مشتاقة لكم وااايد واااايد ومن بعد غيبة طويلة عن قسمي الحبيب قررت
ارجع لكم بموضوع جديد وفكرته جديدة
وإن شاء الله ينال إعجابكم
راح اتكلم لكم عن منتجات فلومار اللي عمري ما خذيت منهم شي وتندمت عليه
واللي حابه أقوله إن هالمنتجات بأختصار أسعارها حلوة وتناسب الكل وفوق هذا جودتها عالية
وروعة بحقها قليلة لاني بأختصار أعشق هالماركة
ومن أخذ منهم شي اخذه
وبالي مرتاح ما اقول لا راح يطلع مو اوكي ولا يخرب لي بشرتي او غيره
وأعذرووني طولت عليكم ويلا شوفوا شرحي على كل منتج جربته بالصور
مناكير فلومار بأختصار حلوة ثاابته وفيها لمعه حلوة حتى اللي لونهم ما فيه جليتر
واللي عجبني فيهم ما يتقشروون ابداً رغم اني جربتهم بأوقات دراسه وخبركم جامعة وسواقة
وغيره المناكير غصبا عنه يتقشر لكن اللي عجبني فيه انه ظل ثاابت طول الوقت وفوق هذا
يجف بسرعة لان انا عذابي لما احط مناكير اظل ميبسه يديني كأني صنم ما اتحرك
ما
اسوي أي شي بعد مع هالمناكير الحلوة بعد دقايق اقدر احرك يدي بكل حرية
بالنسبة للشدو تبع الفلومار ممتاز قليلة بحقة ثبات لون قوي وفوق هذا درجات الوانهم تجنن
يوم اروح اشتري لي منهم شدو اتخبل على الألوان لو على بدي اشتريهم كامل وحاطة ببالي
اشتري منهم علبة شدو متكاملة الالوان لان يعجبني ثبات شدواتهم يعني متخيلين لما اطلع
من البيت لحد ما ارجع لونهم باقي مثل ما هم وحتى لو يخف يخف بنسبة بسيطة وغير
ملحوظة وهذا اكثر شي عجبني فيهم
بالنسبة للفاونديشن حلو ويعطيج تغطية طبيعية وينفع لكل الأوقات وفوق هذا سعره احلى
وانصحكم فيه يا بنات جربوه وما راح تندمون
ملاحظة:
لكن من خلال موضوعي أتمنى أنوه على شغلة محد حاس لها يا بنات الفاونديشن ما ينفع للطلعات كل يوم لا تقولون ماركة ولا طبيعي وغيره ليش عيل الفاونديشن يعطي تغطية اقوى من البودرة لان يا بنات يسد المسام وانتو لما تطلعون لجامعة ولا دوام ولا غير نطلع وقت طويل برى البيت والفاونديشن فوق يظل كابس على البشرة وانا قدامي شفت بشرة بنت خالتي راحة نضارتها واختربت كله بسبب الفاونديشن رغم ان بشرتها كانت ممتازة رغم انها اصغر مني المفروض بشرتها تكون احسن مني لانها بعدها صغيرة بس الفاونديشن خرب لها بشرتها.
بالنسبة لكحل فلومار حلو واختي جربت منهم اللون الاسود وانا احيانا من شقاوتي اسرقه منها لان سواده رووعة وفوق هذا ما يسيح كثر الاكحال الثانية وفوق هذا فيه منه الوان ودرجات ثانية مثل الأزرق والبني وغيرها من الوان حلوة وايد
بنت خالتي جربت منهم المسكرا اللي لونها ازرق لكن مسكرتها كانت ( water proof)بما معناه ضد الماء وانا يوم جربتها سودها حلو وتكثف لرموش لكن انا حسيتها شوي ضايقتني لان مو متعودة احط على رموشي مسكرا وتر بروف فبديت احس اني ابي افرك عيني بقوة لكن بنت خالتي مدحتها لي كثير وقالت انها احسن مسكرا جربتها بحياتها وانا ناوية بس مسكرتي تخلص اخذ منهم مسكرا مو ضد الماء لان جد عجبني سوادها وتكثيفها للرموش
وبس يا عرايس الموضوع خلص وللأسف للحين ما جربت بودرتهم ولا بلشراتهم وبس
اجربهم بأذن الله راح انزل لكم موضوع بخصوصهم رغم اني متأكدة انهم رووعة لان منتجات
فلومار فظيعه
أتمنى الموضوع نال أعجابكم
واللي عجبها موضوعي تدعي لي بالتوفيق بدراستي
وإذا شافت إني أستحق التقييم تقيمني
مـــع حـــبـي
مـشتاقة ليـكـ
ولك الف شكر
منورين حبيباتي الموضوع
واسعدني تواجدكم في الصفحة
قمت أحب الماركات الإقتصاديه لأن نحن ما نشبع من الميك أب و دايما نجرب اليديد .. وبخصوص الفاونديشن كلامج 1000000% صح
لازم نعطي فرصه للبشره تتنفس و نهتم بها من ناحيه التغذيه و الترطيب عشان تبين حلوه ب ميك أب أو من غيره …
تسلمييين الغلا عالموضوع الحلوووو
ما قصرتي الغلا
حاولت اقيمج لكن للأسف ما قدرت
هذيلا مني لج
