يالله كل وحده تقولنا شو سوو اول اسبوع صاحوا استانسوا رضوا يدخلون بروحهم ولالا كيف هديتوهم وكل شي صار هالاسبوع
انا ببتدي بحمود
هاي او سنه ادخله الحضانه
اول يوم قومته بس ما قلتله وين بنسير قلتله حمود ماما حبيبي انا طالعه بتي وياي قالي هي قلتله يالله قوم ابدلك
فالسيارة سالني وين بنسير قلتله بوديك SCHOOL قالي بتين وياي قلتله اكيد
دخلنا وهو يسحب شنطته ومستانس يشوف اليهال وديته الCLASS اتعرفت على مدرسته وقعت معاه شوي وعقب قالتلي المدرسه يالله OUT طلعت وهو ماسكني من عباتي ويصيح شالته المدرسه وقعدت تلعب معاه سكت بس ما كان يشاركهم في اي شي … خلص الدوام سرت اخذه شفته يلعب بروحه ما يصيح استانست بس من شافني حضني وقعد يصيح وصحت معاه …
اليوم الثاني وكل ايام الاسبوع قومته بنفس الطريقه اقوله بطلع بتي وياي يقول هي وهو مستانس يركب السيارة من نوصل قريب المدرسه يفهم الموضوع ويبتدي يصيح ادخله الCLASS اقعد شوي واطلع يصيح مال 5 دقايق وعقب يتاقلم معاهم .. ويوم ارجع اخذه يضحك ويكون مستانس .. عكس اول يوم
الحمدلله اليوم راح بدون صياح وكان مستانس
بس المشكله ان ولدي موول ما ياكل شي لا فطور ولا فالمدرسه
يالله عاد اتفاعلوا معاي خلونا نستفيد من بعض ..
ياريت كل وحدة تسوي كده
سلااااااااام
مشكورة الغاليه احاول وياه بس ان شاء الله باقي الامهات يساعدونا بتفاعلهم معاي ونستفيد من طرقهم في تهيات عيالهم للمدرسة ..
بس تبون الصراحه توقعت اني افتح الموضوع الاقي الكل راد عليه ..
ولدي امس كان اول يوم لاني مدخلتنه بس يومين في الاسبوع..الاربعا و الخميس…
طبعا انا عكسج من زمان قايلتله بنسير سكول و في الليل اجهز له شنطه المدرسه واقول له باجر سكول و هالشنطه للسكول…ودوم نطري السالفه لين ما هو بدا يقول ماما ابا اسير سكول…المهم امس الصبح وعيته اقوله يلا نش بنسير مدرسه…المهم يوم وصلنا يجوف يهال و يبا يسير يلعب بالالعاب لاني كنت واصله من وقت ووقت كلاسه ما بدا (اول اسبوع بس من 10 و ربع لين 12 و ربع) المهم عقب يا وقته فسرت وديته صوب الكلاس مل حصلت حد..كانوا في حجره ثانيه..وديته هناك واول ما فتحت الباب شاف الالعاب و الصغاريه سار و المدرسه قالتلي روحي…قلت بترياه لين يخلص قالتلي اللي يالسه في الاداره ماله داعي روحي حتى لو صاح بيتصرفون وياه و اذا وااااااااااايد استصعبت السالفه بنتصل فيج فلا تحاتين..المهم رديت عال 12 فتحت باب الصف لقيته يالس يلعب بس لمحني وانا اسكر الباب و ياه انهيار من الصياح…فسرت اخذه و حضنته لين ما سكت..وقلت له قول باي حق المس و الصغاريه…اليوم الصبح انششه اقوله يلا بنسير السكول ووديته نفس الشي يوم فتحت الباب بسرعه المدرسه حضنته و سحبوه من ايدي من غير ما يحس وسار يلعب…و يوم رديت اخذه حصلته ميود دف و يغنون و يعزفون خخخ بس يوم جافني بغى يصيح و يا يركض صوبي …قالتلي المس انه صاح بس اونه بيتعود
الله يستر من الاسبوع الياي
طبعا الاكل ما هبشه و نفس الحاله من غير ريوق يسير…اليوم بس كل قطعتين خيار
بجعه و لدج في اي صف؟ في اي فئه عمريه حاطينه؟
هلا الغاليه
اخ من اليهال الي يصيحون وما يسكتون صدق يعورون القلب
اتصدقين اني انا ايلس فالادارة اتريا ولدي لانه ساعتين بس من 8 الين 10 بس من الاسبوع الياي بيبتدي الجد بيكون من الساعه 8 الين 12 ونص
انا ولدي في BEETLE CLASS
وانتي ولدج في اي CLASS ..؟؟
ويوم ثاني ( يعني امس ) داوم وراح في الباص وهذه مو اول سنة يداوم هو راح يوم كان صغير حضانة وراح اللعام روضة .. فكنت نوعا ما متعودة واللعام في الروضة ما صاح كللللش بس السنة يقول انه صاح اقوله ليش الا يقول لأنكم ما جيتون معاي وبعد الاطفال كلهم يصيحون هههههههههههههههه بس يعني كان عادي مو كاره السكول وانا مباشرة سألته بتروح السكول بكره بعد ! فقال ايي بروح واليوم راح ورجع يقول صحت شوي اليوم بعد هههههههه اقول له ليش ؟ قال لأنكم ما جيتون معاي (a)
وبسسس .. الحمدلله احسه يحب السكول ومرتاح ويحب التيجر مالته وكل يوم يقعد يقول لي وش سووا ، وفي هاليومين من يرجع اسوي له استقبال بالاحضان ههههههههههههه المسكين لان مدرسته بعيدة عن البيت ويروح ويرجع في الباص يعني يفررونه على بيوت باقي الطلاب بعد خخخ فلما يرجع احسه تعبااان ويعور قلبي وا عليه :16:
ماما حسون
يا حليله حسون..حمود بعد يقولي انا اصيح في السكول خخخ واسوي طأطأ الدادا..يعني يضرب الصغاريه خخخ
ويسألني ماما انتي وين سرتي…قطعلي قلبي فديته
اصلا اول يوم يوم تركته في الصف …تسالني المشرفه are u ok
قلتلها لا وعيوني تدمع واحاول ما اصيح…وهي تفتح لي مواضيع عن لون عيون حمود خخخخ
حبيبي الله يقول بعد انا صحت ..
حلوين يوم سونهم قطار يمشوونهم كلهم ورا بعض وحاطين اياديهم على جتوف بعض
وبعدين يوم تعب من الصياح نام اشوي هناك ورجع الظهر وقال ملل الروضة يخولنا واجد هناك انا ما ابي ارروح ويقول لي انه يحبني وما يبي يخليني وثاني يوم قعد يصيح مو راضي يلبس ثيابه ولا شي ومعاند ما يبي يرروح وخليت الباص يروح عنه وبعدين اني وصلته الروضة وما رضى ينزل وجت اليه مدرسته السيارة ونزلته وقعدت تلعب وياه واني دخلت وياه الروضة واخذت رقم مدرسته عشان اتواصل وياها وغافلت صدوقي وطلعت عنه وطبعا قعد يصيح هناك وبعدين ظلينا على هالحال كل يوم صياح من الصبح وما يركب الباص الا بالصيااح واكو اخر الايام في هالاسبوع احسه تعود اشوي وتصادق مع واحد هناك ونفسيته صارت احس رغم انه للحين يقول ما ابي اروح الروضة بس الحمد لله مو مثل قبل يعني تطوور واجد
وان شاء الله للاحسن على طوول والله يهديه ويحفظه لي يارب
حنا في السعوديه لسا ماعندنا دوام بعد العيد بيكون الدراسه
وبنتي عمرها ثلاث سنوات ونصف وتبغى تسير الروضه لكني خايفه عليها احسها لسا صغيره
اقول خليها الى السنه الجايه
مشكورين اخواتي حبيت اقراء الموضوع لانه شدني