كل بنت منا لما تتخيل نفسها في يوم عرسها .. تشوف نفسها بفستان ابيض .. على كوشه حلوة
وبما اني عروس يديده .. حبيت اني انقل لكم تجربتي مع الكوش ..
في شو غلطت .. و في شو نجحت .. وشو تعلمت .. 😉
ياليت محد يسألني وين احسن مكان .. لأنه الكوشة تعتمد عالفكرة الأساسية وعلى النقاط المهمة اللي لازم تنبهين فيها المصمم اللي بيسويلج الكوشة ..
ما بطول عليكم .. 
أولا ..
لا تروحين وانتي ماعندج فكرة شو تبين .. سوي بحث و شوفي وايد اشكال وافهمي انتي شو الشعور اللي تبينه .. شي رومانسي؟ تاريخي؟ كلاسيكي؟ او ثيم معين حابه انج تسوينه في يوم العرس كامل… ؟
واذا لقيتي شي معين حابتنه اطبعيه وخذيه معاج وقولي للمصمم ابا شي قريب لهالشكل .. (y)
ثانيا ..
الاسعار ارتفعت وايد .. وانا ما اتكلم عن دبل الاسعار لا.. قولي ثلاث او اربع اضعاف السعر مال 3 سنين فاتو ..
فلازم تعرفين شي مهم .. الورد (f)(f) احلى شي فالعرس .. والورد غالي جدا و تقريبا هو اللي يرفع سعر الكوشه عشرات الالاف ..
فاستخدميه صح .. بمعنى .. الناس يوم بتحضر عرسج بتدقق على الطاولات .. بس الكوشة بعيده و اللي بيبين منها الشكل العام .. 😉
فكوني ذكية و خلي الورد على الطاولات بشكل رئيسي ..
أما فالكوشة .. فحطي الورد بالأماكن اللي بتبيّـن .. وركزي عالورد اللي حجمه كبير .. ولو الديزاين اللي اخترتيه مافيه ورد بعد حلو .. 😎
ثالثا ..
الاضاءة (i) .. من خبرتي فالكوش .. اكتشفت انه الاضاءة تلعب اكبر دور فجمال الكوشة .. والاضاءة نوعين .. نوع يتعلق فالسقف و هو الأغلى و نوع يتثبت عالارض في اماكن محدده بيقررها خبير الاضاءة ..
وعن خبرة .. الاضاءة اللي على الارض هي اللي بتنفع .. اللي فالسقف ما بتنفعج وايد بس بتزيد عليج 30 الف عالاقل .. (n)
رابعا …
تذكري انه اغلب الصور بتكون لج وانتي على الكرسي .. الديزاين لهالكرسي يرجعلج وما يأثر وايد .. حاولي تختارين كرسي طويل شوي علشان الصور تطلع احلى و يكونون حذالج صديقاتج و خواتج واللي تحبينهم ..
وركزي وايد على خلفية الكرسي .. لأنه الصور كلها بتبين خلفية الكرسي فنبهي المصمم انج تبين شي حلو يطلع فالباكجراوند مال الكرسي لا يخليلج اياه خالي .. (n)
ولا تنسين انه الكرسي لازم يكون ملون .. علشان انتي فستانج ابيض فلو كان الكرسي ابيض الصور ما بتطلع حلوة .. أي لون يتناسب مع كوشتج بس مب ابيض… (f)
خامسا و اخيرا ..
الموضة الحين الحجم و الاضاءة .. يعني الموضوع يعتمد على القاعه وحجمها .. ممكن كوشة بسيطة بس لازم تكون كبيرة بالحجم و بسيطة بالاكسسوار و تعتمد عالاضاءة…
استخدمي الستاير مع انعكاس الاضاءة عليهم .. ومافي مانع يكون سلاسل الكرستال متداخله مع الستاير على اساس انها بتلمع مع الاضاءة وبتعطي شعور حلو فالقاعه .. بس لا تستخدمون هالاشياء اللي مصنوعه من الفلين ومصبوغه بالذهبي لأنها مال اول ودفاشه عالفاضي
اتمنالكم التوفيق .. وانا كالعادة حاضرة حق أي سؤال … 😉
يعطيكِ العافية أختي
عاد تصدقين في الكم يوم الجايه بروح احجز الكوشة
جزاك الله خير ع الموضوع
تقبلي مروري
Gumus
Leena
دلولة البحرين
سجى الايام
مشكورين عالمرور و بالتوفيق لكم خواتي ..
ربي ييسر لك كل امورك
أختك
عروسة