكن تضيفين سجاده بوسط الحمام ان كان نوع حمامك افرنجي
وتطقمين ادوات الحمام والستائر
بلون واحد او بتشكيله وحده بثي ابداعك بكل زاويه بالبيت وغيري
الديكور بشكل مرتب وحلو وناعم
وبالاخير اهم شي انك تحافظين على اسرتك انها دائما تكون مرتاحه
ومتوفر لها الاهم والاولويات الاساسيه هذا اهم شي لكل بيت …
:::::::::::::::::::::::::::::
خلصنا من الديكورات والترتيب ..
::::::::::::::::::::::::::::::::
جه موسم البطيخ …
يا حبي للبطيخ …
بعلمكم كيف تبردون البطيخ بدون ما تحطونه بالثلاجه
مثلا وقت ما نروح الاستراحه
دائما اسوي هالطريقه
الشمس حاره والعيال يبون ياكلون البطيخ بالبحرين نقول له جح
وحلاته وهو بارد صح ؟
طيب الي اسويه عشان ما اطول عليكم …
اجيب سكينه حاده اشيل بس القشره الخضره
انبه الجميع بس الخضره يعني لا تتعمقين
وبعد ما اخلص احطها بالشمس لمدة خمس دقايق او سبع دقايق
وبعدها ما اقصها والله بارده كأنك من امس مدخلتها الثلاجه …
جربي حتى بالبيت لو ما عندك وقت ووصل بطيخك متأخر وقت الغدااااء
وتبين تقدمينه بسرعه هذي طريقه سهله
وعلى فكره مو شرط تقشرينها كلها يعني مكان ايوه ومكان لا ….
::::::::::::::::::
سر من اسرار النشاط الي اداوم عليها بشكل يومي
خصتا بفترة الصباح اول ما اقعد من النوم …
والحمدلله عمري ما قلت لأحد إلا استفاد وحس بالنشاط وراح عنه الخمول
خواتي انا اول ما اقعد من النوم
يوم أكل سبع تمرات ورااااء بعض وبعدها اتقهوى
ويوم اكل 21 حبه من الكشمش ( الزبيب ) الي ما فيه بذر
والله يا خواتي ان ما كنت احس بالخمول ودائما احس بالنشاط ..
:::::::::::::::::::::::::
لما تغيرين الكيس الزباله كرمكم الله بالمطبخ
اكيد تلاحظون احيانا سوائل نازله من الكيس
او ممكن ان الكيس انشق من تحت
احسن طريقه انك تربطيه الكيس من تحت قبل ما تركبينه بالسله
هذي افضل طريقه انك تحافظين على الكيس ان ما ينشق حتى وقت
ما احد يبي يطلعه لبرااا البيت …ومنها كمان ان ما ينقط بالسله وكل مره تمسحين وتتعبين …
::::::::::::::::::::::::::::
تم ولله الحمد اضافة خبراتي رقم 11
وفقنا الله وإياكم …
تــــــــــــــرانيم
راااائعــة دووومــا بمواضييعك …
كثييير استفـــدت من الموضـــوع…
مشكوووورة الغاليـة….
عسى ربي يوفقج دنيا وآخرة.. ويهنيج بحياتج
الصراحة كلش عجيب كلامج وخبراتج وايد فن!
بس خيو..
شلون نخلي الجحة بالشمس وتبرد؟!
ولا أنا يمكن ما فهمت؟؟
ما شاء الله عليك و لا اروع
و فعلا ما السر في برودة الجحة و هي بدون قشرتها في الشمس ؟؟؟؟؟؟؟؟؟
 |
اقتباس |  |
 |
المشاركة الأساسية كتبها بنت الاصايل  |
 |
 |
| يا سلام عليج.. عسى ربي يوفقج دنيا وآخرة.. ويهنيج بحياتج الصراحة كلش عجيب كلامج وخبراتج وايد فن! بس خيو.. |
||
 |
 |
اي والله انه بعد ما فهمت شلون
يعني اقشر اللون الاخضر وتصير باردة عقب جم دقيقة
شلون؟؟؟؟؟؟؟
|
اقتباس | |
|
المشاركة الأساسية كتبها عروس جنان |
|
|
| مـا شــاء الله عليكي أختي ترانيـــم راااائعــة دووومــا بمواضييعك … كثييير استفـــدت من الموضـــوع… |
||
|
|
يا بعد عمري
نورتي الموضوع بطلتك
والحمدلله ان الموضوع كان على ذوقك
ربي يوفقج ويسعدج ..
|
اقتباس | |
|
المشاركة الأساسية كتبها بنت الاصايل |
|
|
| يا سلام عليج.. عسى ربي يوفقج دنيا وآخرة.. ويهنيج بحياتج الصراحة كلش عجيب كلامج وخبراتج وايد فن! بس خيو.. |
||
|
|
يا حبي لك يا قلبووو
شخبارك يا حلوه عساك طيبه ..
الله يوفق الجميع ان شاء الله
يا محلى دعوتك الله يهنيك ويسعدك
شوفوا يا قلبي بالنسبه لسر وضع البطيخ بالشمس
الكلام الي فهمتيه صح
روحي حطي يدك على الثلاجه من براااا
راح تلاقين الثلاجه حاره صح ؟
طيب كيف الثلاجه حاره من برا
ومن داخل بارده هههههه
يعني القشره ما فيها مسامات مثل باقي انواع الفواكه
ولما تشيلينها وتحطينها بمكان حار مثل الشمس بس لا تطولين حدك خمس الى سبع دقائق
راح تطلع كل الحراره المخزونه من البطيخه
وبما ان فيها سوائل بشكل كبير والياف راح تكتسب البروده لمجرد انها تطلع كل الحراره
تعلمت الحركه هذي لما كنت اقرأ بكتاب علمي يخص الحراره واكتساب البروده من الحراره
أما التطبيق انا الي طلعته هههههه وجربت بالبطيخه والحمدلله الكل تعلمها مني
وجه الدور اني اعلمكم بالطريقه …
وان شاء الله تستفيدون منها لوقت الحاجه خصتا ليلي ثلاجتها صغيره …
نورتي الموضوع يا قمر
الله يوفقج ويسعدك ..
راااائعــة دووومــا بمواضييعك