مرحبا يابنات منتدى عروس
من فتره نزلت لكم موضوع عن نظام د / حسين دشتي وقلت لكم اني جربته مع الاهل عندي واني قدرت انزل من وزني وصار ان تسكر موضوعي بس بصراحه استمريت على النظام وبعدين وقفت عنه وبصراحه مالاحظت اي شي على ولاعلى اهلى بالعكس نزل وزني وترتب جسمي بعد وعشان جذي رديت اسويه مره ثانيه بس بالمره الثانيه وكانت تقريبا من شهر ونص او شهرين حسيت باعراض غريبه صارت معاي وعشان جذي نزلت هالموضوع عشان احذركم من هالنظام.
انا بديت النظام مع صديقتي باول الايام حسيت بصداع قوي ولا كان ينفع معاه ولا مسكن.. لابندول ولا بروفين والمشكله اني ماكنت انام من شدة الصداع وقوته وهذا اثر على بالدوام ولا كان لي نفس للشغل وكنت احس بالتعب وبالاجهاد بشكل كبير مع اني قبل لاابدي هالنظام كنت طبيعيه وعاديه ..هذي من نايحه…
من ناحيه ثانيه اثر هذا النظام على هرمونات جسمي بشكل كبير وهذا خوفني بصراحه بقولكم شلون..
الله يعزكم الدوره عندي منتظمه ومرات اتجي قبل موعدها بكم يوم وهذا شي طبيعي …بس الشي مو طبيعي انها تجيني بالشهر مرتين!!يعني جاتي باول الشهر وبعدها باسبوعين اول اقل جاتني مره ثانيه ونزلت على بغزاره واستمرت معاي تقريبا 10 ايام وهذا سبب لى الصداع اللي قلت لكم عنه بالبدايه لان انا اصلا فيني انيميا ( فقر دم ) .
طبعا انا ما وقفت النظام وبعدين قلت اكيد انا فيني شي بس مو منه لكن لما سئلت صديقتي شصار معاها قالت لى نفس الاعراض اللي صارت معاي وخصوصا صادف ان جاتها الدوره معاي باول الشهر اللهم وحده نظفت قبل الثانيه بيوم واحد . يعني نظفنا تقريبا بيوم 6 و 7 مارس وفي يوم 17 نزلت مره ثانيه على انا اول وبعدها بيومين نزلت على صديقتي!!!
اهني بدينا ندور بانفسنا عن السبب وخصوصا احنا ماغيرنا شي ولا اكلنا شي غريب بس اللهم اتبعنا النظام مع بعض؟؟وهذا سبب لنا تغير بالهرومونات ونزل لنا الدوره مرتين بالشهر..
ومره من المرات وانا اتصفح المنتديات لفت انتباهي عنوان عندهم وصاحبة الموضوع تقول صارت ابحاث ( بصراحه ماثبت وين باي دوله بس اذكر انها دوله اوربيه ولا احتمال بامريكا) المهم صارت هالدراسه وتوصلوا لنتائج مخيفه وهي ان هذا الريجيم له تأثير على المستوى البعيد يعني بعد كم شهر من نسويه ونمشي عليه ومن هالنتائج:
في حالات وفاه كثيره من بين اللي مشوا على هالنظام وفي حالات جاتهم امراض خطيره ومزمنه ..
عشان جذي والله ثم والله انا بصراحه تحسفت اني نزلت لكم الموضوع الاول ولاني مدحته لكم وقلت لكم انه عجيب وخطير بس بصراحه ماكنت ادري عنه جذي.. ولما الاخت الينا قالت لي عنه ضار بالصحه ولما سكرت الموضوع بصراحه وعذرا للاخت الينا بصراحه زعلت وقلت ليش تسكره بس الحين انا والله مستانسه انها سكرته لى على الاقل ارتحت ان مافي احد طبق النظام.. بس بعد فتره صرت الاحظ وجود هالنظام بعناوين مختلفه..
يابنات بقولكم شي وانتوا والله مثل خواتي واحبكم كلكم
شالفايده نمشي على هالنظام ونتعب نفسنا وبالاخير نخسر صحتنا وحياتنا؟؟؟ احنا صج ودنا نضعف بس الضعف يبيله اراده قويه وبنفس الوقت نظام صحي فيه كل العناصر ومع اشويه رياضه..
هدفنا الاساسي تكون اجسامنا حلوه مو شرط نكون مثل عارضات الازياء يعني ودنا نلبس وتكون الملابس متناسقه ومناسبتنا بس الاهم من هذي كله نكون بصحتنا مو بعيد الشر واحنا تعبانين ونحس كانه شايلين الدنيا فوق راسنا ولا نحس كبرنا بالعمر 10 سنوات جدام..
يابنات نصيحه مني لاتتبعون هالنظام و لاتخسرون حياتكم عشان جم كيلو ولا عشان مناسبه عرس ولا حفله تخرج ولا عشان فستان ولا بدله..واصلا شالفايده تضعفون ويكون هذا على حساب حياتكم وصحتكم؟؟؟واذا كنتوا تبون تضعفون احس شي تقللون الاكل مع الرياضه والمشي اسهل رياضه والاهم من كل هذي الاراده والاستمرار ..او تتبعون نظام مدروس من المستشفى يكون خاص على حسب كل حاله وكل جسم.
وفي النهاية حبيت اشكر الاخت الغاليه والمشرفه المحترمه الينا بصراحه لها الفضل بعد الله اني عرفت اضرار هذا النظام وعرفت مصايبه وبصراحه لها مجهود ملاحظ بالقسم ف لج مني الف شكر عني وعن بنات المنتدى والله يوفقج يارب ويعطيج على قد نيتج..
اسمحولي يابنات ادري ثقلت وطولت عليكم بس كنت بقولكم عن تجربتي مع هذا النظام الفاشل..
تحياتي لكم
اختكم / نوارة قطر
فاكره موضوعك وإني كتبت لكم عن أضراره ومخاطره وأوردت الكلام من كتاب الريجيم السريع للألفيه الثالثه
أنا مثل حالتك ذهلت يوم قريت الكلام .. بس ماجربت اسوي أنا مصابه بالسمنه وضروري أنزل حوالي 45 إلى 50 كيلو .. بالإضافه إلى ضعط الدم المرتفع .. اللي هو خطر على بنت في عمري .. بس مافكرت أبد أسوي شي
مثل هالريجيم ..
ما أحب اطول عليك بس أشكر فيك شجاعتك إنك كتبتي شي وتراجعت عنه الله يجزاك ألف خير ..
إنشاء الله راح ننزل بدون أمراض وسلامتكم
انا عندي وزن زايد مو سمنه وكنت ابى انزل بس الوزن الزايد
اتبعت هالنظام مدة اسبوعين ونزل وزن وصار شكل جسمى احلى
وكنت ناويه اكمل الشهر على هالنظام
بس
بما انى دارسه مقررات في التغذيه وعارفه اهميه الكربوهيدرات وبالذات السكر (الجلوكوز)
كغذاء الجهاز العصبى ( يعني المخ ما يقدر يستخدم الا الجلوكوز كمصدر للطاقه)
فقررت التوقف عن هالرجيم
و احب احييج على جراءتج و انصح البنات باتباع رجيم تتوازن فيه كل العناصر الغذائيه
اختي الغالية نوارة قطر
جزاك الله كل خير وبارك الله فيك
من طيب أصلك وأخلاقك إنك تهتمي بأخواتك وتخافي على صحتهم
إن شاء الله كلهم يعرفوا اضرار هذه الانواع من الريجيم ويبطلوا يعملوها
ربي يبعد الشر عن جميع المسلمين
غاليتي نوارة قطر
اشكرك على تنبيهك لاخواتنا وادعو الله ان يجعل هذا في موازين حسناتك
لك مني احلى تحية
لما ننصحكم ونوعضكم مانرتجي غير شي واحد
إنكم تكونون بصحة وعافيه
وإنكم تعرفون الصح من الخطأ
الكتب مليانه والجرايد مليانه والمنتديات مليانه
وكل وحده تدلي عليك بمعلومه مجهولة المصدر
وللأسف على طول نصدق حتى ولو كان الثمن حياتنا
إنتي نوارة قطر نجيتي والحمد لله وبفضل الرحمن من خطر كان يمكن يتسبب
في شئ يضرك ويضر صحتك
وماأدري ليه الأغلبيه إذا شافت موضوعها أنحذف على طول أرسلت رسالة
لا أحد يتحمل قرائة عباراتها وعصبت
حتى كلمة شكر للجهود بالنادر ماتصدر
صدقوني أنا والأخت لينا ما نسعى سوى لغرض واحد
مستقبل لك ولأسرتك بعافيه إنشاء الله
وبعيدا عن هذه الأدعائات الكاذبة
والله من وراء القصد
تحيتي لكم جميعا
عذبة الأحساس ..
هلا والله فيكم خواتي كلكم سواء اللي ردوا على موضوعي ولا اللي اكتفوا بالقراءه
البدايه اسمحولي على التاخير بالرد لاني سافرت ثاني يوم من نزلت الموضوع ولارجعت الا امس (رحت مكه والحمدلله اعتمرت ) اتمنى انكم مازعلتوا من تاخيري بالرد ..
************************************************** ********************
غاليتي برا الطابور
اول شي حبيت اقولج ترا اسمج حلو وعجبني _ اول ماقريته قلت ياربي منو برا الطابور وليش ههههههه وبعدين استوعبت النك نيم_
انا اللي خلاني ارد واكتب والله خوفي من رب العالمين لاني راح انسئل عن كل حرف كتبته والمشكله اني كنت اقسم لكم باول موضوع اني ماراح اضركم بشي وهذا اللي دفعني اني انبهكم عليه باخطار النظام.واذا حبيتي تسوين ريجيم ولا تنزلين من وزنج اتبعي نظام صحي وخلي النزول يكون بطئ وبراحه احسن عشان ماتردين تزيدين ضعف الوزن اللي فقدتيه واهم شي تحملي من الحرمان والله تراه اهو ورا كل المصايب.ولاتنسين تمشين لو نص ساعه باليوم ومع بعض حركات اليد عشان تشد اليد من فوق واذا حبيتي تمرين البطن.
الله يوفقج يارب وانشالله توصلين للوزن اللي تبغينه والاهم تكونين بصحتج..
************************************************** ********************
الغاليه جوجل
انا لما اتبعت النظام اول مره ماحسيت باي شي غير اللهم بالصداع باول 3 ايام وبعدها حتى الجوع ماكنت احس فيه وبصراحه نزل وزني وبالشكل كان مبين واضح واستمريت عليه تقريبا شهرين بس بعدين وقفت بعد عيد الاضحي ورديت اسويه من فتره تقريبا شهرين واهني بدت الاعراض تطلع معاي من صداع واجهاد والدوره ( بسببه انحرمت من سفرتي للعمره لانه كان سبب لنزول الدوره علي قبل السفر بكم ساعه وانا اجهز ملابسي بس الحمدلله الله عوضني ورحت يوم الخميس من يومين)…وكانت هالاعراض متشابهه مع اعراض صديقتي اللي بدت معاي عشان جذي عرفت السبب من النظام ومن تركته الحمدلله راحت كل الاعراض عنا.
زين سويتي وقفتي عن هالنظام وحاولى تخففيين اكل وتمشين..تسلمين على المرور ..
************************************************** **************************
الغاليه GIS
ياهلا ويامرحبا فيج وانا اشكرج على مرورج بالموضوع اما عن كتابتي للموضوع احساسي بالمسؤوليه دفعني وخوفي على صحت خواتي وحبيت اوصل لكم تجربتي الشخصيه معاه…
تسلمين حبوبه على المرور وصدقتي والله مافي احسن من النظام الصحي ..والرياضه …
************************************************** ***************************
الاخت الغالية alina
انا بصراحه منحرجه منج لاني رديت عليج وكلمتج باسلوب جاف لما كتبت بموضوع الاخت المشتاقه لله اذا كان في انحياز منكم لعضوه ضد عضوه وخصوصا اني توني اعتبر عضوه جديده_
انا اسفه وحقج علي واتمنى انج مازعلتي من كلامي الله يعلم اني لما كلمتج وصارت بينا محادثات اني حبيتج واعتبرج اخت غاليه وعزيزه وبصراحه لج الفضل بعد الله اني اترك هالانواع من الانظمه واني انزل هالموضوع…ويارب الكل يقرا ردج على هالنوعيه من المواضيع..
الغاليه alina
خوفج على بنات المنتدى واضح ومبين من ردج عليهم ويارب ينحط هالشي بميزان حسناتج بيوم القيامه…… الله يسعدج ويوفقج يارب.
وتسلمين على مرورج
************************************************** *******************
اختي عذبة الاحساس
معاج حق بكل اللي قلتيه والله يعطيج العافيه والصحه
اختي انا عندي تعليق صغير
احساس الوحده اللي تبغي تنزل وزنها ويصير حالها مثل باقي البنات اهو اللي يخليها تندفع لاتباع اي نظام بمجرد ماينزل موضوع عن ريجيم ولا نظام جديد وصدقيني ترا البنات يعرفون مضار نقص عناصر وبعض الفيتامينات عن جسمهم بس مثل ماقلت لج جدام عينهم نزول الوزن اهم ومرات يكون على حساب صحتهم ( بصراحه انا عني جربت كذا نظام وكذا ريجيم وانا من هالنوعيه اعترف لكم ) بس بعد فتره من يحسون بالتعب وتبين عندهم الاعراض يوقفون عن النظام وهذا اللي صار معاي . ولما ردت على الاخت alina
وسكرت موضوعي بالبدايه زعلت وبعد فتره صرت اقرا عن هالنظام وصرت ابحث وعلى هذا كله رديت اسويه مره ثانيه وسبحان الله طلعت الاعراض على وعشان جذي وقفت عنه ونزلت هذا الموضوع بعد ماكلمت واستئذنت الاختalina واهي بصراحه شجعتي بالشي هذا لاني ماكنت عارفه شلون انزل الموضوع وخصوصا انا شايفه اقبال البنات على هالموضوع بشكل رهيب ..
الغاليه عذبه
الله يعطيج العافيه ويارب ماننحرم منج ولا من الغاليه alina وربي يكتبه لكم بميزان حسناتكم…
تسلمين على المرور
************************************************** *****************
اختي الدبه الجميله
ياهلا ويامرحبا فيج اختي والله يااختي مو شرط البنت الضعيفه اهي اللي تتزوج ويجيها نصيبها صج في ناس يفضلون الضعاف بس بعد في اللي يحبون السمينات ( خلينا نرفع من معنوياتنا اشوي ههههههههههه ونرقع لاعمارنا ههههههههههههه)
بس صديقيني هذا نصيب وانا واعرف بنات والله لوتشوفينهم مايطلعون من الباب ومتزوجات وازواجهم يموتون فيهم وعلى هذا يقولون لهم ياويلكم لو تنزلون اوزانكم لو ربع كيلو ( تصوري والله احس معنوياتي وصلت فوق ) انتي توكلي على الله واهم شي انج تخففين الاكل للنص بالبدايه وبعدين تنزلين الكميه ولاتنسين ترا دور الرياضه مهم وراح يشد لج جسمج ..
عارفه شنو اخطر شي اتباع كذا ريجيم وكذا نظام ورا بعض احنا عبالنا شي زين بس هذا يضرنا بشكل كبير وخصوصا بشرتنا وشعورنا..
تحياتي لج اختي ويارب توصلين للوزن اللي تبغينه عاد هاااااااااااا مو بعدين اذا ضعفتي ماتكلمينا لان احنا سمينات ههههههههههههههه اتغشمر معاج لاتزعلين
تحياتي لج وتسلمين على المرور
************************************************** ********************************
اختي تناديم
النظام اللي اقصده هو نظام د / حسين دشتي واهو نفسه نظام د / اتكنز
اساس الريجيم يقوم على الامتناع عن اكل السكريات والحلويات والفواكه والكربوهيدرات اللي من بينهم الخبز والرز والمكرونه ..
تسلمين اختي على مرورج بالموضوع
تحياتي لج
************************************************** ***************************
انا مستغربه من شي والله يابنات الكتاب من يوصل قطر يخلص بنفس الوقت وبنفس اليوم وصارت عندنا موضه الكل يتبع هذا النظام وتصوروا طلب الكتاب صار بالحجز ومرات بطق نعل ( كرمكم الله ) ومرات بحب خشوم ومرات يوصل الكتاب ومرات لا..
تصوروا من فتره انطبع الكتاب لنا للمره الثالثه مادري الرابعه لان الكل يبيه والطلب زايد عليه..
انا لقيت النسخه بطلعت روحي وجبته من الكويت بعد هههههههههههههههههههههه
تحياتي لكم واذا احد عنده اي استفسار انا موجوده باي وقت
تحياتي للجميع
نوارة قطر
 |
اقتباس |  |
 |
المشاركة الأساسية كتبها برا الطابور |  |
 |
| ياهلا في نواره وألف سلامه عليك ياعمري .. فاكره موضوعك وإني كتبت لكم عن أضراره ومخاطره وأوردت الكلام من كتاب الريجيم السريع للألفيه الثالثه أنا مثل حالتك ذهلت يوم قريت الكلام .. بس ماجربت اسوي أنا مصابه بالسمنه وضروري أنزل حوالي 45 إلى 50 كيلو .. بالإضافه إلى ضعط الدم المرتفع .. اللي هو خطر على بنت في عمري .. بس مافكرت أبد أسوي شي ما أحب اطول عليك بس أشكر فيك شجاعتك إنك كتبتي شي وتراجعت عنه الله يجزاك ألف خير .. إنشاء الله راح ننزل بدون أمراض وسلامتكم |
||
 |
 |
اختى النظام مافية شىء بس انت اكيد مش سمينة بالدرجة … عشان كدة اثر معاك التاثير دة..لانة بيلعب على مخزون السكر فى جسمك فلما جربتية فى الاول اخد من مخزون السكر دة فا محستيش لا بصداع ولا باى اعراض.ز لكن لما جربتية تانى انت كنت استهلكت كل المخزون اللى عندك فبدا السكر ينقص عندك وتحسى بصداع وفعلا ولااى حاجة هتخلية يروح لكن ساعتها لو كنت اختى قطعة شوكولاتة كنت بقيتى كويسة لانة من نقص السكر عندك.. وكمان انا من ناحيتى قبل ما نحكم على النظام نمشى مع دكتور الاول ويعملنا هو التحاليل المطلوبة ويبقى تحت اشرافة كدة فعلا نقدر نمشى على النظام واحنا مطمنين.. والكلام دة عن تجربة… وشكرا